Read cisena 2 MAFUMU 13 Bible Online

2 MAFUMU 13 - cisena bible

2 MAFUMU 13

¹Chaka chamakumawiri na chitatu Yoasi mwana Ahazia mbali mfumu wa Yuda, Yehoahazi mwana Yehu adapita ufumu wa Israele mbatonga mu Samaria pyaka khumi na pinomwe.

²Iye adachita pyakuipa pamaso pa MBUYA mbateweza pyakudawa pidachita Yeroboamu mwana Nebati, pile pidachitisa Aisraele onsene kudawa, pontho iye hadaleke pyakudawa pyache pile tayu.

³Natenepo MBUYA adazhangalira Aisraele mbaachitisa ndzidzi ukulu ene kukhala pansi pa utongi wa Hazaele mfumu wa Aramu na Beni-Hadadi mwanache.

⁴Tenepo Yehoahazi adapemphera kuna MBUYA, natenepo MBUYA adava kupemphera kwache, pontho iye adaona kuti mfumu wa Aramu akhapondereza pyakwanga Aisraele.

⁵MBUYA adapereka dombo kuna Aisraele ule adaabulusa pansi pa utongi wa Aaramu. Natenepo Aisraele adakhala m'misa mwawo mwene ninga mukhachitira iwo pakutoma.

⁶Mbwenye iwo hadaleke pyakudawa pya banja ya Yeroboamu, pile pidachitisa Aisraele kudawa; iwo adathimiza kuchita penepyo. Dzimunthu wa milungu Ashera adathimiza basi kukhala mu Samaria.

⁷Kulonga pya anyankhondo a Yehoahazi nkhabe chinthu na chibodzi chene chikhadasalira kupambula amuna makumashanu akupakira akavalo, pingolo khumi, pontho na anyankhondo akufamba pansi pikwi khumi; thangwi mfumu wa Aramu akhadavunga pinango pyonsene mwakuti adakhala ninga fumbi pandzidzi wa kububuda.

⁸Pinango pyonsene pidachitika Yehoahazi mbali mfumu na pyonsene pidachita iye mwakuwanga mtima pyalembwa m'bukhu ya mbiri ya mafumu a Israele.

⁹Yehoahazi adagonera mkono mbaikhwa m'masiye a makolo ache mu Samaria. Tenepo Yehoasi mwanache adapita ufumu m'mbuto mwache.

¹⁰Chaka chamakumatatu na chinomwe Yoasi mbali mfumu wa Yuda, Yehoasi mwana Yehoahazi adapita ufumu wa Israele mbatonga mu Samaria pyaka khumi na pitanthatu.

¹¹Iye adachita pyakuipa pamaso pa MBUYA mbateweza pyakudawa pidachita Yeroboamu mwana Nebati, pile pidachitisa Aisraele onsene kudawa, pontho iye hadaleke pyakudawa pyache pile tayu.

¹²Pinango pyonsene pidachitika Yehoasi mbali mfumu, pyonsene pidachita iye, na kuwanga kwache mtima pankhondo kumenyana na Amazia mfumu wa Yuda pyalembwa m'bukhu ya mbiri ya mafumu a Israele.

¹³Yehoasi adagonera mkono mbaikhwa m'masiye a makolo ache, mafumu a Israele, mu Samaria. Tenepo Yeroboamu mwanache adapita ufumu m'mbuto mwache.

¹⁴Na ndzidzi wenewu Elisha akhasanyika pyakwanga na utenda, ule pakumalisira pache adafa nawo. Yehoasi mfumu wa Israele adenda kamuona mbamulira mbati, “Baba, baba! Pingolo na anyakupakira akavalo a Israele.”

¹⁵Elisha adalonga mbati, “Kwata uta na matswimo.” Iye adachitadi tenepo.

¹⁶Elisha adalonga kuna mfumu wa Israele ule mbati, “Phatira utawu m'manja mwako.” Pikhauphatira iye, Elisha adasanjika manjache pamanja a mfumu ule,

¹⁷mbalonga mbati, “Fungula zhanera yakumabulukiro dzuwa.” Iye adafunguladi, tenepo Elisha adalonga mbati, “Iponye.” Iye adaponyadi. Kubuluka penepo Elisha adalonga mbati, “Tswimo ya MBUYA yakukunda nayo, tswimo yakukunda nayo Aramu. Iwe unavunga monsene mwene Aaramu pa Afeki.”

¹⁸Kubuluka penepo iye adalonga kuna mfumu ule mbati, “Kwata matswimo ako.” Mfumu ule adakwatadi, tenepo Elisha adalonga mbati, “Lasa pansi.” Mfumu ule adalasa pansi katatu mbaleka pyache.

¹⁹Munthu wa Mulungu adazhangali naye munthu ule mbalonga mbati, “Iwe udathema kumenya pansi kashanu penu katanthatu; iwe mbudamenya Aaramu na kuavunga monsene mwene. Mbwenye lero unaavunga kwene katatu basi.”

²⁰Kubuluka penepo Elisha adafa mbaikhwa m'masiye. Chaka na chaka magulu a mapanga a ku Moabu akhali na chisimo chakupita m'dzikomo kapokosera pinthu.

²¹Nsiku inango pikhaikha Aisraele munthu unango m'masiye, mwakututumusa adaona gulu ya Amoabu. Natenepo iwo adamponya munthu ule m'nthumbi ya Elisha mbathawa. Pidakhuya mtembo ule magogodo a Elisha, munthu ule adalamuka mbakhala pontho na moyo, tenepo iye adaimira dzololo.

²²Hazaele mfumu wa Aramu akhapondereza Aisraele ndzidzi onsene ukhali Yehoahazi mfumu.

²³Mbwenye MBUYA adaakomera mtima mbava nawo nyambalo, tenepo adaaonesa kuatsalakana kwache thangwi ya chiverano chidachita iye na Abrahamu, Isake na Yakobo. Na lero iye nkhabe funa pyakuavunga penu kuabulusa pamaso pache tayu.

²⁴Hazaele mfumu wa Aramu adafa, tenepo Beni-Hadadi mwanache adapita ufumu m'mbuto mwache.

²⁵Kubuluka penepo Yehoasi mwana Yehoahazi akhadapokosera pontho kubuluka m'manja mwa Beni-Hadadi mwana Hazaele maluwani, ale akhadakwata iye pankhondo kubulukira m'manja mwa Yehoahazi babache. Katatu kene Yehoasi adamkunda, natenepo iye adakwata pontho maluwani a Aisraele.