Read cisena 1 MBIRI 26 Bible Online

1 MBIRI 26 - cisena bible

1 MBIRI 26

¹Ali m'tchindemu mba Levi ale adapaswa basa ya kulondali Nyumba ya Mulungu. Kubuluka kubanja ya Kora kukhali Meshelemia mwana Kore wa m'banja ya Asafu.

²Iye adabala ana anomwe achimuna, kutomera wautombo kufikirana chimalisira bere mbawa: Zekaria, Yediaele, Zebadia, Yatiniele,

³Elamu, Yehohanani, na Eliehoenai.

⁴Pakhali pontho munthu unango dzinache Obedi-Edomu, ule adatsanzayiswa na Mulungu pakumpasa ana asere achimuna, kutomera wautombo kufikirana chimalisira bere mbawa: Shemaia, Yehozabadi, Yoa, Sakari, Netanele,

⁵Amiele, Isakara, na Peuletai.

⁶Shemaia mwana wautombo wa Obedi-Edomu adabala ana atanthatu achimuna: Otini, Refaele, Obedi, Elizabadi, Elihu, na Semakia. Enewa akhali amuna akufunika pyakwanga m'banja mwawomo thangwi ya kupikwanisa kwawo kukulu, maka amuna awiri akumalisirawa akhali aluso pyakwanga.

⁸Banja ya Obedi-Edomu ikhali na amuna makumatanthatu na awiri anyakudziwisisa mwadidi basa yeneyi.

⁹Banja ya Meshelemia ikhali na amuna khumi na asere anyakupidziwisisa mwadidi.

¹⁰Kubulukira kubanja ya Merari, kukhali Hosa, ule adabala ana anayi achimuna: Shimri (babache adamchitisa kukhala mkadamu, podi kwene kuti hakhali mwana wautombo tayu),

¹¹Hilikia, Tebalia, na Zekaria. Anthu onsene a m'banja ya Hosa akhalipo khumi na atatu, ale basawo ikhali yakulondali Nyumba ya Mulungu.

¹²Anyakulondaliwa adagawiwa m'magulu malingana na mabanjawo pontho akhapaswa basa m'Nyumba ya Mulungu ninga montho mukhachitirwambo Alevi anangowo.

¹³Banja yonsene, penu njing'ono penu njikulu, akhachita ntsango basi, towera aone msuwo unafuna iwo kulondali.

¹⁴Shelemia adasankhulwa kulondali msuwo wa mpanda wakumabulukiro dzuwa. Zekaria, mwana Shelemia, phungu wanzeru ule, adasankhulwa kulondali msuwo wa mpanda wakumpoto.

¹⁵Obedi-Edomu adasankhulwa kulondali msuwo wa mpanda wakumwera, pontho anache akhali anyakulondali masubi akukoyeramo pinthu.

¹⁶Shupimu na Hosa adasankhulwa kulondali msuwo wa mpanda wakumadokero dzuwa, pontho na msuwo wa Shaleketi kumtunda. Basa yakulondaliyi ikhaphatika pakuchita buswa-buswa.

¹⁷Kumabulukiro dzuwa anyakulondali atanthatu ndiye akhaphata basa pansiku, kumpoto kukhali anayi, pontho kumwera anayi. Anyakulondali anayi nsiku na nsiku akhaikhwa pamsuwo wa masubi akukoyeramo pinthu, awiri kada msuwo.

¹⁸Kuchintalo kumadokero dzuwa kukhali anyakulondali anayi chifupi na msewu, pontho awiri pachintalo makapo.

¹⁹Enewa ndiye akhali anyakulondali pa misuwo, ale akhali pidzukulu pya Kora na Merari.

²⁰Alevi anango[29] basawo ikhali kuyang'anira mfuma ya m'Nyumba ya Mulungu na masubi akukoyeramo mitukwa yakuperekwa kuna Mulungu.

²¹Ladani, mbodzi wa ana achimuna a Gereshoni, akhali kholo ya magulu a mabanja azinji, kuthimizapo banja ya mwanache Yehiele.

²²Ana anango achimuna a Ladani awiri Zetamu na Yowele basawo ikhali kuyang'anira mfuma ya m'Nyumba ya Mulungu na m'masubi akukoyeramo pinthu.

²³Mabasa anango adaperekwa pontho kuna pidzukulu pya Amuramu, Izihari, Hebroni, na Uziele.

²⁴Shebuele wa m'banja ya mwana Mose, Gereshomu akhali mkadamu wamkulu pa kuyang'anira mfuma ya m'Nyumba ya Mulungu.

²⁵Kudzera muna Eliezere mbaleache Gereshomu, pakhali ubale pakati pa iye na Shelomoti. Eliezere adabala Rehabia, Rehabia adabala Yeshaia, Yeshaia adabala Yoramu, Yoramu adabala Zikiri, Zikiri adabala Shelomoti.

²⁶Shelomoti na anthu a m'banja mwache basawo ikhali yakuyang'anira mitukwa yakuperekwa kuna Mulungu na Mfumu Davite, mafumu a mabanja, akadamu a m'magulu-magulu, na akadamu a anyankhondo.

²⁷Iwo adakwata pinango pidapokosera iwo pankhondo mbapipereka kuti piphatiswe basa m'Nyumba ya Mulungu.

²⁸Shelomoti na a m'banja mwache ndiye adapaswa basa yeneyi yakuyang'anira pyonsene pyakuperekwa kuti piphatiswe basa m'Nyumba ya Mulungu kuthimizapo mitukwa idadza na mprofeti Samuele, Mfumu Sauli, Abineri mwana Neri na Yoabu mwana Zeruia.

²⁹Pakati pa pidzukulu pya Izihara, Kenania na anache adapaswa basa inango ene kunja kwa Nyumba ya Mulungu ninga mathubu a Aisraele pontho anyakutonga miseru pakati pawo.

³⁰Pakati pa pidzukulu pya Hebroni, Hashabia na abale ache chikwi chibodzi na madzana manomwe, onsene amphamvu zawo, adapaswa basa yakufambisa pinthu pyonsene pya chipembedzo cha MBUYA na kutumikira mfumu pakati pa Aisraele kukhundu yakumadokero dzuwa a mkulo wa Yorodani.

³¹Yeria akhali mkadamu wa pidzukulu pya Hebroni. Chaka chamakumanayi Davite mbali mfumu, pidzukulu pya Hebroni pidasakwa mwadidi mwene panyandandanda wa makolo awo. Tenepo anyankhondo amphamvu a m'banja yeneyi adagumanwa kuti akukhala ku Yazere m'nthemba ya Gileadi.

³²Mfumu Davite adasankhula akadamu amphamvu pikwi piwiri na madzana manomwe a mabanja a mbaleache Yeria mbaaikha kukhala anyakufambisa pinthu pyonsene pya chipembedzo cha MBUYA na kutumikira mfumu pakati pa Aisraele kukhundu yakumabulukiro dzuwa a mkulo wa Yorodani m'nthemba za Rubeni, Gadi na Manase wakumabulukiro dzuwa.