Read cisena 1 MBIRI 12 Bible Online

1 MBIRI 12 - cisena bible

1 MBIRI 12

¹Davite akhakhala ku Zikilagi kule kukhadathawira iye kugopa Mfumu Sauli mwana Kishi. Kweneko iye akhadaphatanizana na anyankhondo akunyindirika pontho akudziwa basawo,

²anthu a m'dzinza ya Benjemani, mule mudabalwa Sauli. Iwo akhakwanisa kuponya matswimo na mwala na mbemba pakuphatisa basa mkono wamadyo penu wamabzere.

³Iwo akhali pansi pa utongi wa Ahiezere na Yoasi, ana a Shemaa wa ku Gibea. Anyankhondo ache akhali: Yeziele na Peleti ana achimuna a Azimaveti; Beraka na Yehu a ku Anatoti; Ishimaia wa ku Gibeoni, nyankhondo wakuveka, pontho mbodzi wa akadamu a “Makumatatu” ale; Yeremia, Yahaziele, Yohanani na Yozabadi wa ku Gedera; Eluzai, Yerimoti, Bealia, Shemaria, na Shefatia a ku Harifi; Elikana, Ishia, Azarele, Yoezeri, na Yashobeamu wa nkhonda Kora; pontho na Yoela na Zebadia, ana achimuna a Yerohamu wa ku Gedori.

⁸Ali m'tchindemu ndi madzina a anyankhondo akuveka pontho akudziwa basawo a m'dzinza ya Gadi, ale adapita m'gulu ya anyankhondo a Davite pikhali iye pambuto yakutchingwa na mpanda m'thando yatchetcha mule. Iwo akhali na luso pyakwanga pakuphatisa basa pyakugedera matswimo na madipa, pontho akhali akugoswa ninga nkhalamu, pontho akuthamanga ninga nyasa m'mapiri.

⁹Iwo adapitiswa m'mipando, tenepo kutomera mkadamu wamkulu mpakana wamng'ono njishi: Ezeri, Obadia, Eliabu, Mishimana, Yeremia, Atai, Eliele, Yohanani, Elizabadi, Yeremia, na Makibanai.

¹⁴Amuna anango a m'dzinza ya Gadi akhali akadamu akulu akuyang'anira anyankhondo chikwi; anangombo akhali akadamu akuyang'anira anyankhondo dzana.

¹⁵Mwezi wakutoma wa chaka chinango pandzidzi udatayikira madzi a mumkulo wa Yorodani kumakhundu onsene, iwo adawambuka mkulo ule mbabalalisa anthu akhakhala m'maphedi a kukhundu yakumabulukiro na kumadokero dzuwa a mkulo ule.

¹⁶Nsiku inango amuna a m'dzinza ya Benjemani na Yuda adenda kumzinda wakutchingwa na mpanda kule kukhakhala Davite.

¹⁷Davite adenda kagumanikana nawo mbalonga mbati, “Ngakhala imwe mukudza kuna ine ninga ashamwali anga kufuna kundiphedza, mwatambirwa na manja mawiri. Khalani nafe pabodzi. Mbwenye ngakhala munafuna pyakundipereka kuna anyamalwanga, podi kwene kuti sidapiyesere tayu kukukuwazani, Mulungu wa makolo athu anati apidziwe mbakutchunyusani.”

¹⁸Mzimu wa Mulungu udagudumira Amasai, mbodzi wa iwo, ule pakumalisira pache adasanduka mkadamu wa “Makumatatu.” Tenepo iye adakhuwa mbati, “Davite mwana Yese, ife ndife ako! Mbapikwanisike pyonsene pinachita iwe pabodzi pene na anyakukuphedza! Mulungu ali kukhundu kwako.” Davite adaatambira mbaachitisa kukhala akadamu m'gulu yache ya nkhondo.

¹⁹Anyankhondo anango a m'dzinza ya Manase adenda kukhundu ya Davite pikhadza iye pabodzi pene na Afilisti dzamenyana na Mfumu Sauli. Kwache iye hadaphedze Afilistiwo tayu, thangwi iwo akhachita mantha kuti mwinango Davite anakaapereka m'manja mwa Sauli mbuyache wakutoma, natenepo adambweza kwenda ku Zikilagi.

²⁰Tenepo anyankhondo a m'dzinza ya Manase ale adenda mbakakhala khundu ibodzi ene na Davite pikhabwerera iye mbawa: Adina, Yozabadi, Yediaele, Mikaele, Yozabadi, Elihu na Ziletai. M'nthemba ya Manase iwo onsene akhali akadamu a amuna chikwi chibodzi.

²¹Iwo adatumikira Davite ninga akadamu a gulu yache ya nkhondo[22] thangwi onsene akhali anyankhondo amphamvu. Kubuluka penepo iwo adakhala akadamu a nkhondo mu Israele.

²²Nenene nsiku na nsiku anthu achinchino akhadza kukhala mbodzi wa anyankhondo a Davite, mwakuti gulu yache idakula mbikhala yamphamvu ninga anyankhondo a Mulungu.

²³Pikhali Davite mu Hebroni anyankhondo azinji akufunziswa mwadidi adadza mbapita m'gulu ya nkhondo ya Davite kumphedza kuti akhale mfumu m'mbuto mwa Sauli ninga montho mudadumbira MBUYA. Kontawo ikhali tenepa:

²⁴Dzinza ya Yuda, amuna amphamvu akukhala na pida pyakugedera napyo matswimo pontho madipa: pikwi pitanthatu na madzana masere;

²⁵Dzinza ya Simioni, amuna akufunziswa mwadidi: pikwi pinomwe na dzana ibodzi;

²⁶Dzinza ya Levi: amuna pikwi pinayi na madzana matanthatu,

²⁷kuthimizapo Yehoiada mkadamu wa banja ya Aroni pabodzi pene na amuna pikwi pitatu na madzana manomwe,

²⁸pontho Zadoki nyankhondo wakuwanga mtima, pabodzi pene na akadamu makumawiri na awiri a m'banjache;

²⁹Dzinza ya Benjemani, amuna akubulukira muna Sauli: pikwi pitatu (kwache anthu azinji a m'dzinza ya Benjemani akhathimiza basi kukhala kunduli kwa Sauli);

³⁰Dzinza ya Eferemu, amuna akuveka m'madzinza mwawo: amuna pikwi makumawiri na madzana masere;

³¹Dzinza ya Manase wakumabulukiro dzuwa, ale adasankhulwa kwenda kampitisa Davite kukhala mfumu: amuna pikwi khumi na pisere;

³²Dzinza ya Isakara, amuna ale akhadziwa pyathema Aisraele kuchita, pontho na ndzidzi wache wadidi wakuchitira penepi: akadamu madzana mawiri pabodzi pene na amuna ale akhali pansi pa utongi wawo;

³³Dzinza ya Zebuloni amuna akuwanga mtima pontho akunyindirika, akusasanyika kumenya nkhondo pontho akufunziswa mwadidi maphatisiro basa a pida pya mtundu onsene: pikwi makumashanu;

³⁴Dzinza ya Nafitali: akadamu chikwi chibodzi pabodzi pene na amuna pikwi makumatatu na pinomwe akukhala na pyakugedera matswimo pontho madipa;

³⁵Dzinza ya Dani, amuna akufunziswa mwadidi: pikwi makumawiri na pisere na madzana matanthatu;

³⁶Dzinza ya Asheri, amuna akusasanyika kumenya nkhondo: pikwi makumanayi.

³⁷Madzinza akumabulukiro dzuwa kwa mkulo wa Yorodani: Rubeni, Gadi, na Manase wakumabulukiro dzuwa, amuna akufunziswa mwadidi kuphatisa basa pida pya mtundu onsene: pikwi dzana na makumawiri.

³⁸Anyankhondo onsenewa, ale akhali akusasanyika kumenya nkhondo, adenda ku Hebroni na mtima wakufuna kuchitisa Davite kukhala mfumu wa Israele. Anthu anango onsene a Israele adaphatizana pabodzi na manyerezero abodzi kumchitisa kukhala mfumu.

³⁹Kweneko adakhalako nsiku zitatu pabodzi pene na Davite kudya na kumwa pidaasasanyira abale awo a m'mudzi mule.

⁴⁰Anthu adadza kuna Davite na mabulu, ngamila, akavalo, na ng'ombe za pachingolo zakuthukula pyakudya; ufa, makuyu, mfesa zakuuma, vinyu, na mafuta aolivi, kubulukira kutali pyakwanga na kumadzinza akumpoto ene; Isakara, Zebuloni, na Nafitali. Iwo adadza pontho na ng'ombe, na mabira kuti aphe adye. Pyonsenepi pikhaonesa kukomerwa kukhali na anthu onsene m'dzikomo.