Read cisena 2 MAFUMU 3 Bible Online

2 MAFUMU 3 - cisena bible

2 MAFUMU 3

¹Yoramu mwana Ahabu adapita ufumu wa Israele chaka chakhumi na chisere Yehosafati mbali mfumu wa Yuda mbakhala mu Samaria. Tenepo Yoramu adatonga pyaka khumi na piwiri.

²Iye adachita pyakuipa pamaso pa MBUYA, kwache nee pidapiringana pile pikhadachita babache na mache tayu. Iye adabulusa guwa yakupambulika ya milungu Baala ikhadasasanya babache ile.

³Kwache iye adakakamira kuchita pyakudawa ninga pikhachita Yeroboamu mwana Nebati, pile pidachitisa Aisraele kuchita pyakudawa. Iye hadaleke kuchita pinthu penepi tayu.

⁴Mesha mfumu wa Moabu akhafuya mabira. Tenepo iye akhapereka msonkho chaka na chaka kuna mfumu wa Israele anabira pikwi dzana ibodzi na ubweya wa mabira amuna pikwi dzana ibodzi.

⁵Mbwenye pidafa Ahabu mfumu wa Israele, mfumu wa Moabu adapandukira mfumu wa Israele.

⁶Natenepo pandzidzi wenewo Mfumu Yoramu adabuluka ku Samaria mbagumanyisa Aisraele onsene.

⁷Iye adatumiza mphangwa kuna Yehosafati mfumu wa Yuda mbati, “Mfumu wa Moabu andipandukira, ayi munakwanisa kundiphedzambo kumenyana na Amoabu?” Iye adatawira mbati, “Ande, ndinati ndiende nawe, ine ndiye iwe, anthu anga mbanthu ako; akavalo anga mbakavalo ako.”

⁸Iye adavunza mbati, “Njirache inafuna kaasosa na ife njipi?” Yoramu adatawira mbati, “Tinapita na m'thando yatchetcha ya Edomu.”

⁹Natenepo mfumu wa Israele adalamuka kwenda pabodzi pene na mfumu wa Yuda pontho mfumu wa Edomu. Pidamala iwo nsiku zinomwe akufamba pamulikiti, anyankhondo ale, madzi awo akumwa na akumwesa nyama zikhali na iwo zile akhadaamalira.

¹⁰Mfumu wa Israele adakhuwa mbati, “Ninji pontho! Ayi MBUYA atigumanyisa tonsenefe mafumu matatu towera atipereke m'manja mwa Amoabu?”

¹¹Mbwenye Yehosafati adavunza mbati, “Ayi kuno nkhabeko mprofeti wa MBUYA wakuti tinakwanisa kuvunza nzeru MBUYA kudzera muna iye.” Thubu wa mfumu wa Israele adatawira mbati, “Elisha mwana Shafati ali kuno, ule akhali mwanamuvi wa Elia.”

¹²Yehosafati adalonga mbati, “Mafala a MBUYA ali na iye.” Natenepo mfumu wa Israele, Yehosafati, na mfumu wa Edomu adenda kuna Elisha.

¹³Elisha adalonga kuna mfumu wa Israele mbati, “Thangwi yache ninji kuti ine ndikuphedzeni? Ndokoni kavunze nzeru kuna maprofeti a babanu na amanu.” Mfumu wa Israele adatawira mbati, “Nkhabe, tayu! Thangwi ndi MBUYA ule adatigumanyisa tonsenefe pabodzi, towera atipereke m'manja mwa Amoabu.”

¹⁴Elisha adatawira mbati, “Ndinadumbira pamaso pa MBUYA Wamphamvu zonsene wamoyo ambatumikira ine ule kuti mbapadakhala kuti ine nkhabe lemedza Yehosafati mfumu wa Yuda, ine nee mbidakuona kuti kwadza munthu penu kupiikha konta tayu.

¹⁵Mbwenye chinchino ndidzesereni nyakuimba nyakatangale.” Pikhaimba munthu ule nyakatangale, mphamvu za MBUYA zidagudumira Elisha,

¹⁶tenepo iye adalonga mbati, “MBUYA alonga kuti mukumbe madzenje m'phedi yonseneyi.

¹⁷Thangwi MBUYA alonga kuti imwe nkhabe dzaona nee mphepo penu mvula tayu, kwache phediyi inati idzale na madzi. Tenepo imwe na ng'ombe zanu na pifuyo pinango pina imwe munati mumwe madziwo.

¹⁸Penepi mphyakukhonda nensa pamaso pa MBUYA; iye anati apereke pontho Amoabu m'manja mwanu.

¹⁹Imwe munakunda mizinda yawo yonsene yakutchingwa na mpanda, pontho na maluwani awo akulu-akulu onsene. Imwe munagwanda miti yawo yonsene yadidi, munaphopha mphuno zawo zonsene za madzi mbamuvunga mindawo yonsene yadidi pakuiphopha na miyala.”

²⁰Mangwana mwache na machibese pandzidzi wakupereka nsembe, madzi adadza kubulukira kukhundu ya Edomu. Tenepo mbuto yonsene idadzala na madzi.

²¹Kubuluka penepo Amoabu onsene adava kuti mafumu akubwera dzachita nawo nkhondo; mamuna onsene, mkulu penu mwana, wakukwanisa kuphata chida cha nkhondo adachemereswa mbakagumanyikana m'madire.

²²Mangwana mwache na machibese pidalamuka iwo, dzuwa ikhayetimira m'madzi mule, tenepo kuna Amoabu madzi ale akhaoneka akufira ninga chiropa.

²³Iwo adalonga mbati, “Ngayang'anani chenechi ntchiropa basi! Mafumu ale amenyana na kuphana pyawo okhokha. Tendeni, Amoabu, tikaapokesere pinthu pyawo.”

²⁴Mbwenye pidafika Amoabu pamsasa wa Aisraele, Aisraele adalamuka mbaakhamwadza kufikirana iwo adamala thawa. Tenepo Aisraele adapita m'dziko mwawo mbaphamo Amoabu.

²⁵Iwo adavunga mizinda, pontho munthu onsene adaponya mwala pamunda onsene wadidi kufikirana minda yonsene idaphophwa na miyala. Iwo adaphopha mphuno za madzi mbagwanda miti yonsene yadidi. Mzinda wa Kiri-Hareseti okha ndiye ukhadasalira pabodzi pene na miyalache m'mbuto mwache, kwache amuna akukhala na mbemba adauzungulira mbauvunga.

²⁶Pidaona mfumu wa Moabu kuti iye akhakundwa pankhondo ile, adakwata amuna madzana manomwe akukhala na matalasada kwenda kuna mfumu wa Aramu,[5] mbwenye adachimwana.

²⁷Kubuluka penepo iye adakwata mwanache wautombo akhafuna dzapita ufumu m'mbuto mwache ule, mbampereka nsembe pafufu ya mzinda kuna milungu ya Amoabu. Natenepo Aisraele adagoswerwa pyakwanga mbabwerera kubuluka mumzinda mule kwenda m'dziko mwawo.