Read cisena 1 MBIRI 18 Bible Online

1 MBIRI 18 - cisena bible

1 MBIRI 18

¹Pidagwanda ndzidzi pang'ono, Mfumu Davite adasosa pontho Afilisti mbaakunda. Iye adapokosera mzinda wa Gati na midzi yakuzungulira m'manja mwa Afilisti.

²Iye adakunda pontho a Moabu mbakhala pansi pa utongi wache mbakhoma msonkho kuna iye.

³Kubuluka penepo Davite adasosa Mfumu Hadadezere wa ku Zoba chifupi na nthemba ya Hamati, thangwi Hadadezere akhayesa-yesa kukhazikisa utongi wache m'nthemba ya chifupi na mkulo wa Yufurate.

⁴Davite adaphata anyankhondo a pachingolo chikwi, amuna a pakavalo pikwi pinomwe na anyankhondo akufamba pansi pikwi makumawiri. Iye adakoya akavalo akukwana kukweya pingolo dzana mbagwanda uzingo anango onsene akusalirawo.

⁵Pidatumiza Aaramu a ku Damasiko gulu ya ankhondo kaphedza Mfumu Hadadezere, Davite adaisosa mbapha amuna pikwi makumawiri na piwiri.

⁶Kubuluka penepo iye adamanga misasa ya nkhondo m'nthemba yawoyo, tenepo Aaramu adakhala pansi pa utongi wache mbakhoma msonkho kuna iye. MBUYA adachitisa Davite kukunda konsene kwene kukhaenda iye.

⁷Davite adapokosera pyakugedera matswimo pyagolidi pikhadathukula mathubu a Hadadezere mbaenda napyo ku Yerusalemu.

⁸Iye adakwata pontho nkuwa uzinji ene kubulukira ku Tibihati na Kuni, mizinda ikhatongwa na Hadadezere ile. Solomoni adaphatisa basa nkuwa wenewu kusasanyira phiso ikulu yakukoyera madzi, nsanamira ziwiri, na pyombo pinango pyankuwa m'Nyumba ya MBUYA.

⁹Mfumu Toi wa ku Hamati adava kuti Davite akhadakunda anyankhondo onsene a Hadadezere.

¹⁰Natenepo iye adatuma mwanache Yoramu kapasa mwenyikiro na kuchita makolokoto Mfumu Davite, thangwi ya kukunda kwache Hadadezere, ule akhadachitambo nkhondo na Toi kazinji kene. Yoramu adenda kuna Mfumu Davite na mitukwa ya golidi, siliva na nkuwa.

¹¹Mfumu Davite adaipambulira kuna MBUYA kuti iphatiswe basa pachipembedzo, pabodzi pene na siliva pontho golidi pikhadakwata iye kuna madzinza adakunda iye ale; Aedomu, Amoabu, Aamoni, Afilisti na Aamaleki.

¹²Abishai ule mache akhali Zeruia adakunda Aedomu m'phedi ya Munyu mbapha amuna pikwi khumi na pisere.

¹³Iye adamanga misasa ya anyankhondo ponsene pene mu Edomu, tenepo anthu onsene kweneko adakhala pansi pa utongi wa Davite. MBUYA adachitisa Davite kukunda konsene kwene kukhaenda iye.

¹⁴Davite adatonga dziko yonsene ya Israele mbaonesesa kuti ndzidzi onsene anthu ache akuchitirwa chilungamo pontho pyakuthema.

¹⁵Yoabu mbaleache Abishai akhali mkadamu wa anyankhondo: Yehosafati mwana Ahiludi akhali nyakulemba pya m'dziko.

¹⁶Zadoki mwana Ahitubu na Ahimeleki mwana Abiatara akhali anyansembe; Shavisha akhali nyakulemba m'thando ya miseru;

¹⁷Benaia mwana Yehoiada akhali wakuyang'anira a anyakulondali a Chikereti na a Chipeleti; ana a Mfumu Davite akhali mathubu akulu mu ufumu wache.