Read cisena 2 MAFUMU 25 Bible Online

2 MAFUMU 25 - cisena bible

2 MAFUMU 25

¹Zedekia adapandukira Mfumu Nebukadinezara wa ku Babiloni. Natenepo Nebukadinezara adadza pabodzi pene na anyankhondo ache onsene dzachita nkhondo na Yerusalemu pansiku yachikhumi ya mwezi wakhumi wa chaka chachifemba Zedekia mbali mfumu. Iwo adamanga misasa kuzungulira mzinda mbasasanya pyakugomolera mpanda.

²Mzindawo udazungulirwa na anyankhondo mpakana chaka chakhumi na chibodzi Zedekia mbali mfumu.

³Pansiku yachifemba ya mwezi wachinayi wa chaka chonthocho, pidakaka njala mwakuti anthu adasowaletu chakuti adye,

⁴mafufu a mpanda adaswiwa. Podi kwene kuti Ababiloni akhazungulira mzindawo, anyankhondo onsene adamala thawa mumzindamo na mosiku. Iwo adathawa na njira ya kumunda wachifumu mbapita na pamsuwo wa pakati pa mafufu mawiri, kuthawira kuphedi ya Yorodani.

⁵Kwache anyankhondo a ku Babiloni adathamangisa mfumu Zedekia mbamphatira m'phedi chifupi na Yeriko. Tenepo anyankhondo ache onsene adamala thawa mbamsiya yekha.

⁶Zedekia adaphatwa mbaendeswa kuna Mfumu Nebukadinezara, ule akhali mumzinda wa Ribila, natenepo kweneko Nebukadinezara adamtonga mseru.

⁷Ana a Zedekia adaphiwa uku Zedekia akuona na maso ache; kubuluka penepo Zedekia adakonombolwa maso mbammanga na njema kwenda naye ku Babiloni.

⁸Pansiku yachinomwe ya mwezi wachishanu wa chaka chakhumi na chifemba Nebukadinezara mbali mfumu wa ku Babiloni, Nebuzaradani phungu wa mfumu pontho mkadamu wa anyankhondo, adapita mu Yerusalemu.

⁹Iye adapisa moto Nyumba ya Mulungu, nyumba yachifumu na nyumba za anthu onsene akufunika mu Yerusalemu.

¹⁰Tenepo anyankhondo ache adagomola mpanda wa Yerusalemu.

¹¹Kubuluka penepo Nebuzaradani adakwata anthu adasalira mumzindamo ale, amuna aluso pamabasa akusiyana-siyana, pontho na ale akhadapipereka okha ene kuna mfumu wa ku Babiloni kwenda nawo ninga anyaperezo ku Babiloni.

¹²Mbwenye mu Yuda adasiyamo kwene anyakutcherengaletu, ale akhali nkhabe na chinthu chene tayu kuti aphate basa m'minda yamfesa na minda inango.

¹³Anthu a ku Babiloni adagomola m'mapindi-mapindi nsanamira ziwiri zankuwa na pigudumu pikhali m'Nyumba ya Mulungu pile, pabodzi pene na phiso ikulu yankuwa mbakwata nkuwa onsene kwenda nawo ku Babiloni.

¹⁴Iwo adakwata pontho mafosholo, pontho pyakuwolera dotha paguwa yansembe, pyakukwizira tsakala ya nyale, ndilo zakuchuchisiramo chiropa cha nsembe, ndilo zakufukizira pyakununkhira pontho na pyombo pinango pyonsene pyankuwa pyakuphatiswa basa m'Nyumba ya Mulungu.

¹⁵Mkadamu wa anyankhondo adakwata pyonsene pyakusasanywa na golidi penu siliva pabodzi pene na ndilo zing'ono-zing'ono pontho na piwaya pyakuphatisirwa basa kupalira makala a moto.

¹⁶Pinthu pyankuwa pidasasanya Mfumu Solomoni kuti pikhale m'Nyumba ya Mulungu: Nsanamira ziwiri, pigudumu na phiso ikulu, pikhali pyakulemera pyakwanga mwakuti kulemera kwapyo kukhali kokhonda dziwika.

¹⁷Nsanamira ziwirizo zikhali sasawa; ibodzi kulapha kwayo ikhali makhono masere pontho ikhali na mphanda yankuwa, kulapha kwayo khono ibodzi na kati ya khono. Kuzungulira mphanda yonsene pakhali mangalade ankuwa akuthemeserwa na pinango pyakuoneka ninga ntheme zankuwa.

¹⁸Kuthimiza penepo Nebuzaradani mkadamu wa anyankhondo adakwata Seraia Nyansembe Wamkulu, Zefania wachiwiri kwa Nyansembe Wamkulu, pontho na akulu-akulu akufunika atatu ku m'Nyumba ya Mulungu mbaenda nawo ninga anyaperezo.

¹⁹Kubulukira mumzindamo iye adakwata mkadamu wa anyankhondo ule, mapungu ashanu a mfumu akhadasalira mumzindamo ale, wachiwiri kwa mkadamu wa anyankhondo, ule akhayayang'anira mabukhu a nkhondo, pabodzi pene na amuna anango makumatanthatu akufunika.

²⁰Nebuzaradani adaakwata kwenda nawo kuna mfumu wa ku Babiloni, ule ndzidzi wenewu akhali mumzinda wa Ribila

²¹m'nthemba ya Hamati. Kweneko mfumu adatonga kuti anthu ale amenywe mbaphiwa. Natenepo anthu a ku Yuda adakwatwa m'dziko mwawo kwenda kudziko ya unyaperezo.

²²Mfumu Nebukadinezara wa ku Babiloni adaikha Gedalia mwana Ahikamu mdzukuluache Shafani kukhala mkulu wa boma ya Yuda kuyang'anira anthu adasiya iye mu Yuda ale.

²³Pidava akadamu na anyankhondo a ku Yuda akhadathawa ale pya penepi, iwo adadza kuna Gedalia pa Mizipa. Akadamu enewa akhali Ishimaele mwana Netania, Yohanani mwana Karea, Seraia mwana Tanihumeti wa kuluwani ya Netofa na Yaazania mwana wa Maakati.

²⁴Gedalia adaatsikimizira mbati, “Lekani gopa kutumikira anthu a ku Babiloni. Khazikikani m'dzikomu mbamutumikire mfumu wa ku Babiloni, tenepo pinthu pyanu pyonsene pinakufambirani mwadidi.”

²⁵Mbwenye mwezi wachinomwe wa chaka chenecho, Ishimaele mwana Netania, mdzukuluache Elishama wa banja yachifumu, adenda ku Mizipa pabodzi pene na amuna khumi kasosa Gedalia mbampha. Iye adapha pontho Aisraele na anthu a ku Babiloni akhali pabodzi na iye ale.

²⁶Kubuluka penepo Aisraele onsene, mkulu mpakana mwana, na akadamu a nkhondo adathawira ku Iguputo, thangwi akhagopa anthu a ku Babiloni.

²⁷Chaka chidapita Evili-Merodaki ufumu wa Babiloni adakomera mtima Mfumu Yehoiakini wa ku Yuda mbambulusa m'perezo. Penepi pidachitika pansiku yamakumawiri na chishanu ya mwezi wakhumi na chiwiri wa chaka chamakumatatu na chinomwe pidakwatwa Yehoiakini ninga nyaperezo.

²⁸Evili-Merodaki adamkomera mtima pyakwanga mbampasa chidzo chikulu chene kupiringana mafumu anzache akhadaphatwa pabodzi na iye kwenda ku Babiloni ninga anyaperezo ale.

²⁹Natenepo Yehoiakini akhatawiriswa kudula nguwo zache za unyaperezo kuvala zinango zene, pontho kudya pathebulu pa mfumu moyo wache onsene.

³⁰Nsiku na nsiku moyo wache onsene, iye akhapaswa na mfumu wa ku Babiloni pikhasowa iye mpakana nsiku idafa iye.