Read cisena 1 MBIRI 19 Bible Online

1 MBIRI 19 - cisena bible

1 MBIRI 19

¹Pidagwanda ndzidzi pang'ono Mfumu Nahashi wa ku Amoni adafa, tenepo mwanache Hanuni adapita ufumu m'mbuto mwache.

²Davite adalonga mbati, “Ine ndinati ndikomere mtima Hanuni mwana Nahashi ningambo mudandikomera mtima babache.” Tenepo Davite adatuma anyamphangwa kuna Hanuni kuonesa nsisi zache. Pidafika iwo ku Amoni kuna Mfumu Hanuni kamuombera,

³akadamu a ku Amoni adalonga kuna mfumu mbati, “Ayi mukunyerezera kuti Davite atuma anyamphangwa kuna imwe kufuna kuonesa nsisi zache thangwi ya kufuna kulemedza babanu? Nkhabe, tayu! Iye adaatuma kuno ninga anyakuzonda dziko, towera aipokosere!”

⁴Hanuni adaphata anyamphangwa adatumwa na Davite ale mbaachinga ndevu. Iye adang'amba nguwo zawo kutomera pansi mpakana m'matako mbaagwinya kuti aende pyawo.

⁵Iwo akhachita manyadzo pyakwanga kuti abwerere kwawo. Pidava Davite pinthu pidachitika pile, iye adatuma mphangwa kaapanga kuti abange khala pyawo ku Yeriko mbabwerera mwenemo ndevu zawo zamera pontho.

⁶Mfumu Hanuni na Aamoni adadzindikira kuti iwo akhadachitisa Davite kukhala nyamalwawo, natenepo iwo adatumiza siliva wakulemera makilogramu pikwi makumatatu na pinayi kubwereka pingolo na anyakutekenyache kubulukira ku Mesopotamia, Aramaaka na Zoba.

⁷Pingolo pikwi makumatatu na piwiri pidabwereka iwo pile pabodzi pene na gulu ya anyankhondo a mfumu wa ku Maaka adadza mbamanga misasawo chifupi na Medeba. Aamoni adabulukambo m'mizinda mwawo mbasasanyika kumenya nkhondo.

⁸Pidapiva Davite, adatuma Yoabu pabodzi pene na anyankhondo onsene kamenya nkhondo.

⁹Aamoni adabuluka mbakakhala m'mbuto zawo zankhondo pamsuwo wa mzindawo ukulu wa Raba, mwenemo mafumu akhadadza dzamphedza ale, akhala m'mbuto zawo za nkhondo m'minda.

¹⁰Yoabu adaona kuti patsogolo pache na m'nduli mwache pakhali magulu anyankhondo, tenepo iye adasankhula magulu a nkhondo akunyindirika mu Israele mbaaikha m'mbuto zawo zankhondo mwakuyang'anisana na Aaramu.

¹¹Iye adaikha anyankhondoche anango akusalirawo pansi pa utongi wa Abishai mbaleache, ulembo adaaikha m'mbuto zawo zankhondo mwakuyang'anisana na Aamoni.

¹²Yoabu adalonga kuna iye mbati, “Ngakhala unaona Aaramu akundikunda, idza undiphedze, tenepo inembo ndingaona Aamoni akukukunda, ndinati ndidze dzakuphedza.

¹³Wangisa pontho wanga mtima! Tende timenyere nkhondo anthu athu, pontho na mizinda ya Mulungu wathu mwakuwangisa. Kufuna kwa MBUYA mbakuchitike!”

¹⁴Yoabu na amunache adenda kasosa, tenepo Aaramu adathawa.

¹⁵Pidaona Aamoni kuti Aaramu akuthawa, iwombo adathawa pamaso pa Abishai mbaenda kapita mumzindamo. Tenepo Yoabu adabwerera ku Yerusalemu.

¹⁶Pidadzindikira Aaramu kuti iwo adakundwa na Aisraele, iwo agumanyisa pabodzi pene magulu ankhondo Aaramu akumabulukiro dzuwa a mkulo wa Yufurate, mbaaikha pansi pa utongi wa Shobaki, mkadamu wa anyankhondo a Mfumu Hadadezere wa ku Zoba.

¹⁷Pidava Davite penepi, adagumanyisa pabodzi magulu ankhondo a Aisraele. Iwo adawambuka mkulo wa Yorodani mbaaikha m'mbuto zawo zankhondo mwakuyang'anisana na Aaramu. Nkhondo idaotoka,

¹⁸tenepo Aisraele adathamangisa anyankhondo a Aaramu kuabwezera m'nduli. Davite na amunache adapha anyakufambisa pingolo pikwi pinomwe pontho na anyankhondo akufamba pansi pikwi makumanayi. Iwo adapha pontho Shobaki, mkadamu wa anyankhondo wa Aaramu.

¹⁹Pidadzindikira mafumu, ale akhali pansi pa utongi wa Hadadezere kuti iwo akhadakundwa na Aisraele, adachita mtendere na Davite. Tenepo iwo adakhala pansi pa utongi wa Davite. Aaramu hadapifuneve pontho tayu kuphedza Aamoni.