Read cisena 1 MBIRI 11 Bible Online

1 MBIRI 11 - cisena bible

1 MBIRI 11

¹Aisraele onsene adenda kuna Davite ku Hebroni mbalonga kuna iye mbati, “Ife ndife manungo anu pontho chiropa chanu.

²M'ndulimu podi na pikhali Sauli mfumu wathu, imwe mukhatsogolera Aisraele kunkhondo, pontho MBUYA Mulungu wanu adadumbira kuti imwe munatsogolera anthu ache ninga makabuswa, pontho munakhala mtongi wawo.”

³Natenepo akadamu onsene a Aisraele adadza kuna Mfumu Davite ku Hebroni. Iye adachita nawo chiverano chakupambulika, iwombo adamdzoza kukhala mfumu wa Israele ninga montho mudadumbira MBUYA kudzera muna Samuele.

⁴Mfumu Davite na Aisraele onsene adenda mbakachita nkhondo na mzinda wa Yerusalemu. Pandzidzi wenewo ukhadziwika na dzina yakuti Yebusi, tenepo Ayebusi enechiro ache dziko akhathimiza basi kukhala mwenemo.

⁵Ayebusi adapanga Davite kuti iye hanakwanisa tayu kupita mumzindamo, kwache Davite adapokosera Zioni, mzinda wakutchingwa na mpanda, mbusanduka mzinda wa Davite.

⁶Davite adalonga mbati, “Munthu wakutoma kupha Myebusi anakhala mkadamu wa anyankhondo!” Yoabu ule mache akhali Zeruia ndiye adatoma mbakhala mkadamu wa anyankhondo.

⁷Na thangwi yakuti Davite adenda kakhala mumzinda wakutchingwa na mpanda, iwo udachemerwa “Mzinda wa Davite.”

⁸Iye adauzungulira na mzinda ukulu, kutomera pale padandendemezwa kukhundu yakumabulukiro dzuwa a phiri, tenepo Yoabu adamalisa kumanga khundu yakusalira ya mzindawo.

⁹Mphamvu za Davite zikhaenda mbazikula, thangwi MBUYA Wamphamvu zonsene akhali naye.

¹⁰Anthu ali m'tchindemu mbanyankhondo akuveka a Davite. Iwo pabodzi pene na Aisraele onsene adamphedza kuti iye akhale mfumu ninga montho mudadumbira MBUYA, tenepo ufumu wache ukhali wamphamvu pyakwanga.

¹¹Wakutoma akhali Yashobeamu wa nkhonda Hakimoni mkadamu wa “Atatu.”[21] Iye adamenyana na amuna madzana matatu pakuphatisa basa dipache mbaapha onsene pandzidzi ubodzi ene wa nkhondo.

¹²Wachiwiri pa “Atatu” akuveka ale, akhali Eleazara mwana Dodo wa nkhonda Ahohi.

¹³Iye adamenya nkhondo pabodzi pene na Davite kuthimbana na Afilisti pankhondo ya pa Pasi-Damimu. Iye akhali m'munda wa barele pikhathawa Aisraele,

¹⁴natenepo iye na amuna akhali na iye adaimira dzololo kutchinjiriza munda ule mbamenyana na Afilisti. MBUYA adaachitisa kukunda kukulu.

¹⁵Nsiku inango atatu mwa anyankhondo amphamvu makumatatu adenda kuphanzwi, kule kukhali Davite chifupi na nkhwimba ya Adulamu, mwenemo gulu ya Afilisti idamanga msasa m'phedi ya Refaimu.

¹⁶Pandzidzi wenewo Davite akhali pambuto yakutchingwa na mpanda paphiri, pontho gulu inango ya Afilisti ikhadapokosera mzinda wa Betelehemu.

¹⁷Davite adatchuwa kumusa mbalonga mbati, “Ndikhafunadi kwene kuti munthu unango andidzesere madzi a mumchera wa chifupi na msuwo wampanda wa Betelehemu!”

¹⁸Anyankhondo atatu akuveka ale, adapapanula na mumsasa wa Afilisti, iwo adatunga madzi mumcheramo mbadza nawo kuna Davite. Kwache iye hadaamwe tayu; m'mbuto mwache adaakhuthulira pansi ninga chakupereka kuna MBUYA

¹⁹mbalonga mbati, “Ine nee mbidakwanisa kumwa madzi enewa tayu! Thangwi kumwa madziwa kunakhala ninga kumwa chiropa cha amuna ale, adapipereka kutaya moyo wawo katunga madzi enewa!” Natenepo iye adakhonda kumwa madzi ale. Penepi ndiye pinthu pidachita amuna atatu akuveka ale mwakuwanga mtima.

²⁰Abishai mbaleache Yoabu akhali mkadamu wa “Anyakuveka Makumatatu.” Iye adaphatisa basa dipa kumenyana na amuna madzana matatu mbaapha. Natenepo iye adasanduka wakuveka pyakwanga pakati pa “Makumatatu.”

²¹Iye akhali wakuveka pyakwanga pene pakati pa “Makumatatu” mbakhala mkadamu wawo, kwache iye hakhali wakuveka pyakwanga kupiringana “Atatu” ale tayu.

²²Benaia mwana Yehoiada wa ku Kabizeele akhalimbo nyankhondo wakuveka; iye adachita pinthu pikulu mwakuwanga mtima kuthimizapo kupha anyankhondo amphamvu awiri a ku Moabu. Pansiku inango yakutonthola kwakuumisa madzi iye adagwera m'dzenje mbaphamo nkhalamu.

²³Iye adapha pontho munthu wa ku Iguputo, munthu wamkulu pyakwanga, ule kulapha kwache kukhali makhono mawiri, pontho ule adaphatira dipa ikulu. Benaia adammenya na chigomba Muiguputo ule mbampokosera dipache. Tenepo iye adampha na dipache yonthoyo.

²⁴Penepi mphinthu pidachita Benaia mwakuwanga mtima, ule akhali mbodzi mwa “Makumatatu.”

²⁵Iye akhali wakuveka pyakwanga pakati pa “Makumatatu,” kwache iye hakhali wakuveka pyakwanga pene tayu kupiringana “Atatu” ale. Tenepo Davite adamuikha kukhala mkadamu wa anyakumuyang'anirache.

²⁶Ali m'tchindemu mbanyankhondo anango akuveka: Asahele mbaleache Yoabu, Elihanani mwana Dodo wa ku Betelehemu,

²⁷Shamoti wa ku Harodi, Helezi wa ku Peleti,

²⁸Ira mwana Ikeshi wa ku Tekoa, Abiezere wa ku Anatoti,

²⁹Sibekai wa ku Husha, Ilai wa ku Ahohi,

³⁰Maharai wa ku Netofa, Heledi mwana Baana wa ku Netofa,

³¹Itai mwana Ribai wa ku Gibea m'nthemba ya Benjemani, Benaia wa ku Piratoni,

³²Hurai wa kumaphedi a chifupi na Gaashi, Abiele wa ku Aribati,

³³Azimaveti wa ku Baharumi, Eliaba wa ku Shaaliboni,

³⁴Hashemu wa ku Gizoni, Yonatani mwana Shage wa ku Harari,

³⁵Ahiamu mwana Sakari wa ku Harari, Elifali mwana Uri,

³⁶Hefere wa ku Mekera, Ahia wa Peloni,

³⁷Hezero wa ku Karimele, Naarai mwana Ezibai,

³⁸Yowele mbaleache Natani, Mibihari mwana Hagiri,

³⁹Zeleki wa ku Amoni, Naharai wa ku Beeroti, nyakuthukula pida pya Yoabu mwana Zeruia

⁴⁰Ira wa ku Yatiri, Garebu wa ku Itiri,

⁴¹Uria wa ku Hiti, Zabadu mwana Ahilai,

⁴²Adina mwana Shiza wa dzinza ya Rubeni, ule akhali mkadamu wa dzinza ya Rubeni pabodzi pene na anthu makumatatu akhali na iwo ale,

⁴³Hanani mwana Maaka, Yoshafati wa ku Mitani,

⁴⁴Uzia wa ku Ashiterate, Shama na Yeiele ana Hotamu wa ku Aroeri,

⁴⁵Yediaele mwana Shimri na mbaleache Yoha wa ku Tizi,

⁴⁶Eliele wa ku Mahavi, Yeribai na Yoshavia ana Elinaamu, Itama wa ku Moabu,

⁴⁷pontho Eliele, Obedi na Yaasiele wa ku Zoba.