Read cisena 1 MBIRI 20 Bible Online

1 MBIRI 20 - cisena bible

1 MBIRI 20

¹M'mainja pandzidzi wa chaka ukhaenda mafumu kunkhondo, Yoabu adatsogolera gulu ya anyankhondo mbachita nkhondo na dziko ya Amoni. Iye adadza ku Raba, adauzungulira na anyankhondo ache, adausosa mbauvunga, mbwenye Davite adasalira mu Yerusalemu.

²Mfanikizo wa Aamoni dzinache Moleki ukhali na chipewu chachifumu chagolidi, ule ukhalemera makilogramu makumatatu na mashanu. Mwenemo mukhali miyala yakudula, tenepo Davite adaikwata mbaiikha m'chipewu chache chachifumu. Iye adakwata pontho pinthu pizinji kubulukira mumzindamo.

³Iye adakwata anthu a mumzindawo mbaakhakhamiza kuphata basa na mipeni ya macheka, mapaza na mbadzo. Iye adachita pontho chibodzi-bodzi kuna anthu onsene a m'maluwani anango a Amoni. Kubuluka penepo iye na amunache adabwerera ku Yerusalemu.

⁴Pidagwanda ndzidzi padaotoka pontho nkhondo na Afilisti pa Gezeri. Wenewu ukhali ndzidzi ule Sibekai wa ku Husha adapha Sipai munthu wakujintcha, pontho Afilisti adakundwa.

⁵Padaotoka pontho nkhondo inango na Afilisti, tenepo Elihanani mwana Yairi adapha Lahimi mbaleache Goliati wa ku Gati, ule dipache ikhali na ntchindu ninga mtanda wakulukira nguwo.

⁶Padaotoka pontho nkhondo inango na Afilisti pa Gati, kule kukhali munthu wakujintcha pyakwanga wakukhala na pyala pitanthatu dzanja yonsene, pontho pyala pitanthatu dzinyalo yonsene. Iye akhali chidzukulu cha anthu akujintcha akaleletu.

⁷Iye adashola Aisraele, tenepo Yonatani, mwana Shimea, mbaleache Davite, adampha.

⁸Anthu atatuwa, ale adaphiwa na Davite, pontho na amunache, akhali pidzukulu pya anthu akujintcha a ku Gati.