Read cisena 1 MBIRI 23 Bible Online

1 MBIRI 23 - cisena bible

1 MBIRI 23

¹Pidakalamba Davite adapitisa Solomoni mwanache ufumu wa Israele m'mbuto mwache.

²Mfumu Davite adagumanyisa akadamu onsene a Israele pabodzi pene na anyansembe pontho Alevi.

³Iye adachitisa kalembera wa amuna onsene a Chilevi akukwanisa pyaka makumatatu pyakubalwa. Onsene pabodzi pene adakwana pikwi makumatatu na pisere.

⁴Mfumu adaikha amuna pikwi makumawiri na pinayi kuyang'anira basa ya pa Nyumba ya MBUYA, pikwi pitanthatu kukhala mathubu na anyakutonga miseru,

⁵pikwi pinayi kukhala anyakulondali, pontho na pikwi pinayi kukhala anyakukuza MBUYA pakuphatisa basa pida pyakuimbira pile pidapereka mfumu kuti piphate basa yeneyi.

⁶Davite adagawa Alevi ale m'magulu matatu malingana na mabanjawo: Gereshomu, Kohati na Merari.

⁷Gereshoni adabala ana awiri achimuna: Ladani na Shimei.

⁸Ladani adabala ana atatu achimuna: Yehiele, Zetamu, na Yowele,

⁹ale akhali akadamu a pidzukulu pya nkhonda Ladani. (Shimei adabala ana atatu achimuna Shelomoti, Haziele, na Harani.)

¹⁰Shimei adabala ana anayi achimuna: Yahati, Ziza, Yeushi, na Beria, kutomera wautombo kufikirana chimalisira bele. Yeushi na Beria hakhali na pidzukulu pizinji tayu, natenepo onsene adalengeswa ninga nkhonda ibodzi.

¹²Kohati adabala ana anayi achimuna: Amuramu, Izihara, Hebroni, na Uziele.

¹³Mwanache wautombo, Amuramu, ndiye akhali babawo Aroni na Mose. Aroni na pidzukulu pyache adapambulwa, towera akhale anyakuyang'anira pinthu pyakupambulika kwenda na kwenda, kufukiza pyakununkhira kupembedza MBUYA, kumtumikira, pontho kutsanzayisa anthu na dzinache.

¹⁴Mbwenye ana a Mose, munthu wa Mulungu, adaikhwa m'gulu ya Alevi.

¹⁵Mose adabala ana awiri achimuna: Gereshomu na Eliezere.

¹⁶Mkadamu wa ana a Gereshomu akhali Shebuele.

¹⁷Eliezere akhali na mwana mbodzi basi dzinache Rehabia, kwache Rehabia akhali na pidzukulu pizinji.

¹⁸Mwana wachiwiri wa Kohati, Izihara adabala mwana wamamuna dzinache Shelomiti mkadamu wa nkhonda yeneyi.

¹⁹Mwana wachitatu wa Kohati, Hebroni adabala ana anayi achimuna: Yeria, Amaria, Yahaziele, na Yekameamu.

²⁰Mwana wachinayi wa Kohati, Uziele adabala ana awiri achimuna: Mika na Ishia.

²¹Merari adabala ana awiri achimuna: Mahili na Mushi. Mahili akhali na ana awiri achimuna: Eleazara na Kishi,

²²mbwenye Eleazara adaferamo nee bala mwana wamamunabi, mbwenye ana achikazi okhokha: Anache achikaziwo adasembwa na abale awo, ana achimuna a Kishi.

²³Mushi adabala ana atatu achimuna: Mahili, Ederi, na Yeremoti.

²⁴Penepi ndiye pikhali pidzukulu pya Levi malingana na mabanjawo, munthu onsene akhalembesa dzinache. Chidzukulu chonsene chakukwanisa pyaka makumawiri pyakubalwa kwenda m'tsogolo akhali na khundu yache pabasa ya Nyumba ya MBUYA.

²⁵Davite adalonga mbati, “MBUYA Mulungu wa Israele akhadapereka mtendere kuna anthu ache, natenepo iye ene mwenechiro anakhala mu Yerusalemu kwenda na kwenda.

²⁶Natenepo nee panafunikave Alevi kuthukula Chikhumbi cha Mulungu na pyonsene pyakuphatiswa basa pa chipembedzo tayu.”

²⁷Malingana na upangizi wakumalisa udapereka Davite, Alevi onsene akhapaswa basa angafika pyaka makumawiri penu kupiringana penepo.

²⁸Basa ya Alevi ikhali yakuphedza pidzukulu pya Aroni kutumikira m'Nyumba ya MBUYA, kuyang'anira mwadidi pintalo na masubi ache ene, pontho kuonesesa kuti chinthu chonsene chakupambulika chileke swipiswa;

²⁹kuyang'anira mikate yakuperekwa kuna Mulungu, ufa wakuphatiswa basa pa pyakupereka, pitumbuwa pyakusowa chakufufumisira na pyakupereka pyakuchita kuterekwa pontho na ufa wakuvungazwa na mafuta aolivi; kupima na kuyesa pyakupereka pya ku Nyumba ya Mulungu,

³⁰pontho kukuza na kupereka demelero kuna MBUYA machibese na mawulo onsene,

³¹na pandzidzi onsene unaperekwa nsembe kuna MBUYA pa Nsiku Yakupuma, pa Phwando yakusekera Kubalwa kwa mwezi na maphwando anango akusankhulika. Matongero adasasanywa kulonga konta chadi-chadi ya Alevi ale adathema kuphata basa yeneyi pandzidzi wawo wakuthema. Alevi adapaswa basa yakupembedza MBUYA ndzidzi onsene.

³²Alevi adapaswa basa yakuyang'anira Chikhumbi cha Mulungu na Mbuto Yakuchena, pontho na kuphedza abale awo, pidzukulu pya Aroni, m'Nyumba ya Mulungu.