Read cisena 2 MAFUMU 18 Bible Online

2 MAFUMU 18 - cisena bible

2 MAFUMU 18

¹Chaka chachitatu Hoshea mwana Ela mbali mfumu wa Israele, Hezekia mwana Ahazi adapita ufumu wa Yuda.

²Iye akhali na pyaka makumawiri na pishanu mbatonga mu Yerusalemu pyaka makumawiri na pifemba. Mache akhali Abia mwana wamkazi wa Zekaria.

³Iye adachita pyakulungama pamaso pa MBUYA ninga montho mudachitirambo Mfumu Davite kholo wache.

⁴Iye adavunga mbuto zakupembedzerapo milungu; adaswa piguwa pyonsene pyakupambulika mbagwanda adzimunthu onsene a milungu Ashera. Iye adazwanya-zwanya pontho nyoka yankuwa idasasanya Mose ikhachemerwa Nehushitani ile. Kufikirana ndzidzi wenewo Aisraele akhathimiza basi kufukiza pyakununkhira kulemedza nyokayo.

⁵Hezekia adanyindira MBUYA Mulungu wa Israele mwakuti Yuda akhali nkhabe mfumu unango wadidi ninga weneyu tayu, podi na pakutoma pene iye mbadzati, na pidafa iye pene, nkhabe.

⁶Iye akhali wakukhulupirika pyakwanga kuna MBUYA, pontho wakuvera MBUYA na kukoya mwadidi matongero adapereka MBUYA kuna Mose ale.

⁷Natenepo MBUYA akhali naye mwakuti pinthu pyache pyonsene pikhachita iye pikhamfambira mwadidi. Iye adapandukira mfumu wa Asiria mbakhonda kukhala pansi pa utongi wache.

⁸Iye adakunda Afilisti mbapokosera mbuto zikhakhala iwo kutomera kunsanja ya anyakulondali mpakana mumzinda ukululetu, kuthimizapo Gaza na nthemba zonsene zakuzungulira.

⁹Chaka chachinayi Hezekia mbali mfumu, chile chikhali chaka chachinomwe Hoshea mbali mfumu wa Israele, Shalimanesere mfumu wa Asiria adachita nkhondo na Israele mbazungulira Samaria.

¹⁰Chaka chachitatu cha nkhondo yeneyi Samaria adakundwa. Chenechi chikhali chaka chachitanthatu Hezekia mbali mfumu, pontho chikhali chaka chachifemba Hoshea mbali mfumu.

¹¹Mfumu wa Asiria adakwata Aisraele kwenda nawo ku Asiria ninga anyaperezo mbakhazika anango a iwo mumzinda wa Hala, anango chifupi na mkulo wa Habori m'nthemba ya Gozani, pontho anango m'mizinda ya Media.

¹²Samaria adakundwa thangwi Aisraele hadavere MBUYA Mulungu wawo tayu. Iwo adaswa chiverano chidachita iye nawo chile mbakhonda kuvera matongero onsene adapaswa iwo na Mose nyabasa wa MBUYA ule. Iwo hadaikhe konta penu kupivera tayu.

¹³Chaka chakhumi na chinayi Hezekia mbali mfumu wa Yuda, Senakeribu mfumu wa Asiria adasosa mizinda yakutchingwa na mpanda ya Yuda mbaipokosera.

¹⁴Hezekia adatumiza mphangwa kuna Senakeribu ule akhali ku Lakishi mbalonga mbati, “Ndatchunyuka pontho ndaphata miyendo, lekani kundimenya; ine ndinati ndikupagalini chonsene chinalonga imwecho.” Kutawira kwa mfumu wa Asiria kukhali kwakuti Hezekia amtumizire siliva wakukwana makilogramu pikwi khumi na golidi wakukwana makilogramu chikwi chibodzi.

¹⁵Hezekia adamtumizira siliva wa m'Nyumba ya MBUYA na m'pyakukoyeramo mfuma m'nyumba yachifumu.

¹⁶Na ndzidzi onthowo Hezekia adakanandula golidi ule akhali pamsuwo wa Nyumba ya Mulungu na ule ene akhadaikha iye pamakhundu ache a msuwo mbatumiza pyonsenepi kuna Senakeribu.

¹⁷Kubuluka penepo mfumu wa Asiria adatuma anyankhondo azinji kubulukira ku Lakishi kwenda kamenyana na Hezekia mu Yerusalemu; gulu yeneyi ikhatsogolerwa na akadamu akulu-akulu atatu a mfumu. Pidafika iwo ku Yerusalemu, adaimira panjira yakwendera ku Munda wa Nyakufula nguwo, chifupi na mgelo wakudzesa madzi kubulukira kuthawale yakumtunda.

¹⁸Natenepo iwo adachemeresa Mfumu Hezekia, tenepo mathubu atatu a mfumu adenda kagumanikana nawo. Mathubu ache mbawa: Eliakimu mwana Hilikia, ule akhali nyakuyang'anira nyumba yachifumu; Shebina nyakulemba m'thando ya miseru; Yoa mwana Asafu, ule akhali nyakulemba pya m'dziko.

¹⁹Mbodzi wa mathubu a ku Asiria adaapanga kuti Mfumu Senakeribu akhafuna kudziwa thangwi ikhachitisa Hezekia kuwanga mtima.

²⁰Iye adalonga mbati, “Ayi imwe mukunyerezera kuti mafala okha basi anakwanisa kuphata basa m'mbuto mwa mphamvu na luso pya anyankhondo anu? Ayi mbani ananyerezera imwe kuti anakwanisa kukuphedzani kupandukira mfumu wa Asiria?

²¹Imwe mukunyindira Iguputo kukuphedzani, kwache penepyo pinakhala ninga kuphatisa basa phesi m'mbuto mwa mthondodzo; iyo inatchoka mbikutchonkhani m'manja. Mfumu wa Iguputo akhala ninga tenepo kuna munthu onsene anamnyindirayo.”

²²Thubu wa ku Asiria ule adathimiza kulonga mbati, “Ayi mukundipanga kuti ananyindira imwe ndi MBUYA Mulungu wanu? Iye ngule mbuto zache zakupembedzerapo na maguwache ansembe zidavungwa na Hezekia, pidapanga iye anthu a ku Yuda na Yerusalemu kupembedza paguwa yansembe mu Yerusalemu mwene basi.

²³Ndinachita namwe betchi na dzina ya mbuyanga, mfumu wa Asiria. Ine ndinakupasani akavalo pikwi piwiri, ngakhala munagumana amuna akukwana kuapakira!

²⁴Imwe munakwanisa tani kuimisana na mathubu a mfumu wa Asiria, podi na wamng'onoletu pakati pawo, podi kwene kuti mukunyindira basi kuti Aiguputo anakutumizirani pingolo na amuna akupakira akavalo?

²⁵Ayi mukunyerezera kuti ine ndasosa na kuvunga dziko yanu mwakukhonda phedzwa na MBUYA? MBUYA makayo ndiye andipanga kuti ndiisose na kuivunga.”

²⁶Tenepo Eliakimu, Shebina pontho Yoa adalonga kuna mkadamuyo mbati, “Taphata miyendo, longani pyanu m'Chiaramu, thangwi ife timbachiva. Lekani longa m'Chiheberi thangwi anthu onsene akhala m'mafufuwa akuvesera.”

²⁷Iye adatawira mbati, “Ayi mukunyerezera kuti mfumu wa ku Asiria andituma kulonga mphangwa kuna imwe na kuna mfumu yekha basi? Nkhabe, ine ndikulonga pontho kuna anthu akhala m'mafufuwa, ale athema kudya matubzi awo, pontho kumwa mitindo yawo ninga montho munafuna dzachitirambo imwepo.”

²⁸Tenepo thubu ule adaimira mbalonga m'Chiheberi mwakugaluza fala mbati, “Veserani kuno pinakupangani mfumu wa Asiria!

²⁹Iye akukucheuzani kuti muleke nyengezwa na Hezekia. Hezekia nkhabe kwanisa kukupulumusani tayu.

³⁰Pontho lekani kumtawira kukunyengererani kuti munyindire MBUYA. Lekani nyerezera kuti MBUYA anakupulumusani pontho kuti iye anakhondesa Asiria kupokosera mzindanu.

³¹Lekani vesera pinalonga Hezekia! Mfumu wa Asiria akukutongani kuti mubuluke mumzindamo mbamuimise manja. Tenepo monsene munatawiriswa kudya mfesa na makuyu a m'miti mwanu, pontho kumwa madzi a m'michera yanu ene

³²kufikirana mfumu akukhazikiseni m'dziko sasawa ninga yanuyi, kule kuna minda ya mfesa kuti ikupaseni vinyu, pontho kuna mapira kuti mukwanise kuphika mikate. Yeneyi ndi dziko ya mafuta aolivi na uchi. Ngakhala imwe munachita pinakutongani iye, imwe nee munafa tayu, mbwenye munakhala na moyo. Hezekia mbaleke kukunyengezani pakunyerezera kuti MBUYA anakupulumusani.

³³Ayi ilipo milungu ya anthu anango, ile idapulumusambo madziko awo m'manja mwa mfumu wa Asiria?

³⁴Chinchino ili kupi milungu ya Hamati na Aripadi? Ili kupi milungu ya Sefaravaimu? Ayi alipo unango adapulumusa Samaria?

³⁵Ndi lini milungu ya madziko onseneyi idatoma kupulumusa madziko awo kuna mfumu wa Asiria. Apo ninji chinakuchitisani kunyerezera kuti MBUYA anakwanisa kupulumusa Yerusalemu?”

³⁶Anthu adamatama ninga montho mukhadaapangira Mfumu Hezekia; iwo hadabuluse na fala ene tayu.

³⁷Tenepo Eliakimu, Shebina na Yoa adang'amba nguwo zawo thangwi ya kutsukwala mbaenda kapanga mfumu pikhadalonga thubu wa Asiria ule.