Read cisena 2 MAFUMU 11 Bible Online

2 MAFUMU 11 - cisena bible

2 MAFUMU 11

¹Sindzidzi Atalia mache Mfumu Ahazia nkhudziwa pya kuphiwa kwa mwanache, iye adatonga kuti anthu onsene a m'banja ya chifumu aphiwe.

²Mbwenye Yoasi mwanache Ahazia adapulumuka. Iye akhali chifupi kuphiwa kubodzi kwene na ana anango ale, mbwenye Yehosheba mwana Mfumu Yehoramu pontho nyamaingache Ahazia ndiye adampulumusa. Iye adakwata pabodzi pene na makayayache mbaambisa m'subi yakugona m'Nyumba ya Mulungu kuabulusa pamaso pa Atalia, towera iye aleke phiwa.

³Pyaka pitanthatu Yehosheba adayang'anira mwadidi mwana ule mbathimiza basi kumbisa m'Nyumba ya Mulungu, uku Atalia akutonga dziko.

⁴Mbwenye chaka chachinomwe Yehoiada adachemeresa akadamu a anyakulondali mfumu na a anyakulondali nyumba ya chifumu kudza kuna iye ku Nyumba ya MBUYA, kule kudaadumbirisa iye kuvera pinthu pikhasasanya iye kupichita pile. Kubuluka penepo iye adaaonesa Yoasi, mwana Mfumu Ahazia.

⁵Iye adaapanga mbati, “Imwe mwathema kuchita ipi: imwe ale buswanu ili pa Nsiku Yakupuma mwathema kupigawa m'magulu matatu: gulu ibodzi yathema kulondali nyumba ya chifumu;

⁶gulu yachiwiri yathema kulondali pamsuwo wa Suri, pontho gulu yachitatu yathema kulondali pamsuwo wa mpanda kunduli kwa anyakulondali anango ale.

⁷Tenepo magulu anango awiri, ale si buswawo tayu pa Nsiku Yakupuma, athema kulondali pa Nyumba ya Mulungu kutchinjiriza mfumu.

⁸Imirani mwakuzungulira mfumu kada munthu aphatira chida cha nkhondo m'manja mwache. Munthu onsene anafika chifupi na imweyo athema kuphiwa. Khalani chifupiletu na mfumu konsene kwene kunaenda iye.”

⁹Akadamu ale adachita ninga montho mudaapangira Yehoiada nyansembe. Mkadamu onsene akhakwata amunache, ale akhakotoka na ale akhatoma buswawo pa Nsiku Yakupuma mbadza nawo kuna Yehoiada nyansembe.

¹⁰Kubuluka penepo nyansembe ule adapereka kuna akadamu madipa na pyakugedera matswimo, pile pikhali pya Mfumu Davite mbapikoyiwa m'Nyumba ya MBUYA.

¹¹Iye adaikha amuna akuphatira matalasada m'manja mwawo kuzungulira kutsogolo kwa Nyumba ya Mulungu, kutchinjiriza mfumu.

¹²Yehoiada adabulusa panja Yoasi mbamvazika chipewu chachifumu. Iye adapaswa pontho bukhu ya matongero a dziko mbadzozwa ufumu. Tenepo anthu adaimba m'manja mbakhuwa mbati, “Dondowe mfumu!”

¹³Pidava Atalia kusokosera kukhachita anthu na anyakulondali kule, adenda kukhali anthu kule ku Nyumba ya MBUYA.

¹⁴Penepo iye adaona mfumu wachinchino ule, aimira chifupi na mzati pamsuwo wa Nyumba ya Mulungu ninga mwa mtemo wawo. Iye adazungulirwa na mathubu, pontho na anyakuliza ngoma. Anthu onsene akhakhuwa mbaliza ngoma thangwi yakukomerwa. Natenepo Atalia adang'amba nguwo zache mwakuzhangali mbakhuwa mbati, “Ngupandu, ngupandu!”

¹⁵Yehoiada hadafune tayu kuti Atalia apherwe chifupi na Nyumba ya Mulungu, natenepo adatonga akadamu ankhondo mbati, “Mkwatireni kunja mkaziyu pakati pa mizere ya anyakulondali, pontho phani munthu onsene wakufuna pyakumvunulirayo.”

¹⁶Iwo adamphata mbamkwekwetera kunyumba yachifumu, tenepo pidafika iwo pamsuwo wa mpanda wa Kavalo, adampha.

¹⁷Kubuluka penepo Yehoiada adachita chiverano pakati pa MBUYA na Mfumu Yoasi, pontho na anthu kuti iwo anakhala anthu a MBUYA. Iye adachita pontho chiverano pakati pa mfumu na anthu.

¹⁸Tenepo anthu adenda kunyumba yakupembedzeramo milungu Baala mbaigomola. Iwo adaswa maguwa ansembe na mifanikizo mbapha Matani nyansembe wa Baala patsogolo pa maguwa ansembe. Tenepo Yehoiada adaikha pabuswa anyakulondali pa Nyumba ya MBUYA.

¹⁹Iye adakwata akadamu ankhondo, anyakulondali mfumu na anyakulondali nyumba yachifumu, pontho na anthu onsene; tenepo onsene pabodzi pene adakwata mfumu kubulukira ku Nyumba ya Mulungu kwenda naye kunyumba yachifumu mbapita na pamsuwo wa anyakulondali. Kubuluka penepo mfumu adakhala pampando wache wachifumu.

²⁰Anthu onsene adakomerwa pyakwanga. Tenepo mumzindamo mukhali mtendere, thangwi Atalia akhadaphiwa panyumba yachifumu.

²¹Yoasi akhali na pyaka pinomwe pidapita iye ufumu wa Yuda.