Read cisena 1 MBIRI 13 Bible Online

1 MBIRI 13 - cisena bible

1 MBIRI 13

¹Mfumu Davite adavunza nzeru kuna akadamu a m'magulu chikwi pontho na a dzana ibodzi.

²Kubuluka penepo iye adalalika kuna Aisraele mbati, “Ngakhala imwe mwatsikimizadi, pontho ngakhala nkhufuna kwa MBUYA, tendeni titumize anyamphangwa kuna anthu onsene, anyansembe na Alevi ene m'maluwani mwawo kuapanga kuti onsene adze kuna ife kuno.

³Kubuluka penepo tinadenda kakwata Bokosi ya Chiverano ya Mulungu, idagwinyira ife pakhundu Sauli mbali mfumu ile.”

⁴Anthu onsene adakomerwa na manyerezero enewo mbaphatizana napyo.

⁵Natenepo Davite adagumanyisa Aisraele kubulukira kudziko yonsene ya Israele kutomera kumadire a Iguputo kumwera kufikirana kumakata a Hamati kumpoto, towera adze na Bokosi ya Chiverano ku Yerusalemu kubulukira ku Kiriati-Yearimu.

⁶Davite pabodzi pene na anthu adenda kumzinda wa Baala, kweneko nkhu Kiriati-Yearimu m'nthemba ya Yuda kakwata Bokosi ya Chiverano ya Mulungu, bokosi ile imbadziwika na dzina ya MBUYA nyakukhala padzulu pa pyakulengwa pyakukhala na maphaphido.

⁷Panyumba ya Abinadabu adabulusa panja Bokosi ya Chiverano mbaikhazika m'chingolo chitswa. Uza na Ahio ndiye akhafambisa chingolocho,

⁸uku Davite na anthu onsene akhavina na mphamvu zawo zonsene kulemedza Mulungu. Iwo adaimba nyimbo na mulomo, pontho na pida pyakuimbira ninga anyakatangale, ng'oma, nkhotcho na ngoma.

⁹Pidafika iwo pambuwa ya Kidoni, ng'ombe zidagwegweduka, tenepo Uza adafuthula mkono wache kuphatirira Bokosi ya Chiverano.

¹⁰Kabodzi kene MBUYA adazhangalira Uza mbampha thangwi ya kukhuya Bokosi ya Chiverano. Uza adafera ponthopo pamaso pa Mulungu,

¹¹tenepo na lero mbuto yeneyo imbachemerwa Perezi-Uza[23] Davite pidampha mtima thangwi MBUYA adamtchunyusa Uza mwakuzhangali.

¹²Tenepo Davite adachita mantha na Mulungu mbalonga mbati, “Apo ndinakwanisa tani kukwata Bokosi ya Chiverano?”

¹³Natenepo Davite hadaikwate tayu kwenda nayo kumzinda wa Yerusalemu. M'mbuto mwache adaisiya kumusa kwa munthu unango dzinache Obedi-Edomu mzika ya mumzinda wa Gati.

¹⁴Bokosi ya Chiverano ile idakhala kweneko miyezi mitatu, tenepo MBUYA adatsanzayisa banja ya Obedi-Edomu na pyonsene pikhali na iye.