Read cisena 1 MBIRI 15 Bible Online

1 MBIRI 15 - cisena bible

1 MBIRI 15

¹Pidamala Davite kumanga nyumbache mumzinda wa Davite, iye adasasanya mbuto kuti Bokosi ya Chiverano ya Mulungu ikhalepo, pontho aimangire chikhumbi.

²Kubuluka penepo Davite adalonga mbati, “Paleke khala munthu unango wakuthukula Bokosi ya Chiverano ya Mulungu, mbwenye Alevi ene basi, thangwi MBUYA adaasankhula kuti athukule Bokosiyo, pontho kuti iwo amtumikire moyo wawo onsene.”

³Davite adachemeresa Aisraele onsene mu Yerusalemu kuti adze na Bokosi ya Chiverano kumbuto idasasanyira iye Bokosiyo.

⁴Kubuluka penepo iye adachemeresa pabodzi pene pidzukulu pyonsene pya Aroni na Alevi.

⁵Kubulukira kuna pidzukulu pya Kohati: Uriele mkadamu na abale ache dzana na makumawiri;

⁶kubulukira kuna pidzukulu pya Merari: Asaia mkadamu na abale ache madzana mawiri na makumawiri;

⁷kubulukira kuna pidzukulu pya Gereshomu: Yowele mkadamu na abale ache dzana na makumatatu;

⁸kubulukira kuna pidzukulu pya Elizafani: Shemaia mkadamu na abale ache madzana mawiri;

⁹kubulukira kuna pidzukulu pya Hebroni: Eliele mkadamu na abale ache makumasere;

¹⁰kubulukira kuna pidzukulu pya Uziele: Aminadabu mkadamu na abale ache dzana na khumi na awiri.

¹¹Tenepo Davite adachemeresa anyansembe awa: Zadoki na Abiatara; pontho na Alevi awa: Uriele, Asaia, Yowele, Shemaia, Eliele, na Aminadabu.

¹²Iye adalonga kuna Alevi mbati, “Imwe ndimwe akadamu a mabanja a Alevi; imwe pabodzi pene na Alevi anzanu mwathema kupichenesa mwekha ene mbamudze na Bokosi ya MBUYA Mulungu wa Israele kumbuto yaisasanyira ine ile.

¹³MBUYA adatizhangalira pakutoma pale thangwi si imwe Alevi ale adathukula Bokosi ya MBUYA tayu. Ife nee tidavunza MBUYA tayu pya mule mwathema ife kupichita njira yakuthema.”

¹⁴Kubuluka penepo anyansembe na Alevi adapichenesa okha ene, towera akwate Bokosi ya Chiverano ya MBUYA Mulungu wa Israele.

¹⁵Alevi adaithukula na miti paphewa pawo ninga montho mukhadalongera MBUYA kudzera muna Mose.

¹⁶Davite adapanga akadamu a Alevi kuti apereke kuna abale awo basa yakuimba pontho kuimba mwakukomerwa pakuphatisa basa bangwe, nyakatangale na nkhotcho.

¹⁷Kubulukira pa magulu a anyakuimba iwo adasankhula amuna ali m'tchindemu kuti aimbe nkhotcho: Hemani mwana Yowele, Asafu mbaleache, ule akhali mwana Berekia, na Etani mwana Kushaia wa nkhonda Merari. Iwo adasankhula Alevi ali m'tchindemu kuti aaphedze kuimba nyakatangale wakukungika mwadidi: Zekaria, Yaaziele, Shemiramoti, Yehiele, Uni, Eliabu, Maaseia, na Benaia. Iwo adasankhula pontho Alevi m'tchindemu kuimba na anyakatangale akuthetha: Matitia, Elifelehu, Mikineia, Azazia na anyakulondali ku Nyumba ya Mulungu, Obedi-Edomu na Yeiele.

²²Na thangwi yakuti Kenania akhali munthu waluso pyakwanga pakuimba, iye adasankhulwa kukhala nyakuyang'anira anyakuimba a Chilevi.

²³Berekia na Elikana pabodzi pene na Obedi-Edomu pontho na Yehia adasankhulwa kukhala anyakulondali Bokosi ya Chiverano. Anyansembe Shebania, Yoshafati, Netanele, Amasai, Zekaria, Benaia na Eliezere adasankhulwa kukhala anyakuliza ngoma patsogolo pa Bokosi ya Chiverano.

²⁵Natenepo Mfumu Davite, akadamu a Aisraele na akadamu a anyankhondo chikwi adenda kumusa kwa Obedi-Edomu kakwata Bokosi ya Chiverano kwenda nayo ku Yerusalemu na kukomerwa kukulu.

²⁶Iwo adapereka nsembe ng'ombe zimuna zinomwe na mabira anomwe thangwi Mulungu akhaphedza Alevi ale kuthukula Bokosi ya Chiverano.

²⁷Davite adavala mkhanjo wakuchena wakufewa ninga montho mudachitira anyakuimba onsene, Kenania mkadamu wawo, pontho na Alevi ale akhathukula Bokosi ya Chiverano. Davite adavala pontho efodi wakuchena.

²⁸Natenepo Aisraele onsene adenda pabodzi pene na Bokosi ya Chiverano ku Yerusalemu uku akuimba mwakukomerwa, kuliza ngoma pontho nyanga za ng'ombe, na kuimba nkhotcho, bangwe na anyakatangale.

²⁹Pikhadza Bokosi ya Chiverano mumzinda wa Davite mule, Mikaela mwana wamkazi wa Sauli adasuzumira na pazhanera mbaona Mfumu Davite akuvina na kunumpha-numpha thangwi ya kukomerwa, tenepo iye adamululupisa mumtima mwache.