Read cisena 1 MBIRI 16 Bible Online

1 MBIRI 16 - cisena bible

1 MBIRI 16

¹Iwo adakwata Bokosi ya Chiverano ile mbakaiikha m'chikhumbi, chidasasanyirwa iyo chile. Kubuluka penepo iwo adapereka nsembe na pyakupereka pyachiphatizano kuna Mulungu.

²Pidamala Davite kupereka nsembe zenezi, adatsanzayisa anthu na dzina ya MBUYA

³mbagawa pyakudya kuna iwo onsene. Iye adapereka kuna mamuna na mkazi onsene mu Israele mkate wamumphu, nthuli ya nyama yakuotcha[26] na chinkhodo cha mfesa zakuuma.

⁴Davite adasankhula Alevi anango kutumikira pa chipembedzo cha MBUYA Mulungu wa Israele patsogolo pa Bokosi ya Chiverano pakumuimbira nyimbo zakumkuza nazo.

⁵Asafu asankhulwa kukhala mkadamu wa gulu yeneyi, Zekaria mbakhala wachiwiriache. Anyakuimba nyakatangale akhali Yeiele, Shemiramoti, Yehiele, Matitia, Eliabu, Benaia, Obedi-Edomu na Yeiele akhaimba nyakatangale. Asafu akhaimba nkhotcho,

⁶pontho anyansembe awiri, Benaia na Yahaziele, akhaliza ngoma mwakukhonda lekeza patsogolo pa Bokosi ya Chiverano.

⁷Ukhali ndzidzi wenewu udatoma Davite kupereka kuna Asafu na Alevi anzache basa yakuimba nyimbo zakukuza nazo MBUYA.

⁸Perekani takhuta kuna MBUYA, lalikani pya ukulu wache; pangani madzinza pinthu pyachita iye.

⁹Imbani nyimbo yakukuza nayo MBUYA; longani pya pinthu pyakudodomesa pyachita iye.

¹⁰Komerwani kuti ife ndife ache; anyakumpembedza onsene mbakomerwe!

¹¹Ndokoni kuna MBUYA kuti mukaphedzwe mbamumpembedze mwakukhonda lekeza.

¹²Imwe pidzukulu pya Yakobo, nyabasa wa Mulungu, imwe pidzukulu pya Israele, ale adasankhulwa na Mulungu, kumbukani pinthu pyakudodomesa pyachita Mulungu, pontho na kutonga kudachita iye.

¹⁴MBUYA ndi Mulungu wathu; matongero ache ngakuna anthu onsene a padziko yapansi.

¹⁵Iye nkhabe duwalira chiverano chache kwenda na kwenda, kudumbira kudachita iye kuna mifendu pikwi-pikwi.

¹⁶Chiverano chidachita iye na Abrahamu, kudumbira kudachita iye kuna Isake.

¹⁷MBUYA adachita Chiverano na Yakobo, chile ntchakwenda na kwenda.

¹⁸Iye adalonga mbati, “ndinakupasa dziko ya Kanani. Yeneyo inakhala yako ene.”

¹⁹Anthu a Mulungu akhali akulengeseka, akuchepa, pontho alendo m'dziko ya Kanani.

²⁰Iwo akhatsalakatika kubulukira dziko kwenda dziko inango, kubulukira ufumu kwenda ufumu unango.

²¹Mbwenye Mulungu hadatawirise munthu na mbodzi ene kuapondereza tayu; kufuna kuatchinjiriza, iye adacheuza mafumu mbati,

²²“Lekani kuwaza anyabasanga akusankhulika; lekani khuya maprofeti anga.”

²³Imbirani MBUYA, imwe anthu a padziko yonsene yapansi! Lalikani nsiku na nsiku mphangwa zadidi kuti iye atipulumusa.

²⁴Lalikani pya demelero yache kuna madzinza, pontho mabasache amphamvu kuna anthu a mtundu onsene.

²⁵MBUYA ngwamkulu pontho iye athema kulemedzwa pikulu pene; iye athema kulemedzwa pikulu pene kupiringana milungu yonsene.

²⁶Milungu ya madzinza anango onsene ndi mifanikizo ene pyawo, mbwenye MBUYA adalenga kudzulu.

²⁷Demelero na chifumu pimbamzungulira, mphamvu na kukomerwa pyadzala m'Nyumba mwache.

²⁸Kuzani MBUYA imwe anthu onsene a padziko yapansi, kuzani demelero yache na mphamvu zache.

²⁹Kuzani dzina yademelero ya MBUYA; dzani na pyakupereka pontho pitani m'Nyumba mwache. Lambani pamaso pa MBUYA, Nyakuchena, ndzidzi unaonekera iye.[27]

³⁰Tetemerani pamaso pache, imwe anthu a padziko yonsene yapansi! Dziko yapansi yakhazikika pambuto pache mwakuti nkhabe tekenyeka tayu.

³¹Komerwani imwe dziko yapansi na thambo! Pyonsene mbapilonge kuna madzinza kuti MBUYA ndi mfumu.

³²Khuwani pikulu nyanza na pyakulengwa pyonsene pili mwenemo; imwe minda na pyonsene pili mwenemo, komerwani!

³³Misitu inakhuwa na kukomerwa pamaso pa MBUYA, iye angabwera dzatonga dziko yapansi.

³⁴Perekani takhuta kuna MBUYA thangwi iye ngwadidi; kutifuna kwache nkhokhonda mala.

³⁵Longani kuna iye kuti, “Tipulumusenimbo ife Mulungu, Nyankhombo wathu; tigumanyiseni pabodzi mbamutipulumusa m'manja mwa madzinza, towera ife tipereke takhuta kuna dzinanu yakuchena, mbatikulemedzani na kukukuzani.”

³⁶Kuzani MBUYA Mulungu wa Israele! Mkuzeni chinchino pontho kwenda na kwenda. Kubuluka penepo Aisraele onsene adalonga mbati, “Ameni, mbakuzwe MBUYA!”

³⁷Mfumu Davite adaikha Asafu na Alevi anzache kukhala anyakuimba pandzidzi wa chipembedzo chile chidachitika pambuto padakoyiwa Bokosi ya Chiverano ile. Iwo akhaphata basawo penepo nsiku na nsiku.

³⁸Obedi-Edomu mwana Yedutuni na amuna makumatanthatu na asere a m'dzinza mwache akhaaphedza. Hosa na Obedi-Edomu ndiye akhali anyakulondali misuwo ya mpanda.

³⁹Zadoki nyansembe na anyansembe anzache ndiye akhayang'anira chipembedzo cha MBUYA pambuto yakupembedzerapo mu Gibeoni.

⁴⁰Machibese na mawulo nsiku na nsiku iwo akhapereka nsembe yakupyerera nyama yamumphu paguwa yansembe malingana na mwambo udapereka MBUYA kuna Aisraele.

⁴¹Penepo pabodzi pene na iwo pakhali Hemani na Yedutuni, pontho na anango ale akhadasankhulwa kukhala anyakuimba kwene nyimbo zakukuza nazo MBUYA thangwi ya kutifuna kwache kokhonda mala.

⁴²Hemani na Yedutuni akhali pontho na basa yakuliza ngoma, na kuimba nkhotcho pontho na pyakuimbira pinango, kuimba nyimbo zakukuza nazo MBUYA. Anthu a m'banja ya Yedutuni basawo ikhali yakulondali misuwo ya mpanda.

⁴³Kubuluka penepo munthu onsene adenda kumusa kwache, Davite adendambo kumusa kwache katsanzayisa banjache.