Read cisena 2 MAFUMU 9 Bible Online

2 MAFUMU 9 - cisena bible

2 MAFUMU 9

¹Mprofeti Elisha adachemeresa munthu wa m'gulu ya maprofeti mbalonga kuna iye mbati, “Sasanyika kwenda ku Ramoti-Gileadi. Ukwate mtete wa mafutawa.

²Ungafika kweneko usake-sake Yehu, mwana Yehosafati, mdzukulu wa Nimishi. Ungamgumana ndoko naye pakhundu kutali na anzache mbupite naye m'subi ya m'bwaloletu.

³Kubuluka penepo ukwate mtete wa mafutawa mbuukhuthulire mumsolo mwache, pontho ulonge kuti, ‘Pyalonga MBUYA mphipi: Ndikukudzoza kukhala mfumu wa Israele,’ Ungamala penepo, fungula msuwo mbuthawe; leka dembuka.”

⁴Natenepo mprofeti wachiphale ule, adenda ku Ramoti-Gileadi.

⁵Pidafika iye adagumana akadamu a anyankhondo ali khale-khale pabodzi pene. Iye adalonga mbati, “Ndina mafala akuti ndikupangeni mkadamu.” Yehu adavunza mbati, “Analonga na iwe mbani pakati pathupa?” Iye adatawira mbati, “Ndikulonga na imwe mkadamu.”

⁶Yehu adalamuka mbapita m'nyumba. Natenepo mprofeti ule adakhuthula mafuta mumsolo mwa Yehu mbalonga mbati, “Pyalonga MBUYA Mulungu wa Israele mphipi: Ndikukudzoza kukhala mfumu wa Israele anthu anga.

⁷Pontho iwe wathema kuvunga banja ya Ahabu mbuyako, pontho ine ndinati ndibwezere chiropa cha anyabasanga, maprofeti, na chiropa cha anyabasa a MBUYA chidachuchisa Yezebele chile.

⁸Banja yonsene ya Ahabu inavungika. Ndinati ndiphe mu Israele mamuna onsene wa m'banja ya Ahabu, bitchu penu mtumbe.

⁹Ndinachitisa banja ya Ahabu kukhala ninga banja ya Yeroboamu mwana Nebati, pontho ninga banja ya Baasha mwana Ahia.

¹⁰Kulonga pya Yezebele, anambwa anadya manungo ache pambuto ya Yezereele, pontho nkhabe munthu na mbodzi ene anafuna dzamuikha m'masiye tayu.” Pidamala iye, adafungula msuwo mbathawa.

¹¹Pidabuluka Yehu panja kuna akadamu anzache, mbodzi wa iwo adavunza mbati, “Ayi nkhwadidi kwene? Nyansalayimbo adadza dzatani kuna imwe?” Imwe mukumdziwa kale munthu wacheyu na pinthu pimbalonga iye?

¹²Anzache adatawira mbati, “Nkhabe tayu, ngatipange pyalonga iye?” Yehu adalonga mbati, “Andipanga mafala alonga MBUYA kuti, ‘Ndikukudzoza kukhala mfumu wa Israele.’ ”

¹³Msanga-msanga iwo adadula pyakufinika pyawo mbapithasika pansikada kuti iye aimirepo. Kubuluka penepo adaliza ngoma mbakhuwa mbati, “Yehu ndi mfumu!”

¹⁴Natenepo Yehu, mwana Yehosafati, mdzukuluache Nimishi adasasanya kuchita pyakuipa kuna Yoramu. Pandzidzi wenewu Yoramu na Aisraele onsene akhatchinjiriza Ramoti-Gileadi gopesera Hazaele mfumu wa Aramu,

¹⁵mbwenye Mfumu Yoramu akhadabwerera ku Yezereele kudikhira kuti chironda chache chitome pola, chile chidampasa Aaramu pandzidzi ukhachita iwo nkhondo na Hazaele mfumu wa Aramu. Yehu adalonga kuna akadamu anzache ale mbati, “Ngakhala imwe mulidi kukhundu kwanga paleke khala munthu wakupyanga kubuluka mumzinda muno kwenda ku Yezereele kalonga pya mphangwazi tayu.”

¹⁶Kubuluka penepo adakwira pachingolo chache mbaenda ku Yezereele, thangwi Yoramu akhapuma kweneko, pontho Ahazia mfumu wa Yuda akhadabwera kudzamuona.

¹⁷Nyakulondali wakukhala pansanja mu Yezereele adaona Yehu na amunache akufika chifupi. Iye adakhuwa mbati, “Ndikuona magulu anango ankhondo akubwera.” Yoramu adatawira mbati, “Panga nyakupakira kavalo mbodzi kuti aende kagumanikana nawo, pontho akavunze ngakhala iwo mbashamwali penu anyamalwa.”

¹⁸Nyakupakira kavalo adathamanga kagumanikana nawo mbalonga mbati, “Mfumu akuvunza kuti ndimwe ashamwali penu anyamalwa?” Yehu adatawira mbati, “Iwe uli napyonji? Pita m'nduli mwangamu.” Nyakulondali ule adalonga mbati, “Nyamphangwa ule aafikira, mbwenye hakubwerako tayu.”

¹⁹Natenepo mfumu adatumizako nyakupakira kavalo wachiwiri. Pidafika iye kuna Yehu adalonga mbati, “Mfumu akuvunza kuti ayi ndimwe ashamwali penu anyamalwa.” Yehu adatawira mbati, “Iwe uli napyonji? Pita m'nduli mwangamu.”

²⁰Nyakulondali ule adalonga pontho mbati, “Nyamphangwa ule aafikira, mbwenye hakubwerako tayu. Kufambisa kwache chingolo kukukhala ninga kwa Yehu mdzukuluache Nimishi, thangwi iye ambafambisa ninga nyansala.”

²¹Yoramu adatawira mbati, “Chitisa chingolo changa kukhala chakusasanyika.” Tenepo pidasasanyika icho, Yoramu mfumu wa Israele na Ahazia mfumu wa Yuda adapakira kada munthu chingolo chache kagumanikana na Yehu. Iwo adagumanikana pamunda, ule ukhali wa Naboti wa ku Yezereele.

²²Yoramu pidaona iye Yehu adamvunza mbati, “Ayi Yehu wadzera mtendere?” Yehu adatawira mbati, “Panakhala tani mtendere uku ufiti na kupembedza milungu inango pyakuinjipa pidatomesa mako Yezebele tikhali napyo?”

²³Pidazungunuka Yoramu kuthawa, adakhuwa kuna Ahazia mbati, “Anthu atipandukira, Ahazia!”

²⁴Tenepo Yehu adakweya utache mbalasa nawo Yoramu pakati pa mapewache. Tswimo ile idapitiratu mbikalasa mtima, natenepo iye adagwera m'chingolo mwache mule mbaferatu.

²⁵Yehu adalonga kuna Bidikari thubu wache mbati, “Mthukule umponye m'munda mwa Naboti wa ku Yezereele. Kumbuka kuti pikhafamba ife pabodzi m'pingolo pyathu m'nduli mwa Ahabu, babache Yoramu, MBUYA adalongeratu pinthu pyakupokanyisana naye kuti:

²⁶‘Dzulo ndidaona chiropa cha Naboti na cha anache. Ine MBUYA ndinadumbira kuti iwe unati upagali chiropa chenecho pamunda ontho uno.’ Natenepo mthukuleni mumponye m'munda mwa Naboti ninga montho mukhadalongera MBUYA.”

²⁷Pidaona Ahazia mfumu wa Yuda pinthu pidachitika pile, adathawa na njira yakwendera ku Beti-Hagani. Yehu adamthamangisa mbakhuwa mbati, “Weneyo pontho mpheni!” Iwo adamkuwaza[11] uku mbali m'chingolo mwache panjira yakwendera ku Guri chifupi na luwani ya Ibuleamu, kwache iye adathawira kumzinda wa Megido mbafera kweneko.

²⁸Mathubu ache adakwata mtembo wache pachingolo kwenda naye ku Yerusalemu mbakamuikha m'masiye a makolo ache mumzinda wa Davite.

²⁹Chaka chakhumi na chibodzi cha Yoramu mwana Ahabu, mbali mfumu wa Israele, Ahazia akhadapita ufumu wa Yuda.

³⁰Kubuluka penepo Yehu adenda ku Yezereele. Pidava Yezebele pinthu pikhadachitika pile adakhwaza tinta m'tchiye zache na kusasanya mwadidi tsisi yache kupithemesera. Tenepo adaimira pazhanera ya nyumba yachifumu mbayang'ana pansi kunjira.

³¹Pikhadza Yehu na pamsuwo wa mpanda pale, Yezebele adakhuwa mbati, “Iwe Zimri,[12] mphandu wakupha mbuyache, ayi wadzera mtendere kuno?”

³²Yehu adakwiza maso ache m'dzulu mbakhuwa mbati, “Ali kukhundu kwanga mbani?” Mathubu awiri penu atatu a ku nyumba yachifumu adayang'ana pansi na pazhanera pakhali Yehu pale,

³³tenepo Yehu adalonga kuna iwo mbati, “Mponyeni pansi!” Iwo adamponyeradi pansi, tenepo chiropa chache chidawazira mafufu na akavalo. Yehu adapondedza-pondedza mtembo wa Yezebele pakufambisapo akavalo na chingolo.

³⁴Kubuluka penepo Yehu adapita m'nyumba yachifumu ile mbadya na kumwa mwenemo. Iye adalonga mbati, “Mkwateni mkazi wakutembererwayo mbamukamuikhe m'masiye thangwi iye ndi mwana mfumu.”

³⁵Mbwenye amuna akhadatumwa kaikha mkazi ule m'masiye, adagumanapo kwene chibade cha msolo wache na magogodo a manja na manyalo ache basi.

³⁶Pidakapilonga iwo kuna Yehu, Yehu adalonga mbati, “Penepi ndiye pidalonga MBUYA kuti pinachitika kudzera muna nyabasache Elia kuti, ‘Anambwa anadya mtembo wa Yezebele m'nthemba ya Yezereele.

³⁷Manyenyeswa a mtembo wache anamwazikana ninga ulowa mwakuti nkhabe munthu unango anakwanisa dzalonga kuti: Yezebele ngushu.’ ”