Read cisena 1 MBIRI 14 Bible Online

1 MBIRI 14 - cisena bible

1 MBIRI 14

¹Kubuluka penepo Mfumu Hiramu wa kumzinda wa Turo adatuma anyamphangwa kuna Davite pabodzi pene na mitanda yamkungudza, amisiri akumanga zamiyala na anyampala matabwa kuti akamange nyumba yachifumu.

²Natenepo Davite adadzindikira kuti MBUYA akhadamkhazikisa kukhala mfumu wa Israele, pontho kuti akhachitisa ufumu wache kufamba mwadidi thangwi ya udidi wa anthu ache.

³Mu Yerusalemu Davite adasemba akazi anango azinji mbakhala na ana azinji achimuna na achikazi ene.

⁴Madzina a ana adabala iye mwenemo mbawa: Shamua, Shobabu, Natani, Solomoni,

⁵Ibihari, Elishua, Elipeleti,

⁶Noga, Nefegi, Yafia,

⁷Elishama, Beeliada[24] na Elifeleti.

⁸Pidava Afilisti kuti Davite akhadadzozwa kukhala mfumu wa Israele onsene, iwo adenda na anyankhondo awo onsene kamphata, mbwenye Davite adapiva mbaenda kagumanikana nawo.

⁹Afilisti adadza paphedi ya Refaimu mbatoma kuvunga.

¹⁰Davite adavunza Mulungu mbati, “Ayi ndichite nawo nkhondo Afilistiwa? Ayi munandichitisa kuakunda?” MBUYA adatawira mbati, “Ndoko kachite nawo nkhondo pontho ndinakuchitisa kuakunda.”

¹¹Tenepo Davite adaasosa pa Baala-Perazimu mbaakunda. Iye adalonga mbati, “Ninga madzi makulu, Mulungu akunda anyamalwanga pakuphatisa basa manjanga.” Natenepo mbutoyo imbachemerwa Baala-Perazimu.[25]

¹²Pidathawa Afilisti, iwo adasiya m'nduli milungu yawo, tenepo Davite adatonga kuti ipiswe moto.

¹³Kachiwiri kache Afilisti adafika m'phedi mule mbatoma pontho kuvunga.

¹⁴Davite adavunza pontho nzeru Mulungu, tenepo Mulungu adamtawira mbati, “Leka kuasosa na kuno, mbwenye zungulira mbusasanyike kaasosa na kukhundu inangoyo chifupi na miti ya balisamu.

¹⁵Sindzidzi nkhuva upekete-pekete pansonga pamiti ya balisamu, penepo asose, thangwi ine ndinaenda patsogolo pako kakunda anyankhondo a Afilisti.”

¹⁶Davite adachita pidampanga Mulungu, tenepo iye adakwanisa kuthamangisa Afilisti kubulukira ku Geba kwenderatu ku Gezeri.

¹⁷Kuveka kwa Davite kudafalikira kumadziko onsene, tenepo MBUYA adachitisa madzinza onsene kugopa Davite.