Read cisena 2 MAFUMU 17 Bible Online

2 MAFUMU 17 - cisena bible

2 MAFUMU 17

¹Chaka chakhumi na chiwiri Ahazi mbali mfumu wa Yuda, Hoshea mwana Ela adapita ufumu wa Israele mbatonga mu Samaria pyaka pifemba.

²Iye adachita pyakuipa pamaso pa MBUYA, kwache si ninga montho mudachitira mafumu anzache m'ndulimu tayu.

³Shalimanesere mfumu wa Asiria adachita naye nkhondo; Hoshea adaimisa manja kuna iye, tenepo chaka na chaka akhakhoma msonkho kuna iye.

⁴Mbwenye nsiku inango Hoshea adatuma aimiriri a dziko kwenda kuna So, mfumu wa Iguputo,[20] kumpempha kuti amphedzembo, pontho iye adaleka kukhoma msonkho wa chaka na chaka kuna mfumu wa Asiria. Pidadziwa Shalimanesere pya penepi adamanga Hoshea mbamponya m'perezo.

⁵Kubuluka penepo Shalimanesere adachita nkhondo na dziko yonsene ya Israele mbazungulira mzinda wa Samaria na anyankhondo ache pyaka pitatu.

⁶Chaka chachifemba cha ufumu wa Hoshea, mfumu wa Asiria, adapokosera Samaria mbakwata Aisraele kwenda nawo ku Asiria ninga anyaperezo. Anango adaakhazika mumzinda wa Hala, anango chifupi na mkulo wa Habori m'nthemba ya Gozani pontho anango mumzinda wa Media.

⁷Samaria adakundwa, thangwi Aisraele adadawa pamaso pa MBUYA Mulungu wawo, ule adaapulumusa m'manja mwa mfumu wa ku Iguputo mbaabulusa m'dzikomo. Iwo akhapembedza milungu inango,

⁸kuteweza mitemo ikhachita anthu ale adathamangiswa na MBUYA pandzidzi ukhadza anthu ache mwenemo. Iwo adatsanzira pontho mitemo idatomesa mfumu wa Israele.

⁹Aisraele adachita[21] pinthu pyokhonda komera Mulungu wawo. Iwo adasasanya mbuto zakupembedzerapo milungu m'maluwani awo onsene, kutomera kunsanja za anyakulondali mpakana mumzinda ukululetu.

¹⁰Pamapiri onsene na pansi pa miti yonsene yakuvata adamangapo piguwa pyakupambulika na adzimunthu a milungu Ashera,

¹¹mbafukiza pyakununkhira pambuto zonsenezi zakupembedzerapo milungu kuteweza pinthu pikhachita anthu adathamangiswa na MBUYA, ale akhali m'dziko mule. Iwo adalamusa ukali wa MBUYA thangwi ya mabasawo akuipa

¹²mbakhonda kuvera matongero a MBUYA kuti aleke pembedza mifanikizo.

¹³MBUYA akhadatuma anyamphangwa na maprofeti kudzacheuza Aisraele na Yuda mbalonga mbati, “Lekani njira zanu zakuipazo mbamuvere matongero anga onsene, ale ali m'bukhu ya mwambo udapereka ine kuna makolo anu mbindikupasani kudzera muna anyabasanga maprofeti.”

¹⁴Kwache iwo hadavere tayu, iwo ngakuuma mtima ninga makolo awo, ale hadanyindire MBUYA Mulungu wawo tayu,

¹⁵Iwo adakhonda kuvera matongero ache; iwo hadakoye tayu chiverano chidasasanya iye na makolo awo, pontho kuacheuza kwache hadakuikhe konta tayu. Iwo adapembedza milungu yakusowa basa, iwo mbakhalambo akusowa basa, pontho iwo adateweza mitemo ya madzinza anango akuazungulira mbakhonda vera matongero a MBUYA kuti aleke tsanzira penepi.

¹⁶Iwo adaswa mwambo onsene wa MBUYA Mulungu wawo, mbasasanya ana ng'ombe asimbi awiri kupipembedza; iwo adasasanya pontho dzimunthu wa milungu Ashera, adapembedza nyenyezi mbatumikira milungu Baala.

¹⁷Iwo adapereka anawo achikazi na achimuna ene kukhala nsembe zakupyerera kuna milungu; iwo adavunza nzeru kuna anyakukhumira na anyakuombedza, pontho adapipereka okha ene monsene mwene kuchita pinthu pyakudawika pamaso pa MBUYA, natenepo iwo adalamusa ukali wa MBUYA.

¹⁸MBUYA adazhangali nawo Aisraele mbaabulusa onsene pamaso pache mbasiya dzinza ya Yuda ene basi.

¹⁹Mbwenye podi na anthu a ku Yuda enembo hadavere mwambo wa MBUYA Mulungu wawo tayu. Iwo adatsanzira mitemo idatomesa Aisraele ile.

²⁰MBUYA adakhonda Aisraele onsene, iye adaatchunyusa mbaapereka m'manja mwa anyamalwawo avinga kufikirana onsene adaamaliratu kuabulusa pamaso pache.

²¹Pidalekanisa MBUYA Israele na Yuda, Aisraele adapitisa Yeroboamu mwana Nebati kukhala mfumu wawo. Yeroboamu adachitisa anthu ale kukhonda MBUYA, mbaabausa kuchita pyakudawa pyakugoswa.

²²Iwo adatewera Yeroboamu mbakakamira kuchita pyakudawa pyonsene pidachita iye,

²³kufikirana MBUYA adaamala onsene kuabulusa pamaso pache ninga montho mukhadaacheuza iye kudzera muna anyabasache onsene maprofeti kuti anapichita. Natenepo Aisraele adakwatwa ninga anyaperezo kwenda kudziko ya Asiria, kule kunakhala iwo na lero.

²⁴Mfumu wa Asiria adakwata anthu kubulukira kumizinda ya Babiloni, Kuta, Iva, Hamati na Sefaravaimu mbakaakhazika mumzinda wa Samaria kupita m'mbuto mwa Aisraele ale adakwatwa kwenda ku dziko ya Asiria ninga anyaperezo. Iwo adakwata mizinda yeneyi mbakhala mwenemo.

²⁵Pidatoma iwo kukhazikika mwenemo; iwo hadapembedze MBUYA tayu, natenepo iye adatumiza nkhalamu zile zidapha anango a iwo.

²⁶Mfumu wa Asiria adapangwa kuti anthu akhadakhazikisa iye m'mizinda ya Samaria ale, hadadziwe tayu mwambo wa Mulungu wa m'dzikomo, natenepo Mulunguyo atumiza nkhalamu mbazipha anthu mwenemo.

²⁷Natenepo mfumu adatonga mbati, “Bwezani kwawo mbodzi wa anyansembe adakwata ife ninga nyaperezo ule; mchitiseni[22] kubwerera kwawo kuti akakhale kweneko, towera akafunzise anthu mwambo wa Mulungu wa m'dzikomo.”

²⁸Natenepo nyansembe wa Chiisraele ule akhadakwatwa ninga nyaperezo kubulukira ku Samaria adenda mbakakhala ku Betele mbakafunzisa anthu mule mudakwanisira iwo kupembedza MBUYA.

²⁹Mbwenye madzinza akhadakhazikika mu Samaria ale, adathimiza kusasanya mifanikizo ya milungu yawo mbaiikha pambuto zakupembedzerapo milungu zikhadamanga Aisraele zile. Gulu yonsene idapisasanyira mifanikizo yawo ene m'mizinda mukhakhala iwomo.

³⁰Anthu a ku Babiloni adasasanya mifanikizo ya Sukoti Benoti, milungu yawo; anthu a ku Kuta adasasanya mifanikizo ya Nerigali, milungu yawo; anthu a ku Hamati adasasanya mifanikizo ya Ashima, milungu yawo;

³¹anthu a ku Iva adasasanya mifanikizo Nibihazi na Taritaki, milungu yawo; anthu a ku Sefaravaimu akhapereka anawo ninga nsembe yakupyerera kuna Adrameleki na Anameleki, milungu yawo.

³²Anthu enewa pontho adapembedza MBUYA mbasankhula anthu akusiyana-siyana pakati pa anthu awo kutumikira ninga anyansembe pambuto zakupembedzerapo milungu mbapereka nsembe penepo m'mbuto mwawo.

³³Natenepo iwo akhapembedza MBUYA, kwache akhapembedza pontho milungu yawo ene malingana na mitemo ya m'dziko mukhadabulukira iwo.

³⁴Iwo nalero akuthimiza basi kuteweza mitemo yawo yakale. Iwo nkhabe pembedza MBUYA tayu, penu kuvera matongero ache adapereka iye kuna pidzukulu pya Yakobo, adatchandula iye kukhala Israele ule.

³⁵MBUYA akhadachita chiverano na iwo pontho akhadatonga mbati, “Lekani pembedza milungu inango; lekani kuigodamira penu kuitumikira, penu kupereka nsembe kuna iyo.

³⁶Imwe mwathema kundivera ine MBUYA, adakubulusani m'dziko ya Iguputo na mphamvu zikulu pontho na dzanjanga yamphamvu ule; imwe mwathema kundigodamira mbamupereka nsembe kuna ine.

³⁷Imwe mwathema ndzidzi onsene kuvera mwambo na matongero adakulemberani ine ale. Imwe mwathema nee pembedza milungu inango tayu,

³⁸pontho imwe mwathema nee kuduwalira chiverano chidasasanya ine na imwe chile tayu.

³⁹Imwe mwathema kundivera ine MBUYA Mulungu wanu, tenepo ine ndinakupulumusani m'manja mwa anyamalwanu.”

⁴⁰Mbwenye anthu enewa nkhabe kuva tayu, pontho akuthimiza kuteweza mitemo yawo yakale ile.

⁴¹Natenepo anthu enewa ambapembedza MBUYA, kwache ambapembedza pontho mifanikizo; na lero pidzukulu pyawo pimbathimiza kuchita chibodzi-bodzi.