Read cisena 2 MAFUMU 7 Bible Online

2 MAFUMU 7 - cisena bible

2 MAFUMU 7

¹Elisha adatawira mbati, “Ngavani mafala a MBUYA! Mangwana ndzidzi ninga uno munakwanisa dzagula mu Samaria makilogramu atatu a tirigu wadidiletu penu makilogramu atanthatu a barele na kobiri ibodzi yasiliva.”

²Mkadamu wa anyankhondo wakunyindirika wa mfumu adalonga kuna munthu wa Mulungu mbati, “Podi kwene kuti MBUYA afungule misuwo ya madzi[9] ya kudzulu, ayi penepi pingachitikedi?” Elisha adalonga mbati, “Iwe unati upione na maso ako, mbwenye hunadyapo chinthu na chibodzi chene tayu.”

³Pamsuwo wakupitira mumzinda wa Samaria pakhali amuna anayi, ale akhali na matanya. Iwo adalonga kuna unango na mwanzache mbati, “Kadi ife tinakhaliranji pano kufikirana kufa?

⁴Tingalonga kuti, ‘Tendeni mumzindamu’ mumzindamu muna njala, tenepo tinati tikafe na njala mwenemo. Tingakhala pano tinati tife basi. Natenepo tendeni pyathu kumsasa wa Aaramu mbatikapipereke tekha ene kweneko. Ngakhala iwo anakhonda kutipha, tinakhala na moyo; mbwenye ngakhala anatipha ife tinafa pyathu.”

⁵Tenepo m'chidodo iwo adenda kumsasa wa Aaramu. Pidafika iwo m'khundu-khundu mwa msasa ule, pakhali nkhabe munthu na mbodzi ene,

⁶thangwi MBUYA akhadachitisa Aaramu kuva ninga mulikiti wa pingolo, akavalo na nkhondo ikulu mwakuti adalonga kuna unango na mwanzache mbati, “Ngayang'anani mfumu wa Israele akwata anyankhondo aganyo akubulukira kuna mafumu a Ahiti na Iguputo kuti adze dzamenyana nafe.”

⁷Natenepo iwo adalamuka m'chidodo mbathawa kusiya makumbi awo, akavalo awo na pingolo pyawo. Iwo adasiya msasa ninga montho mukhali iwo mule mbathawa kupulumusa moyo wawo.

⁸Anyamatanya anayi ale adafika m'khundu-khundu mwa msasa mule mbapita m'khumbi ibodzi. Iwo adadya na kumwa mbathukula siliva na golidi na nguwo kwenda napyo kapibisa. Iwo adabwerera mbapita m'khumbi inango mbathukula pinthu pinango mwenemo mbakapibisa pontho.

⁹Kubuluka penepo adalonga kuna unango na mwanzache mbati, “Pinachita ifepi si pyadidi tayu. Lero ndi nsiku ya mphangwa zadidi mbwenye ife tikupikoyera tekha ene. Ngakhala tinadikhira mpakana mangwana tinatchunyuswa. Tendeni chinchino pano tikapilonge kunyumba ya mfumu.”

¹⁰Natenepo iwo adenda mbakachemera anyakulondali pamsuwo wa mpanda mbaapanga mbati, “Ife tidenda kumsasa wa Aaramu mbatikagumana nkhabe munthu na mbodzi ene kweneko, penu kuva fala ya munthu tayu; mbwenye akavalo na mabulu awo amangirirwa pontho mbasiya makumbi awo ninga montho mukhali iwo.”

¹¹Anyakulondali pamsuwo ale adalalika mphangwa zile, tenepo penepi pidalongwa kuna anthu akukhala m'nyumba ya chifumu.

¹²Mfumu adalamuka na mosiku mbalonga kuna mathubu ache mbati, “Ndinati ndikupangeni pyachita Aaramu kuna ife. Iwo akudziwa kuti ife tikufa na njala; natenepo iwo abuluka chadala mumsasa mwawo mbakabisala m'tsanga na manyerezero akuti ife tinabuluka kasaka pyakudya towera iwo atiphe amoyo mbapokosera mzindathuwu.”

¹³Mbodzi wa mathubu ache adatawira mbati, “Pangani anthu anango kukwata akavalo ashanu asalira mumzindawo. Iwo anakhala ninga Aisraele asala panyatwa mumzindamo, penu anakhala ninga Aisraele anango onsene afa kale ale. Natenepo tendeni tiagwinye kuti akaone pyachitikapyo.”

¹⁴Iwo adasankhula pingolo piwiri, akavalo na anyakutekenya ache; mfumu adaagwinya katewera anyankhondo a Aramu. Iye adaapanga mbati, “Ndokoni mukaone pyachitikapyo.”

¹⁵Iwo adaatewera mpakana ku Yorodani, mbagumana kuti m'njira monsene mwamala ipa na nguwo, pontho pida pinango pikhadataya Aaramu thangwi ya kuthawa kukhachita iwo. Natenepo anyamphangwa ale adabwerera mbakapilonga kuna mfumu.

¹⁶Tenepo Aisraele adenda kumsasa wa Aaramu mbakakwata pyonsene mwakuti makilogramu a tirigu adidiletu penu makilogramu atanthatu a barele wadidiletu pikhagulwa na kobiri ibodzi yasiliva ninga montho mukhadalongera MBUYA.

¹⁷Pidachitika kuti mfumu wa Israele akhadaikha mkadamu wa anyankhondo wakunyindirika wa mfumu kuyang'anira pamsuwo wakupitira mumzindawo. Mkadamu ule adapondedzwa na anthu pamsuwo pale mbafa ninga montho mukhadalongera Elisha pikhadenda mfumu kaonana naye kunyumba kwache.

¹⁸Elisha akhadalonga kuna mfumu mbati, “Mangwana ndzidzi ninga uno munakwanisa dzagula mu Samaria makilogramu atatu a tirigu wadidiletu penu makilogramu atanthatu a barele na kobiri ibodzi yasiliva.”

¹⁹Mkadamu wa mfumu ule akhadatawira munthu wa Mulungu ule mbati, “Ngayang'ana, podi kwene kuti MBUYA afungule misuwo ya madzi ya kudzulu, ayi penepi pingachitikedi?” Munthu wa Mulungu adatawira mbati, “Iwe unati upione na maso ako, mbwenye hunadyapo chinthu na chibodzi chene tayu.”

²⁰Penepi mphyonthopyo pidamchitikira; anthu adampondedza pamsuwo wa mpanda mbaferatu.