Read cisena 2 MAFUMU 2 Bible Online

2 MAFUMU 2 - cisena bible

2 MAFUMU 2

¹Pikhali MBUYA chifupi kukwata Elia kwenda kudzulu m'chivumbulu, Elia na Elisha akhali pa ulendo awo kubulukira ku Giligala.

²Elia adalonga kuna Elisha mbati, “Banga khala pano; MBUYA andituma ku Betele.” Mbwenye Elisha adatawira mbati, “Ndinadumbira pamaso pa MBUYA wamoyo na pamaso panu kuti ine nkhabe kukusiyani tayu.” Natenepo onsene uwiriawo adenda ku Betele.

³Gulu ya maprofeti a ku Betele adadza kuna Elisha mbamvunza mbati, “Ayi iwe ukupidziwa kuti MBUYA anati akukwatire mbuyako lero?” Elisha adatawira mbati, “Ande, ndikupidziwa, kwache lekani longa pya penepi.”

⁴Kubuluka penepo Elia adalonga kuna Elisha mbati, “Banga khala pano; MBUYA andituma ku Yeriko.” Elisha adatawira mbati, “Ndinadumbira pamaso pa MBUYA wamoyo na pamaso panu kuti ine nkhabe kukusiyani tayu.” Natenepo onsene uwiriawo adenda ku Yeriko.

⁵Gulu ya maprofeti a ku Yeriko adadza kuna Elisha mbalonga mbati, “Ayi iwe ukupidziwa kuti MBUYA anati akukwatire mbuyako lero?” Iye adatawira mbati, “Ande, ndikupidziwa, kwache lekani longa pya penepi.”

⁶Kubuluka penepo Elia adalonga kuna Elisha mbati, “Banga khala pano; MBUYA andituma kumkulo wa Yorodani.” Elisha adatawira mbati, “Ndinadumbira pamaso pa MBUYA wamoyo na pamaso panu kuti ine nkhabe kukusiyani tayu.” Natenepo onsene uwiriawo adathimiza kwenda.

⁷Amuna makumashanu a m'gulu ya maprofeti adenda mbakaimira patali pang'ono kuyang'ana pakhadaimira Elia na Elisha pa Yorodani.

⁸Elia adakwata chakufinika chache, kuchifunya-funya mbamenya nacho madzi ale. Madzi adagawanikana pakati, anango kumadyo anangombo kumabzere. Tenepo uwiriawo adawambuka na pakuuma.

⁹Pikhadawambuka iwo, Elia adalonga kuna Elisha mbati, “Ngandipange chinafuna iwe kuti ndikuchitire mbindidzati buluswa pamaso pako?” Elisha adatawira mbati, “Ndipaseni kawiri khundu ya mzimu wanu.”[3]

¹⁰Elia adalonga mbati, “Wapempha chinthu chakunensa pyakwanga, kwache ngakhala iwe unandiyang'ana pinabuluswa ine pamaso pako, unakhala wako; mbwenye bibibi hunautambira tayu.”

¹¹Pikhafamba iwo uku akulongesana, vumbu-vumbu chingolo cha moto na akavalo a moto pidaonekera mbapilekanisa awiri ale, tenepo Elia adakwatwa kwenda kudzulu m'chivumbulu.

¹²Pidaona Elisha penepi adakhuwa mbati, “Baba, Baba! Nyakutchinjiriza wamphamvu wa Israele! Mwaenda!”[4] Tenepo Elisha hadamuoneve tayu Elia. Penepo iye adang'amba chakufinika chache chile m'mapindi mawiri kuonesa kutsukwala kwache.

¹³Kubuluka penepo Elisha adalokota chakufinika chidagwa kubulukira pana Elia chile mbabwerera m'nduli, tenepo adenda mbakaimira m'khundu-khundu mwa mkulo wa Yorodani.

¹⁴Tenepo iye adakwata chakufinika chidagwa kubulukira pana Elia chile mbamenya nacho madzi. Iye adavunza mbati, “Ali kupi mphapo MBUYA Mulungu wa Elia?” Pidamenya iye madzi ale, madzi adagawikana, anango kumadyo anangombo kumabzere, iye mbawambuka.

¹⁵Pidamuona gulu ya maprofeti a ku Yeriko ale, adalonga mbati, “Mzimu wa Elia waphama pana Elisha.” Tenepo iwo adenda kagumanikana naye mbalamba pamaso pache.

¹⁶Iwo adalonga mbati, “Ngayang'anani ife tina amuna makumashanu. Atawiriseni kwenda kasaka-saka mbuyanu, thangwi mwinango Mzimu wa MBUYA wamthukula mbumgwisa m'mapiri penu m'maphedi.” Elisha adatawira mbati, “Nkhabe, lekani kuatuma.”

¹⁷Mbwenye iwo adakakamira basi kufikirana Elisha adachita manyadzo kuti athimize kuakhondera. Natenepo iye adalonga mbati, “Atumeni.” Iwo adaatumadi amuna makumashanu ale, mbasaka-saka nsiku zitatu, mbwenye hadamgumane tayu.

¹⁸Pidabwerera iwo kuna Elisha, ule akhakhala mu Yeriko, iye adalonga kuna iwo mbati, “Ayi ine sidakupangeni tayu kuti muleke kwenda?”

¹⁹Amuna a mumzinda mule adalonga kuna Elisha mbati, “Ngayang'anani, mbuya, luwani ino njadidi pyakwanga ninga munaionera imwemu, mbwenye madzi ache ngakuipa pontho matakache ngakukhonda balisa pinthu.”

²⁰Iye adalonga mbati, “Ndikwatireni ndilo yachinchino pontho muikhemo munyu.” Tenepo iwo adadza napyo kuna iye.

²¹Kubuluka penepo iye adenda pakhali mphuno ya madzi pale mbaponyapo munyu ule, tenepo adalonga mbati, “Pyalonga MBUYA mphipi: Ine ndachitisa madziwa kukhala adidi, pontho nkhabeve dzachitisa anthu kufa penu mataka kukhala okhonda balisa pinthu tayu.”

²²Madziwo na lero ngadidi malingana na mafala adalonga Elisha ale.

²³Kubuluka kweneko Elisha adenda ku Betele. Pikhafamba iye m'njira, aphale anango adabuluka muluwani mule mbamsingirira Elisha. Iwo adalonga mbati, “Ndoko nyamphanjawe!”

²⁴Elisha adazungunuka kuyang'ana pana iwo mbaatemberera na dzina ya MBUYA. Natenepo matika mawiri adabuluka mumsitu mbanyedza-nyedza aphale makumanayi na awiri ale.

²⁵Tenepo iye adenda kuphiri ya Karimele. Kubuluka kweneko adabwerera ku Samaria.