Read cisena 2 MAFUMU 4 Bible Online

2 MAFUMU 4 - cisena bible

2 MAFUMU 4

¹Mamfelwa unango ule mamunache akhali mbodzi wa m'gulu ya maprofeti adalonga kuna Elisha mbati, “Mamunanga, nyabasanu, afa, pontho imwe mukupidziwa kuti iye akhali munthu wakugopa Mulungu. Mbwenye munthu adafiyali iye ule, akudza dzakwata ananga awiri achimunawa kukhala mabitchu ache kupagali mangawa ale.”

²Elisha adatawira mbati, “Unafuna ndikuchitirenji? Ngandipange m'nyumba mwako unanji?” Mkazi ule adatawira mbati, “Ine nkhabe chinthu na chibodzi chene tayu; china ine chene ndi mtete wa mafuta aolivi basi.”

³Elisha adalonga mbati, “Ndoko kuna atsanthembako onsene mbukapemphe mabuyawu akusowa pinthu, kwache ukapemphe azinji ene.

⁴Kubuluka penepo uende kapifungirika m'nyumba mwako iwe na anako achimunawo. Tenepo ukhuthulire mafuta m'mabuyawu onsenewo kubulukira mumtete. Sindzidzi buyawu nkhudzala uiikhe pakhundu.”

⁵Mkazi ule adenda mbakapifungira m'nyumba pabodzi pene na anache. Ana ale adadza na mabuyawo kuna mawo, tenepo iye adaikha mafuta m'mabuyawu.

⁶Pidadzala mabuyawu onsene ale, adalonga kuna mbodzi wa anache mbati, “Ngandipase buyawu inango.” Mwana ule adatawira mbati, “Nkhabe buyawu inango yasala tayu.” Na ndzidzi onthowo mafuta adaleka kubuluka mumtetemo.

⁷Kubuluka penepo mkazi ule adenda mbakampanga munthu wa Mulungu ule, tenepo iye adalonga kuna mkazi ule mbati, “Ndoko kagulise mafutawo mbukabwezere mangawa adakwata mamunako. Iwe na anako munakwanisa kuphatisa basa kobiri zakusalazo.”

⁸Nsiku inango Elisha adenda ku Shunemu. Kweneko kukhali mkazi unango wakufuma, ule adampempha kuti adye naye pabodzi. Natenepo ndzidzi onsene ukhagwanda iye na penepo, akhaimira kutoma kudya.

⁹Mkazi ule adalonga kuna mamunache mbati, “Ine ndikupidziwa kuti munthu ambagwanda na pano ndzidzi onseneyi ndi munthu wakuchena wa Mulungu.

¹⁰Mbatimmangireni kasubi padzulu pa nyumbathuyi, pontho tiikhemo talimba, thebulu, mpando na nyale, towera ndzidzi onsene unadza iye kuna ife, akwanise kukhala pyache mwenemo.”

¹¹Nsiku inango pidafika Elisha ku Shunemu adakwira m'dzulu kusubi kwache mbagona mwenemo.

¹²Iye adalonga kuna nyabasache Gehazi mbati, “Chemera mkazi wa Chishunemu kudza kuno.” Natenepo iye adamchemera; mkaziyo adadza mbaimira pamaso pa Elisha.

¹³Elisha adalonga kuna Gehazi mbati, “Mpange kuti iwe watibonerera pyakwanga. Apo unafuna ndikuchitirenji? Ayi tikalonge pyadidi pya iwe kuna mfumu penu kuna mkadamu wa anyankhondo?” Mkazi ule adatawira mbati, “Ine ndina pyonsene pinafuna ine pano pakati pa anthu anga.”

¹⁴Elisha adavunza Gehazi mbati, “Apo mkaziyu athema kuchitirwanji?” Gehazi adatawira mbati, “Mkazi weneyu nkhabe mwana pontho mamunache ndi nkhalamba.”

¹⁵Kubuluka penepo Elisha adalonga mbati, “Mchemere adze kuno.” Natenepo Gehazi adachemera mkazi ule, tenepo iye adadza mbaimira pamsuwo.

¹⁶Elisha adalonga mbati, “Chaka chamangwana ndzidzi ninga ontho uno iwe unati ukhumbatire mwana wamamuna.” Mkazi ule adalonga mbati, “Tayu, mbuyanga, lekani kundinyengeza, imwe ndimwe munthu wa Mulungu.”

¹⁷Mbwenye mkazi ule adakwatadi mimba, tenepo chaka chinangocho ndzidzi ninga onthowo iye adabala mwana wamamuna ninga montho mukhadampangira Elisha.

¹⁸Mwanamphale ule adakula, tenepo nsiku inango adenda kuna babache, ule akhali pabodzi pene na anyakuvuna.

¹⁹Mphale ule adalonga kuna babache mbati, “Msolo wanga! Mama msolo wanga!” Babache adalonga kuna nyabasache mbati, “Mthukule uende naye kuna mache.”

²⁰Nyabasa adamthukula mbaenda naye kuna mache. Mphale ule adakhala pamiyendo pa mache kufikirana masikati, tenepo adafa.

²¹Mkazi ule adamkwata mphale ule mbakwira naye kusubi ya padzulu mbakamgonesa patalimba ya munthu wa Mulungu ule, tenepo adabulukamo mbafunga msuwo.

²²Kubuluka penepo iye adachemera mamunache mbalonga mbati, “Ndaphata miyendo munditumizirembo nyabasanu mbodzi na bulu, towera ndikwanise kuthamanga kuna munthu wa Mulungu ule, tenepo ndinati ndibwereko chinchino pano.”

²³Mamuna adavunza mbati, “Chinafuna kukuendesa kuna iye nsiku ya leroyi ninji? Lero si nsiku yakusekera kubalwa kwa mwezi penu Nsiku Yakupuma tayu.”[6] Mkazi ule adatawira mbati, “Nkhabe pinthu tayu.”

²⁴Pidamangirira iye chakukhalira pabulu pache adapakira mbapanga nyabasache mbati, “Fambisa pyakwanga buluyu. Leka thethesa kufikirana ndikupange kuchita tenepo.”

²⁵Natenepo iye adenda mbafika kuna munthu wa Mulungu paphiri ya Karimele. Pidaona Elisha mkazi ule na pakansinzo adalonga kuna nyabasache Gehazi mbati, “Ngayang'ana mkazi wa Chishunemu uyo anadzayo!

²⁶Thamanga ugumanikane naye pontho umvunze kuti, ‘Ayi nkhwadidi kwene? Ayi mamunako ngwakuwanga ene? Apombo mphaleanu ngwakuwanga ene?’ ” Mkazi ule adatawira mbati, “Onsene ngakuwanga ene.”

²⁷Pidafika mkazi ule kuna munthu wa Mulungu, iye adaphata manyalo a Elisha. Gehazi adadza mbafuna kumgwinya, mbwenye munthu wa Mulungu ule adalonga mbati, “Msiye pyache! Iye akusanyika pikulu mumtima mwache, mbwenye MBUYA andibisira pya penepi mbakhonda kundipanga.”

²⁸Mkazi ule adalonga mbati, “Ayi mbuya, ine ndidachita kukupemphani kuti mundipase mwana? Ayi ine sidakupangeni tayu kuti, ‘Lekani kulamusa chikhumbo changa.’ ”

²⁹Elisha adalonga kuna Gehazi mbati, “Mangirira chakufinika chako m'chuno mwako, pontho ukwate ndodo yangayi mbuthamange kwenda kumusa kwa mkaziyu. Ngakhala panjira unagumanikana na munthu leka kummwenyika, penu ngakhala unagumanikana na munthu unango leka kumtawira. Ukaikhe ndodo yangayi kunkhope kwa mphaleyo.”

³⁰Mbwenye mache mphale ule adalonga kuna Elisha mbati, “Ine ndinadumbira pamaso pa MBUYA wamoyo na pamaso panu kuti sinakusiyani tayu.” Natenepo Elisha adenda pabodzi naye.

³¹Gehazi adatsogola mbakaikha ndodo ile kunkhope kwa mphaleyo, mbwenye nkhabe chinthu na chibodzi chene chidachitika tayu. Natenepo Gehazi adabwerera mbakagumanikana na Elisha mbampanga mbati, “Mphale hadalamuke tayu.”

³²Pidafika Elisha kumusa kule adaona mphale wakufa ule ali lamba patalimba pache.

³³Iye adapita m'subimo, uwiriawo mbapifungira mwenemo, natenepo adapemphera kuna MBUYA.

³⁴Kubuluka penepo adakwira patalimba pale mbamgonera mphale ule uku mulomo, maso na manjache pyagumanizana mulomo, maso na manja a mphale ule. Tenepo pikhali Elisha thasa pamphaleyo, manungo a mphaleyo adatoma kupisa.

³⁵Kubuluka penepo Elisha adalamuka mbafamba-famba uku na uko m'subi mule mbabwerera patalimba pale mbagonera pontho pamphaleyo, ule adaotsira kanomwe mbafungula maso ache.

³⁶Elisha adachemera Gehazi mbati, “Kachemere mkazi wa Chishunemu ule.” Iye adachitadi tenepo. Pidafika mkazi ule, Elisha adalonga mbati, “Kwata mwanako.”

³⁷Tenepo mkazi ule adapita mwenemo mbapigwisa pamanyalo pa Elisha, tenepo adalamba pamaso pache. Kubuluka penepo adakwata mwanache mbabuluka panja.

³⁸Elisha adabwerera ku Giligala, kule kukhali njala ikulu. Pikhafunzisa Elisha gulu ya maprofeti, Elisha adapanga nyabasache mbati, “Sanjika chikalango chikulu pamoto mbutereke muliwo kuti anthuwa adye.”

³⁹Mbodzi wa amuna ale adenda kumunda kasaka masamba mbakagumana mtawi wakuoneka ninga ndiko. Tenepo iye adatchola nsapo zache mbadzaza m'khanzwa mwache. Pidabwerera iye adapicheka-cheka mbapiikha m'chikalango mule. Nkhabe na mbodzi ene pakati pawo adadziwa kuti pikhalinji tayu.

⁴⁰Muliwo udapakulwa kuti anthu adye, mbwenye pidaulawa iwo, adakhuwa mbati, “Munthu wa Mulungu muna imfa m'chikalango.” Tenepo iwo hadakwanise kuudya tayu.

⁴¹Elisha adalonga mbati, “Ndikwatireni ufa pang'ono.” Iye adaponya ufa ule m'chikalango mule mbalonga mbati, “Apakulireni anthu kuti adye.” M'chikalango mukhali nkhabe pontho chinthu chakupha tayu.

⁴²Munthu unango wa ku Baala-Shalisha adadza kuna munthu wa Mulungu na mikate makumawiri ya barele wakutoma kutokota, pabodzi pene na ngala za mapira achinchino. Elisha adalonga mbati, “Pipereke kuna anthu kuti adye.”

⁴³Nyabasache Elisha adamtawira mbati, “Ayi penepimbo na anthu dzana pinaaphatanji?” Mbwenye Elisha adatawira mbati, “Pipereke kuna anthu kuti adye, thangwi MBUYA alonga kuti, ‘Iwo anati adye mbapasala pinango.’ ”

⁴⁴Natenepo iye adapereka mikate ile kuna anthu ale, tenepo anthu adadya mbakhuta mbapasala basi pinango malingana na mafala adalonga MBUYA ale.