Read cisena 2 MAFUMU 23 Bible Online

2 MAFUMU 23 - cisena bible

2 MAFUMU 23

¹Mfumu Yosia adachemeresa akadamu onsene a mu Yuda na Yerusalemu,

²mbaenda onsene pabodzi pene ku Nyumba ya Mulungu mbatsagana na anyansembe, maprofeti na anthu onsene, anyakufuma na anyakutcherenga ene. Pamaso pa anthu onsene ale, mfumu adawerenga bukhu yonsene ya chiverano, ikhadagumanwa m'Nyumba ya Mulungu ile.

³Iye adaimira chifupi na mzati mbachita chiverano na MBUYA kuti anamvera, anateweza mwambo na matongero ache na mtimache onsene, na moyo wache onsene, pontho kuti anachita pinthu pinalongwa m'chiverano ninga mwalemberwa ipyo m'bukhumo. Natenepo anthu onsene adadumbira kukoya chiverano chenechi.

⁴Kubuluka penepo Yosia adapanga Nyansembe Wamkulu Hilikia, anyansembe anango akumphedzera na akulondali pamsuwo wa Nyumba ya Mulungu akhaphata basa pandzidzi wenewo ale kuti abuluse m'Nyumba ya MBUYA pinthu pyonsene pikhaphatiswa basa kupembedzera napyo milungu Baala, Ashera na nyenyezi. Mfumu adapipisa pyonsene pile kunja kwa Yerusalemu m'phedi ya Kidroni mbakwata dothache kwenda nayo ku Betele.

⁵Iye adabulusa anyansembe anango pabasa, ale akhadadzozwa na mafumu a Yuda kuti apereke nsembe pambuto zakupembedzerapo milungu m'mizinda ya Yuda na mbuto za chifupi na Yerusalemu, anyansembe onsene ale adapereka nsembe kuna Baala, dzuwa, mwezi, thambo na nyenyezi.

⁶Iye adabulusa m'Nyumba ya MBUYA dzimunthu wa milungu Ashera kwenda nawo kunja kwa mzinda kuphedi ya Kidroni. Kweneko iye adaupisa mbaupeya kuti usanduke dotha mbakawaza dothayo kumasiye a mwinji.

⁷Iye adavunga nyumba zikhakhala maputa achimuna na achikazi ene za ku Nyumba ya MBUYA.[23] Mwenemo ndiye mukhaluka akazi mikhanjo yakuphatiswa basa pakupembedza Ashera.

⁸Iye adadza ku Yerusalemu na anyansembe onsene, ale akhali m'mizinda ya Yuda mbavunga mbuto zakupembedzerapo milungu pakhapereka iwo nsembe pale kubulukira ku Geba mpakana ku Beeresheba. Iye adagomola pontho mbuto zakupembedzerapo milungu chifupi na msuwo wa mpanda udamanga Yoswa mkulu wa mumzindamo, ule ukhali kukhundu yakumabzere kwa msuwo ukulu wakupitira mumzindamo.

⁹Anyansembe enewa hadatawiriswe tayu kutumikira m'Nyumba ya MBUYA, mbwenye adakwanisa kudya mikate yakusowa chakufufumisira, ile ikhaperekwa kuna anyansembe anzawo.

¹⁰Mfumu Yosia adavunga pontho Tofeti mbuto yakupembedzerapo milungu inango m'phedi ya Beni-Hinomu, towera paleke khala munthu na mbodzi ene wakupereka mwanache wamamuna penu wachikazi ninga nsembe yakupyerera kuna milungu Moleki.

¹¹Iye adabulusa pontho akavalo ale akhadapambulwa na mafumu a Yuda pa chipembedzo cha dzuwa, mbapisa pingolo pile pikhaphatisa iwo basa pa chipembedzochi. Penepi pidakoyiwa chifupi na msuwo wa Nyumba ya Mulungu chifupi na nyumba ikhakhala Natani-Meleki thubu wamkulu.

¹²Maguwa ansembe akhadamanga mafumu a Yuda pansoyi pa nyumba ya chifumu chifupi na subi ya Ahazi. Mfumu Yosia adagwisa pabodzi pene na maguwa ansembe adaikha Mfumu Manase mupintalo piwiri pya Nyumba ya MBUYA. Iye adamala kuswa maguwa onsene mbakhala mapindi-mapindi pontho mbapiponya m'phedi ya Kidroni.

¹³Yosia adavunga mbuto zakupembedzerapo milungu adamanga Mfumu Solomoni kumabulukiro dzuwa a Yerusalemu kumwera kwa Phiri ya Olivi,[24] ale akhaphatiswa basa kupembedza milungu inango yakuchitisa manyadzo ninga Asitarite, milungu ya Asidoni, Kemoshi, milungu ya Amoabu, na Moleki, milungu ya Aamoni.

¹⁴Mfumu Yosia adagomola piguwa pyakupambulika mbagwisa adzimunthu onsene a milungu Ashera, pontho pambuto pakhadaimira iwo akhadamala kupadzaza na magogodo a anthu.

¹⁵Yosia adagwisa pontho guwa pambuto yakupembedzerapo m'Betele, ile ikhadamangwa na Mfumu Yeroboamu mwana Nebati, ule adachitisa Aisraele kudawa. Yosia adagwisa guwa yansembe mbaswa miyala yache mapindi-mapindi[25] mbaipeya kusanduka fumbi; iye adapisa pontho dzimunthu wa milungu Ashera.

¹⁶Kubuluka penepo Yosia adayang'ana-yang'ana mbaona nthumbi zinango paphiri pale. Iye adabulusamo magogodo onsene mbakaapisa paguwa yansembe. Na njira yeneyi iye adalulupisa guwa yansembe kuchitisa pinthu pidalongwa kale ene kukwana-kwana pandzidzi wa phwando pikhadaimira Mfumu Yeroboamu chifupi na guwa yansembe. Mfumu Yosia adayang'ana-yang'ana mbaona nthumbi ya munthu wa Mulungu,[26] ule akhadalonga pya penepi.

¹⁷Mfumu adavunza mbati, “Nthumbi ile nja ani?” Anthu a ku Betele adatawira mbati, “Ndi nthumbi ya munthu wa Mulungu ule akhadabulukira ku Yuda mbalonga pya pinthu pyachita imwe leropi kuna guwa yansembeyi.”

¹⁸Yosia adalonga mbati, “Ilekeni tenepo; magogodo ache mbaleke buluswamo.” Natenepo magogodo ache na magogodo a mprofeti akhadabulukira ku Samaria ule hadabuluswemo tayu.

¹⁹M'mizinda yonsene ya Israele Mfumu Yosia adavunga nyumba zonsene za pambuto zakupembedzerapo milungu, zile zikhadamangwa na mafumu a Israele, ale pakuchita tenepo adalamusa ukali wa MBUYA. Iye adachita chibodzi-bodzi ninga mudapichitira iye m'Betele.

²⁰Iye adapha anyansembe onsene pamaguwa ansembe pambuto zakupembedzerapo milungu pakhaphata iwo basa pale mbapisa magogodo a anthu pamaguwa enewa. Kubuluka penepo adabwerera ku Yerusalemu.

²¹Mfumu Yosia adatonga anthu kusekera Phwando ya Paska kulemedza nayo MBUYA Mulungu wawo ninga mwalemberwa ipyo m'bukhu ya chiverano.

²²Chipo nkhabe mfumu na mbodzi ene wa Israele penu wa Yuda adzati chita phwando ya Paska ninga yeneyi tayu kutomera pandzidzi wa Atongi mpakana ndzidzi wa mafumu a Israele na Yuda.

²³Pakumalisira pache chaka chakhumi na chisere cha ufumu wa Yosia, phwando ya Paska idachitika mu Yerusalemu.

²⁴Na thangwi ya kufuna kuvera mwambo, ule udalembwa m'bukhu idagumana Nyansembe Wamkulu Hilikia m'nyumba ya Mulungu ile, Mfumu Yosia adabulusa mu Yerusalemu na mu Yuda monsene anyakukhumira na anyakuombedza onsene na milungu pontho mifanikizo yonsene ya m'nyumba na pinango pyonsene pimbanyansira Mulungu.

²⁵Chipo nee padzati khala mfumu ninga weneyu tayu, ule adatumikira MBUYA na mtimache onsene, nzeru zache zonsene pontho na mphamvu zache zonsene, kuvera mwambo onsene wa Mose; podi na pidafa iye pene pakhali nkhabe pontho mfumu unango ninga iye.

²⁶Mbwenye ukali wakugoswa wa MBUYA ukhadalamukira Yuda thangwi ya pinthu pidachita Manase, podi na lero udzati mbombowa tayu.

²⁷MBUYA adalonga mbati, “Ndinati ndichite kuna Yuda pinthu pidachita ine kuna Israele. Ndinati ndiamaliretu anthu a ku Yuda mwakuti iwo nkhabe dzaoneka pontho pamaso panga tayu. Ine ndinakhonda Yerusalemu, mzinda udasankhula ine ule, pontho na nyumbanga, mbuto ile idalonga ine kuti ndathema kupembedzwamo.”

²⁸Pinango pyonsene pidachitika Yosia mbali mfumu wa Yuda na pyonsene pidachita iye pyalembwa m'bukhu ya mbiri ya mafumu a Yuda.

²⁹Pikhali Yosia mfumu, Neko mfumu wa Iguputo adadza na anyankhondo ache kumkulo wa Yufurate kudzaphedza mfumu wa Asiria. Mfumu Yosia adenda kuti akamenyane na Neko, mfumu wa ku Iguputo, pa Megido tenepo iye adampha ponthopo.

³⁰Mathubu ache adakwata mtembo wache ule mbauikha m'chingolo, kubwerera nawo kwenda ku Yerusalemu kule kudaikhwa iye m'masiye achifumu. Anthu a ku Yuda adasankhula Yoahazi mwana Yosia mbamdzoza kukhala mfumu.

³¹Yoahazi akhali na pyaka makumawiri na pitatu pidapita iye ufumu wa Yuda. Tenepo iye adatonga mu Yerusalemu miyezi mitatu. Mache akhali Hamutala mwana wamkazi wa Yeremia wa kumzinda wa Libina.

³²Iye adachita pyakuipa pamaso pa MBUYA pakuteweza pikhachita makolo ache.

³³Ufumu wache udamala pandzidzi udakwatwa iye ninga nyaperezo na Neko mfumu wa Iguputo kwenda ku Ribila m'dziko ya Hamati mbachitisa Yuda kupagali siliva wakukwana makilogramu pikwi pitatu na madzana manayi pontho na golidi wakukwana makilogramu makumatatu na manayi kukhala ninga msonkho.

³⁴Mfumu Neko adaikha Eliakimu mwana Yosia kupita ufumu wa Yuda m'mbuto mwa Yosia mbamtchandula dzinache Yehoiakimu. Yehoahazi adakwatwa na Mfumu Neko kwenda ku Iguputo. Iye adafera konthoko.

³⁵Mfumu Yehoiakimu adakhomesa anthu msonkho malingana na mfuma ikhali na iwoyo, towera akwanise kupereka kuna mfumu wa ku Iguputo kobiri zidatonga iye kumpasa.

³⁶Yehoiakimu akhali na pyaka makumawiri na pishanu pidapita iye ufumu wa Yuda mbatonga mu Yerusalemu pyaka khumi na chibodzi. Mache akhali Zebida mwana wamkazi wa Pedaia wa kuluwani ya Ruma.

³⁷Yehoiakimu adachita pyakuipa pamaso pa MBUYA pakuteweza pikhachita makolo ache.