Read cisena 1 MBIRI 10 Bible Online

1 MBIRI 10 - cisena bible

1 MBIRI 10

¹Afilisti adachita nkhondo na Aisraele paphiri ya Giliboa. Aisraele azinji adaphiwa penepo, tenepo anango onsene adasalira ale kuthimizapo Mfumu Sauli na anache adathawa.

²Mbwenye Afilisti adaphatana nawo mbaphapo ana atatu achimuna a Sauli, ale ndi Yonatani, Abinadabu na Malikishua.

³Nkhondo idakaka pyakwanga kuzungulira Sauli, tenepo iye makayo adalaswa pikulu pene na matswimo a anyamalwache mbakuwazika pyakwanga.

⁴Iye adalonga kuna mphale akhathukula pida pyache ule mbati, “Cholola talasadako undiphe, towera Afilisti okhonda dziwa Mulunguwa aleke kundilulupisa kuti andipha ndiwo.” Mbwenye mphale ule akhachita mantha pyakwanga kuti achite tenepo. Natenepo Sauli adakwata yekha ene talasadache mbaigwera.

⁵Pidaona mphale ule kuti Sauli afa, iye adapiponyambo patalasadache mbaferatu ponthopo.

⁶Sauli na anache onsene adafera mbodzi mwene mwakuti nkhabe chidzukulu chache na chibodzi chene chatonga tayu.

⁷Pidapiva Aisraele ale akhakhala m'phedi ya Yezereele kuti anyankhondo akhadathawa pontho kuti Sauli na anache akhadafa, iwo adasiya maluwani awo mbathawa. Natenepo Afilisti adadza mbakwata maluwaniwo.

⁸Mangwana mwache pidamala nkhondo ile, Afilisti adenda kadulisa nguwo mitemboyo, tenepo iwo adagumanapo mitembo ya Sauli na anache achimuna ale, ili thasa-thasa paphiri ya Giliboa.

⁹Iwo adagwanda msolo wa Sauli mbamdula pida pyache, tenepo adatuma anyamphangwa m'dziko yonsene ya Afilisti kalonga mphangwa zakukomazi kuna mifanikizo yawo m'nyumba zakupemphereramo na kuna anthu awo.

¹⁰Iwo adaikha pida pyachepyo m'nyumba ibodzi mwa nyumba zakupembedzeramo milungu yawo. Iwo adamanika msolo wache m'nyumba yakupembedzeramo Dagoni, milungu yawo.

¹¹Pidava anthu a ku Yabeshi-Gileadi pinthu pidachita Afilisti kuna Sauli,

¹²amuna akuwanga mtima adenda kakwata mitembo ya Sauli na anache kwenda nayo ku Yabeshi. Kweneko iwo adaikha mitemboyo pansi pa muti wamthundu. Tenepo iwo adapimana kudya nsiku zinomwe.

¹³Sauli adafa thangwi iye akhali okhonda khulupirika kuna MBUYA. Iye adakhonda kuvera matongero a MBUYA; iye adavunza nzeru kuna mizimu ya anthu akufa pakuchita kuombedza,

¹⁴m'mbuto mwa kuvunza nzeru kuna MBUYA. Natenepo MBUYA adampha mbapereka ufumu onsene kuna Davite mwana Yese kuti akhale mtongi.