Read cisena 1 MBIRI 21 Bible Online

1 MBIRI 21 - cisena bible

1 MBIRI 21

¹Satana akhafuna kudzesa nyatwa pana anthu a Israele, natenepo adachitisa Davite kunyerezera pyakuchitisa kalembera.

²Davite adalonga kuna Yoabu na kuna akadamu anango mbati, “Ndokoni mu Israele monsene kutomera nkhomo mpakana nkhomo inango ya dziko, mbulengese anthu, thangwi ndafuna kudziwa konta ya anthu ali muno.”

³Yoabu adatawira mbati, “MBUYA mbachitise Aisraele kuinjipa kadzana kupiringana ninga muna iwo chinchinomu! Mbuya Mfumu, onsene mbanyabasanu, thangwi yache ninji munafuna kuchita penepi mbamuchitisa Aisraele onsene kudawa?”

⁴Mbwenye mfumu adamchitisa Yoabu kuvera matongero ache. Yoabu adafamba-famba m'dziko yonsene ya Israele. Pidamala iye adabwerera ku Yerusalemu.

⁵Iye adapanga Mfumu Davite konta ya amuna akukwanisa kumenya nkhondo: Mu Israele mukhali amuna pikwi-pikwi na pikwi dzana; pontho mu Yuda pikwi madzana manayi na makumanomwe.

⁶Na thangwi yakuti Yoabu hadakomerwe na pidatonga mfumu pile tayu, iye hadalengese anthu a m'dzinza ya Levi na Benjemani tayu.

⁷Pinthu pidachitikapyo Mulungu pidamuipirwa, natenepo adatchunyusa Israele.

⁸Davite adalonga kuna Mulungu mbati, “Ine ndadawa pikulu pene thangwi ya kuchita penepi! Ndaphata miyendo ndilekerereni. Ine ndachita pinthu pyakupupwa.”

⁹Tenepo Mulungu adalonga kuna Gadi mprofeti wa Davite mbati,

¹⁰“Ndoko ukampange Davite kuti ndikumpasa mwayi asankhule chinthu chibodzi papinthu pitatupi: chinasankhula iyecho ndiye chinafuna ine kuchichita.”

¹¹Gadi adenda kuna Davite mbakampanga pyonsene pikhadalonga MBUYA mbamvunza mbati, “Ntchipi chinafuna imwe?

¹²Njala pyaka pitatu? Penu miyezi mitatu mukuthawa anyamalwanu? Penu nsiku zitatu MBUYA akukhamwadzeni na talasadache, pontho adzese muliri m'dziko mwanu pakuphatisa basa mngelo wache kudzesa imfa mu Israele monsene? Longani ndikampangenji nyakundituma ule?”

¹³Davite adatawira kuna Gadi mbati, “Ndili panyatwa ikulu! Mbwenye ine nee ndinafuna kutchunyuswa na anthubi. MBUYA makayo ndiye anditchunyuse thangwi iye ngwakuva nsisi.”

¹⁴MBUYA adatumiza muliri pakati pa Aisraele, tenepo anthu pikwi makumanomwe adafa.

¹⁵Kubuluka penepo adatuma mngelo wache kwenda kavunga Yerusalemu, mbwenye iye adasanduza manyerezero ache mbalonga kuna mngelo ule mbati, “Pyakwana! Bweza mkono wako.” Mngelo ule akhadaimira chifupi na mbuwa ya Arauna wa Chiyebusi.

¹⁶Davite adaona mngelo aimira chidzulu-dzulu, uku aphatira talasada m'manja mwache kusasanyika kuti avunge Yerusalemu. Davite pabodzi pene na akulu-akulu onsene, ale akhadavala masakha, adalamba.

¹⁷Davite adapemphera mbati, “Mulungu, ndine ndachita pinthu pyakudawika. Ndine ndatonga anthuwa kuti achite kalembera. Apo anthumbo pyawowa achitanji? MBUYA Mulungu wanga tchunyusani ine na banjanga mbamuleke anthu anuwa.”

¹⁸Mngelo wa MBUYA adapanga Gadi kulonga kuna Davite kuti aende kamangira MBUYA guwa yansembe pambuwa ya Arauna wa Chiyebusi.

¹⁹Davite adavera matongero a MBUYA mbaenda kachita ninga montho mukhadampangira Gadi.

²⁰Pambuwa pale, Arauna na anache akhabubuda tirigu, tenepo pidaona iwo mngelo ule, anache ale adathawa mbabisala.

²¹Sindzidzi Arauna nkhuona Mfumu Davite akufika pambuwa pale, adabuluka pambuwa pale mbalamba pamaso pache.

²²Davite adalonga kuna iye mbati, “Ndigulise mbuwakoyi, towera ndimangirepo MBUYA guwa yansembe kuti muliriwu umale. Ndinati ndiigule pa kontache.”

²³Arauna adatawira mbati, “Ikwateni pyanu, Mfumu, mbumuchitepo chonsene chinafuna imwe. Kwatani ng'ombe kuti zikhale nsembe zakupyerera, pontho na miti yakububudira kuti ikhale nkhuni pabodzi pene na tirigu kuti akhale chakupereka. Pyonsenepi ndikukupasani.”

²⁴Mbwenye mfumu adatawira mbati, “Nkhabe, ndinati ndikupagali kontache. Ine nkhabe pereka chinthu chako, penu chinthu chakupaswa pezi kukhala chakupereka kuna MBUYA tayu.”

²⁵Tenepo iye adapereka kuna Arauna kobiri zagolidi zakukwana madzana matanthatu, kugula mbuwa ile.

²⁶Iye adamangira MBUYA guwa yansembe mbaperekapo nsembe zakupyerera na pyakupereka pyachiphatizano. Iye adapemphera, tenepo MBUYA adatawira pakutumiza moto kubulukira kudzulu mbupyereza nsembe zikhali paguwa pale.

²⁷MBUYA adapanga mngelo ule kuti abuluse talasadache, tenepo mngelo ule adaveradi.

²⁸Pandzidzi wenewo, pidaona Davite kuti MBUYA ava kupempha kwache, iye adapereka nsembe paguwa pambuwa ya Arauna.

²⁹Pandzidzi wenewu Chikhumbi cha Mulungu na guwa yansembe, pale pakhaperekwa nsembe zakupyerera, pile pikhadasasanya Mose m'thando yatchetcha, pikhali pambuto yakupembedzerapo mu Gibeoni;

³⁰kwache Davite hadakwanise kwendako tayu kapembedza Mulungu, thangwi akhagopa talasada ya mngelo wa MBUYA.