Read cisena 2 MAFUMU 14 Bible Online

2 MAFUMU 14 - cisena bible

2 MAFUMU 14

¹Chaka chachiwiri Yehoasi mwana Yehoahazi mbali mfumu wa Israele, Amazia mwana Yoasi adapita ufumu wa Yuda.

²Iye adapita ufumu uku ana pyaka makumawiri na pishanu mbatonga mu Yerusalemu pyaka makumawiri na pifemba. Mache akhali Yehoadini wa ku Yerusalemu.

³Yehoasi adachita pyakulungama pamaso pa MBUYA. Kwache nkhabe kufikira pinthu pidachita Davite kholo wache tayu. Papyonsene pikhachita iye, adateweza pikhadachita Yoasi babache.

⁴Mbwenye mbuto zakupembedzerapo milungu nee zidabuluswa tayu, tenepo anthu adathimiza basi kwenda kweneko kapereka nsembe na kufukiza pyakununkhira.

⁵Sindzidzi Amazia nkhukhazikika pa ufumu wache, adapha mathubu ale adaphambo babache ale.

⁶Kwache iye hadaphe anawo tayu, mbwenye adateweza pidatonga MBUYA m' Mwambo wa Mose kuti: “Makolo mbaleke phiwa thangwi ya kudawa kwa anawo; anambo mbaleke phiwa thangwi ya kudawa kwa ababawo. Munthu athema kuphiwa thangwi ya kudawa kwache.”

⁷Amazia adapha anyankhondo a Chiedomu pikwi khumi paphedi ya Munyu; iye adapokosera mzinda wa Sela na nkhondo mbauthula Yokoteele, dzina yeneyi ikhalipo basi na lero.

⁸Tenepo Amazia adatuma anyamphangwa kuna Yehoasi mfumu wa Israele kampanga kuti, “Idza kuno, tilemberane mzera!”

⁹Mbwenye Mfumu Yehoasi adamtawira na mphangwa zakuti, “Pidachitwa na dawe mu Lebanoni, ule adatumiza mphangwa kuna muti wamkungudza mu Lebanoni kuti, ‘Sembesa mwanako wamkazi kuna mwananga wamamuna.’ Nyama yam'tsanga idagwanda na penepo mbipondedza dawe ule.

¹⁰Chinchino iwe Amazia wakunda Aedomu mbutoma kutumbama. Kuveka kuna iweko udakwane nako tayu mbukhala pyako kumusa kwako. Thangwi yache ninji unafuna kusosa nyatwa, ile inafuna kudzesa kuvungika kuna iwe na anthu ako ene?”

¹¹Mbwenye Amazia hadapiikhe konta penepyo tayu. Natenepo Mfumu Yehoasi adenda pabodzi pene na amunache mbakamenyana naye nkhondo pa Beti-Shemeshi mu Yuda.

¹²Anyankhondo a Amazia adakundwa, tenepo onsene adathawira kumisa kwawo.

¹³Yehoasi adaphata Amazia ninga nyaperezo. Kubuluka penepo Yehoasi adapita mu Yerusalemu mbagwisa mpanda wa mzindawo kutomera pamsuwo wa Eferemu mpakana ku Msuwo Wapankhomo, nsinzo wache ukhali nenene mathanyo madzana mawiri.

¹⁴Iye adakwata siliva na golidi onsene adagumana iye, pyonsene pya m'Nyumba ya MBUYA na pyonsene m'pyakukoyeramo mfuma m'nyumba yachifumu. Iye adakwata pontho anthu ninga anyaperezo kwenda nawo ku Samaria.

¹⁵Pinango pyonsene pidachitika Yehoasi mbali mfumu, pyonsene pidachita iye, na kuwanga kwache mtima pankhondo kumenyana na Amazia, pyalembwa m'bukhu ya mbiri ya mafumu a Israele.

¹⁶Yehoasi adagonera mkono mbaikhwa m'masiye a makolo ache, mafumu a Israele, mu Samaria. Tenepo Yeroboamu mwanache adapita ufumu m'mbuto mwache.

¹⁷Amazia mfumu wa Yuda adakhala na moyo pyaka khumi na pishanu, pidafa Yehoasi mwana Yehoahazi mfumu wa Israele.

¹⁸Pinango pyonsene pidachitika Amazia mbali mfumu pyalembwa m'bukhu ya mbiri ya mafumu a Yuda.

¹⁹Mu Yerusalemu anthu anango akhadasasanya pyakupha Amazia, natenepo iye adathawira kumzinda wa Lakishi, kwache anyamalwache adamtewera mbakamphera konthoko.

²⁰Mtembo wache udathukulwa pakavalo kubwerera nawo ku Yerusalemu. Tenepo adaikhwa m'masiye achifumu mumzinda wa Davite.

²¹Anthu a mu Yuda adapitisa ufumu Uzia wa pyaka khumi na pitanthatu m'mbuto mwa babache Amazia.

²²Uzia adakunda mbamanga pontho Elati pidagonera mkono babache.

²³Chaka chakhumi na chishanu Amazia mwana Yoasi mbali mfumu wa Yuda, Yeroboamu mwana Yehoasi adapita ufumu wa Israele mbatonga mu Samaria pyaka makumanayi na chibodzi.

²⁴Iye adachita pyakuipa pamaso pa MBUYA pakuteweza pyakuipa pidachita Mfumu Yeroboamu mwana Nebati, ule adachitisa Aisraele kudawa.

²⁵Iye adakunda pontho nthemba zonsene zile zikhali za Aisraele pakutoma, kutomera kunjira yamakata ku Hamati kumpoto mpakana ku Nyanza Yakufa kumwera. Penepi ndiye pidadumbira MBUYA Mulungu wa Israele kudzera muna nyabasache mprofeti Yona mwana Amitai wa ku Gati Hefere.

²⁶MBUYA adaona kusanyika konsene kwa Aisraele onsene, bitchu penu mtumbe, mwakuti pakhali nkhabe munthu na mbodzi ene wakuaphedza tayu.

²⁷Mbwenye kweneku nee kukhali kufuna kwa MBUYA tayu kuti avunge Israele monsene mwene. Natenepo iye adaapulumusa kudzera muna Mfumu Yeroboamu mwana Yehoasi.

²⁸Pinango pyonsene pidachitika Yeroboamu mbali mfumu, pyonsene pidachita iye, na kuwanga kwache mtima pankhondo na mule mukhadabwezera iye kuna Israele[15] maluwani a Damasiko na Hamati, ale akhali m'manja mwa Yuda, pyalembwa m'bukhu ya mbiri ya mafumu a Israele.

²⁹Yeroboamu adagonera mkono mbaikhwa m'masiye a makolo ache, mafumu a Israele. Tenepo Zekaria mwanache adapita ufumu m'mbuto mwache.