Read cisena 2 MAFUMU 10 Bible Online

2 MAFUMU 10 - cisena bible

2 MAFUMU 10

¹Pakhali pidzukulu makumanomwe pya Mfumu Ahabu, pile pikhakhala mumzinda wa Samaria. Yehu adalemba kalata mbaitumiza kuna mathubu a mumzindamo,[13] akulu-akulu na kuna anyakuyang'anira pidzukulu pya Ahabu. Kalatayo idalembwa tenepa:

²“Imwe ndimwe anyakuyang'anira pidzukulu pya mfumu, pontho kweneko muna pingolo, akavalo, pida pya nkhondo, pontho mizinda yakutchingwa na mpanda. Natenepo sindzidzi imwe nkhutambira kalatayo,

³imwe mwathema kusankhula munthu wadidiletu pontho wakuthemaletu kubulukira pa pidzukulu pya mfumu mbamumpitise ufumu; mungamala kuchita tenepo mumenye nkhondo kumtchinjiriza.”

⁴Mathubu a mumzinda mule adachita mantha mbalonga mbati, “Ngakhala mafumu awiri adachimwana kumenyana naye, apo ifembo ndiye tani?”

⁵Natenepo mkadamu wa kunyumba ya mfumu, mkulu wa boma mumzindamo, akulu-akulu na anyakuyang'anira pidzukulu pya mfumu adatumiza mphangwa izi kuna Yehu: “Ife ndife anyabasanu, pontho tinati tichite pyonsene pinatipanga imwe. Kwache ife nkhabe funa kusankhula munthu na mbodzi ene tayu kukhala mfumu. Imwe mwathema kuchita pinanyerezera imwe kuti mphyadidipyo.”

⁶Kubuluka penepo Yehu adalemba kalata inango mbati, “Ngakhala imwe muli kukhundu kwanga pontho kuti munandivera, mangwana ndzidzi ninga ontho uno mundidzesere misolo ya pidzukulu pya Mfumu Ahabu kuno ku Yezereele.” Pidzukulu makumanomwe pya Ahabu pikhakhala na akulu-akulu a mumzindamo, akhaalera ale.

⁷Pidafika kalata ile, amuna ale adapha pidzukulu pya Ahabu makumanomwe pile. Iwo adakwata misolo ya anyakufa ale mbaiikha m'pitundu mbaitumiza kuna Yehu ku Yezereele.

⁸Pidafika nyamphangwa kuna Yehu adalonga mbati, “Iwo adza na misolo ya pidzukulu pya Mfumu Ahabu.” Tenepo Yehu adalonga mbati, “Iikheni pamilu miwiri pamsuwo wa mpanda wa mzinda kufikirana mangwana na machibese.”

⁹Mangwana mwache na machibese, Yehu adabuluka panja. Iye adaimira pamaso pa anthu onsene mbalonga mbati, “Imwe ndimwe anthu okhonda dawa. Ine ndine ndidasandukira mbuyanga mbandimpha, apo mbani apha anthu onsene ali panowa?

¹⁰Lero pidziweni kuti pinthu pyonsene pidalonga MBUYA kupokanyisana na Ahabu pinati pikwane-kwane, pontho MBUYA achita pinthu pidadumbira iye kudzera muna nyabasache Elia.”

¹¹Natenepo Yehu adapha munthu onsene wa m'banja ya Ahabu, ule akhadasalira mu Yezereele pabodzi pene na mathubu ache onsene, ashamwali ache aponda-pondembo, pontho na anyansembe ache ene; nkhabe munthu na mbodzi ene wa iwo adasalira na moyo tayu.

¹²Kubuluka penepo Yehu adasasanyika mbaenda ku Samaria. Pidafika iye pambuto yakuchemerwa “Msasa wa Makabuswa,”

¹³iye adagumanikana na abale anango a Mfumu Ahazia wa ku Yuda mbaavunza mbati, “Ayi ndimwe ani?” Iwo adatawira mbati, “Ndife abale ache Mfumu Ahazia, tenepo tadza kuno kuti tipereke mwenyikiro kuna ana a mfumu na kuna ana a matsano.”

¹⁴Yehu adatonga amunache mbati, “Aphateni amoyo.” Tenepo iwo adaaphatadi amoyo mbakaapha chifupi na mchera wa mu Msasa wa Makabuswa; anyakufawo akhalipo amuna makumanayi na awiri. Nkhabe mbodzi wa iwo adasiyiwa na moyo tayu.

¹⁵Pidabuluka Yehu penepo, panjira adagumanikana na Yehonadabu mwana Rekabu, ule akhabwera dzagumanikana na Yehu. Yehu adampasa mwenyikiro mbalonga mbati, “Iwe na ine chathu ntchibodzi chene, ayi iwe unakwanisa kundiphedza?” Yehonadabu adatawira mbati, “Ande, ndinakuphedza.” Yehu adalonga mbati, “Ngakhala ndi tenepo ndipase dzanjako.” Iwo adakhethesana manjawo, tenepo Yehu adamkwizika m'chingolo.

¹⁶Yehu adalonga mbati, “Tende pabodzi pene ukaone phinganga pabasa ya MBUYA.” Natenepo iye adafamba naye pabodzi m'chingolo mwache mule.

¹⁷Pidafika Yehu ku Samaria, adapha onsene a m'banja ya Ahabu, akhadasalira kweneko ale; iye adavunga onsene ninga montho mukhadalongera MBUYA kuna Elia.

¹⁸Kubuluka penepo Yehu adachemeresa anthu onsene mu Samaria mbalonga kuna iwo mbati, “Ahabu adatumikira milungu Baala mwakuchepa, mbwenye Yehu anati anyanye kumtumikira.

¹⁹Natenepo chemeresani maprofeti onsene a Baala, anyakumpembedza onsene na anyansembe ache onsene. Onesesani kuti paleke khala mbodzi okhonda kudza thangwi ndinafuna kuchita mwambo ukulu wakupereka nsembe kuna Baala. Munthu onsene okhonda kudza anati aphiwe.” Yehu akhachita penepi mwakuanyengeza ninga msampha towera avunge anyakupembedza Baala onsene.

²⁰Yehu adalonga mbati, “Chemeresani mgumano kuti tilemedze Baala.” Natenepo anthu adachemeresa mgumano ule.

²¹Kubuluka penepo iye adatumiza mphangwa mu Israele monsene, tenepo anyakupembedza Baala onsene adadza; nkhabe na mbodzi ene adakhonda kwendako tayu. Iwo onsene adagumanyikana m'nyumba yakupembedzeramo Baala mpakana nyumba yonsene idadzala kutomera nkhomo kufikirana nkhomo.

²²Natenepo Yehu adalonga kuna nyakukoya mikhanjo mbati, “Bwera na mikhanjo yakupambulika mbuipereke kuna anyakupembedza Baala onsene.” Tenepo iye adadza nayodi mikhanjo ile mbaipereka kuna iwo.

²³Kubuluka penepo Yehu na Yehonadabu mwana Rekabu adapita m'nyumba yakupembedzamo Baala ile. Yehu adalonga kuna anyakupembedza Baala ale mbati, “Muyang'ane yang'ane pakati panupo, pontho muonesese kuti paleke khala anyakupembedza MBUYA pabodzi pene na imwe muno tayu. Muno mukhale anyakupembedza Baala ene basi.”

²⁴Natenepo uwiriawo adapita m'nyumba mule kupereka nsembe na pyakupereka pyakupyerera. Pandzidzi wenewo Yehu akhadaikha kale amuna makumasere kukhala kunja kwa nyumbayo mbaacheuza mbati, “Ngakhala munthu analekerera mbodzi wa amuna anakupasani ine m'manja mwanu lerowa, kuthawa anapagali moyo wache ndiye.”

²⁵Sindzidzi Yehu nkhumalisa pereka nsembe ile, adatonga anyakulondali na akadamu mbati, “Pitani m'nyumbamu mukaaphe; lekani thawisa munthu na mbodzi ene.” Natenepo iwo adaapha onsene na talasada. Anyakulondali na akadamu ale adataya mitembo ya anthu ale kunja. Kubuluka penepo iwo adapita m'subi yakupambulika ya m'bwaloletu ya nyumba yakupembedzeramo Baala,

²⁶mbabulusa panja chiguwa chakupambulika mbachipisa moto.

²⁷Iwo adagomola chiguwa chakupambulikachi mbafudza-fudza nyumba yakupembedzeramo Baala mbaisanduza mbuto yakupambukirako.

²⁸Natenepo Yehu adavunga chipembedzo cha Baala mu Israele.

²⁹Kwache iye hadaleke tayu kudawa kukulu kukhachita Yeroboamu mwana Nebati kule kukhachitisa Aisraele kudawa pakupembedza mifanikizo ya anamphulu yagolidi pa Betele na Dani.

³⁰MBUYA adalonga kuna Yehu mbati, “Na thangwi yakuti iwe wachita pinthu pyakulungama pontho pyakuthema pamaso panga, pontho kuti wachita kuna banja ya Ahabu pinthu pikhanyerezera ine kupichita pile, pidzukulu pyako pinakhala pampando wachifumu mu Israele kufikirana mifendu inayi inadzayo.”

³¹Kwache Yehu hakhachita mphole-mphole tayu kukoya mwambo wa MBUYA Mulungu wa Israele na mtimache onsene. M'mbuto mwache iye hadafune kuleka pyakudawa pikhachita Yeroboamu pile pidachitisa Aisraele kudawa.

³²Nsiku zenezo MBUYA adatoma kuchepesa madire a dziko ya Israele. Hazaele adakunda Aisraele m'nthemba yonsene

³³wakumabulukiro dzuwa a mkulo wa Yorodani mpakana kuluwani ya Aroeri chifupi na mkulo wa Arinoni, penepa nkhuthimiza nthemba ya Gileadi na Bashani kule kukhakhala madzinza a Gadi, Rubeni na Manase yakumabulukiro dzuwa.

³⁴Pinango pyonsene pidachitika Yehu mbali mfumu na pyonsene pidachita iye mwakuwanga mtima pyalembwa m'bukhu ya mbiri ya mafumu a Israele.

³⁵Yehu adagonera mkono mbaikhwa m'masiye a makolo ache mu Samaria. Tenepo Yehoahazi mwanache adapita ufumu m'mbuto mwache.

³⁶Yehu adakhala mu Samaria mbatonga Israele pyaka makumawiri na pisere.