Read cisena 2 MAFUMU 20 Bible Online

2 MAFUMU 20 - cisena bible

2 MAFUMU 20

¹Pandzidzi wenewo Mfumu Hezekia adadwala mbasala nenene kufa. Mprofeti Yesaya mwana Amozi adenda kamuona mbalonga mbati, “MBUYA akukupangani kuti mwathema kusasanyiratu pinthu pyonsene mwadidi, thangwi nee munawanga tayu, munati mufe.”

²Hezekia adazungunukira kufufu mbapemphera mbati,

³“Kumbukani MBUYA kuti ine ndidakutumikirani mwakukhulupirika, pontho na mtima onsene, pontho ndzidzi onsene ndayesa-yesa kuchita pinthu pinafuna imwe.” Natenepo iye adatoma kulira mwakusisima.

⁴Yesaya adabuluka pamaso pa mfumu, tenepo iye mbadzati gwanda chintalo cha nyumba yachifumu ile, MBUYA adampanga

⁵kuti abwerere kuna Hezekia mtongi wa anthu a MBUYA mbakalonga kuna iye kuti, “Ine MBUYA wa kholoako Davite ndava kupemphera kwako pontho ndaona misozi yako. Ndinati ndikuwangise, tenepo pangagwanda nsiku zitatu unati uende ku Nyumba ya Mulungu.

⁶Ine ndinakutawirisa kuti uthimize kukhala na moyo pyaka pinango khumi na pishanu. Ine ndinapulumusa iwe na mzinda wa Yerusalemu m'manja mwa mfumu wa Asiria. Ndinatchinjiriza mzindawu, towera ine ndilemedzwe, pontho na thangwi ya kudumbira kudachita ine kuna nyabasanga Davite.”

⁷Yesaya adapanga anyabasa a mfumu kuti aikhe mtombwe wakusasanywa na makuyu pa anyakadumu, natenepo iye anawanga.

⁸Mfumu Hezekia adavunza mbati, “Apo chidzindikiro chache ntchanji chakutsikimizira kuti MBUYA anandiwangisa, pontho kuti pangagwanda nsiku zitatu ndinakwanisa kwenda ku Nyumba ya Mulungu?”

⁹Yesaya adatawira mbati, “MBUYA anakupasa chidzindikiro chakutsikimizira kuti anachita pyadumbira iye kuna imwe. Natenepo sankhula chinafuna iwe: mthunzi kwenda patsogolo mathanyo khumi penu kubwerera m'nduli mathanyo khumi.”

¹⁰Hezekia adatawira mbati, “Ntchinthu chokhonda nensa mthunzi kwenda m'tsogolo mathanyo khumi! Natenepo chitisani mthunzi kubwerera m'nduli mathanyo khumi.”

¹¹Yesaya adapemphera kuna MBUYA, tenepo MBUYA adachitisadi mthunzi kubwerera m'nduli mathanyo khumi pa nsikada zile zidasasanya Mfumu Ahazi.

¹²Pandzidzi ninga ontho-onthowo mfumu wa ku Babiloni, Merodaki-Baladani, mwana Baladani adava kuti Mfumu Hezekia akhadwala, natenepo adatumiza kalata na mtukwa kuna iye.

¹³Hezekia adatambira mwadidi anyamphangwa ale mbaaonesa mfumache yonsene; siliva na golidi pyakukomesera muliwo na mafuta akununkhira, pontho na pida pyache pyonsene pya nkhondo. Nkhabe na chibodzi chene m'masubi ache akukoyeramo pinthu penu konsene kwene muufumu mwache chidasiya iye okhonda kuaonesa tayu.

¹⁴Tenepo mprofeti Yesaya adenda kuna Mfumu Hezekia mbamvunza mbati, “Ayi amuna enewa abulukira kupi, pontho alonganji kuna imwe?” Hezekia adatawira mbati, “Iwo abulukira kudziko yakutali pyakwanga, ku Babiloni.”

¹⁵Yesaya adavunza mbati, “Ayi chaona iwo ninji m'nyumba yachifumu?” Hezekia adatawira mbati, “Iwo aona chinthu chonsene. Nkhabe na chibodzi chene m'masubi akukoyeramo pinthu chidasiya ine okhonda kuaonesa tayu.”

¹⁶Tenepo Yesaya adampanga mfumu mbati, “MBUYA Wamphamvu zonsene akulonga kuti

¹⁷ndzidzi unafika wakuti pyonsene pya m'nyumbanu yachifumu, pinthu pyonsene pyakoya makolo anu kufikirana lero, pinakwatwa kwenda kudziko ya Babiloni. Nkhabe na chibodzi chene chinasiyiwa tayu.

¹⁸Pinango pya pidzukulu pyanu chadi-chadi pinakwatwa mbapikakapalwi katumikira m'nyumba ya mfumu wa ku Babiloni.”

¹⁹Mfumu Hezekia adanyerezera pikulonga kuti pandzidzi wakukhala kwache na moyo panakhala mtendere na kutchinjirizwa mwadidi; natenepo iye adatawira kuti, “Mphangwa zandipanga imwe kubulukira kuna MBUYA nsadidi.”

²⁰Pinango pyonsene pidachitika Hezekia mbali mfumu, pyonsene pidachita iye mwakuwanga mtima, na mule mudakwanisira iye kusasanya thawale na mgelo wakudzesa madzi mumzindawo pyalembwa m'bukhu ya mbiri ya mafumu a Yuda.

²¹Hezekia adagonera mkono, tenepo Manase mwanache adapita ufumu m'mbuto mwache.