Read cisena 2 MAFUMU 24 Bible Online

2 MAFUMU 24 - cisena bible

2 MAFUMU 24

¹Pikhali Yehoiakimu mfumu wa Yuda, Mfumu Nebukadinezara wa ku Babiloni adenda ku Yuda kachita nkhondo, tenepo pyaka pitatu Yehoiakimu adakhakhamizwa kukhala pansi pa utongi wa Nebukadinezara; kubuluka penepo iye adampandukira.

²MBUYA adatuma magulu a anyankhondo a ku Babiloni, Aramu, Moabu na Amoni kudzamenyana na Yehoiakimu kuvunga Yuda ninga montho mukhadalongera MBUYA kudzera muna maprofeti ache.

³Penepi pidachitika thangwi MBUYA adatonga kuti pikhale tenepo, towera Yuda amaliretu mbaleke onekave, thangwi pyakudawa pyonsene pidachita Mfumu Manase,

⁴pontho maka-maka thangwi ya anthu okhonda dawa adapha iye ale. MBUYA nee mbadalekerera Manase tayu thangwi ya kudawa kweneku.

⁵Pinango pyonsene pidachitika Yehoiakimu mbali mfumu na pyonsene pidachita iye pyalembwa m'bukhu ya mbiri ya mafumu a Yuda.

⁶Yehoiakimu adagonera mkono, tenepo Yehoiakini mwanache adapita ufumu m'mbuto mwache.

⁷Mfumu wa Iguputo na anyankhondo ache hakhabulukave tayu kunja kwa Iguputo kamenya nkhondo tayu, thangwi mfumu wa ku Babiloni ndzidzi wenewu ndiye akhatonga nthemba zonsene zile zikhali za Iguputo, kutomera kumkulo wa Yufurate mpakana kumadire kumpoto kwa Iguputo.

⁸Yehoiakini akhali na pyaka khumi na pisere pyakubalwa pikhapita iye ufumu wa Yuda mbatonga mu Yerusalemu miyezi mitatu. Mache akhali Nehushita mwana wamkazi wa Elinatani wa ku Yerusalemu.

⁹Yehoiakini adachita pyakuipa pamaso pa MBUYA pakuteweza pinthu pikhachita babache.

¹⁰Ukhali ndzidzi wakutonga kwache ule udadza anyankhondo a ku Babiloni pakuchita kutongwa na mathubu a Mfumu Nebukadinezara kakuzungulira Yerusalemu.

¹¹Pandzidzi ukhazungulira iwo mzindawo, Nebukadinezara mwenechiroache ndiye adadza ku Yerusalemu,

¹²tenepo Mfumu Yehoiakini pabodzi pene na mache, anache, akadamu ache, pontho na mathubu a kunyumba yachifumu adaimisa manja kuna anthu a ku Babiloni. Chaka chachisere Nebukadinezara mbali mfumu adakwata Yehoiakini kukhala nyaperezo

¹³mbapokosera pyonsene pya m'Nyumba ya MBUYA na pya m'nyumba yachifumu kwenda napyo ku Babiloni. Ninga mudalongera MBUYA, Nebukadinezara adaswa pyombo pyonsene pyagolidi pidasasanya Mfumu Solomoni kuti piphatiswe basa m'Nyumba ya MBUYA.

¹⁴Mfumu Nebukadinezara adakwata anthu a mu Yerusalemu ninga anyaperezo, ana onsene a m'banja yachifumu, na anthu onsene akuveka mwenemo, onsene pabodzi pene akhalipo pikwi khumi. Iye adakwata anyaluso onsene pamabasa akusiyana-siyana pabodzi pene na amisiri akufula siliva mbasiya kwene anthu akutcherenga okha basi mu Yuda.

¹⁵Nebukadinezara adakwata Yehoiakini kwenda naye ku Babiloni ninga nyaperezo pabodzi pene na mache, akazache, mathubu ache na amunache onsene akuveka a mu Yuda.

¹⁶Nebukadinezara adakwata amuna akuveka kwenda nawo ku Babiloni, onsene pabodzi pene akhalipo pikwi pinomwe, pontho na anyaluso chikwi chibodzi pabasa yakusiyana-siyana kuthimizapo amisiri akufula siliva. Onsenewa akhali amuna akujintcha akuthema kuphata basa ya nkhondo.

¹⁷Nebukadinezara adachitisa mbuyache Yehoiakini, Matania, kukhala mfumu wa Yuda mbamtchandula dzina kukhala Zedekia.

¹⁸Zedekia akhali na pyaka makumawiri na chibodzi pikhapita iye ufumu wa Yuda mbatonga mu Yerusalemu pyaka khumi na chibodzi. Mache akhali Hamutala mwana Yeremia wa kumzinda wa Libina.

¹⁹Mfumu Zedekia adachita pyakuipa pamaso pa MBUYA ninga montho mudachitira Mfumu Yehoiakimu.

²⁰MBUYA adazhangalira pyakwanga anthu a ku Yerusalemu na Yuda mwakuti adaabulusa pamaso pache.