Read cisena 1 MBIRI 28 Bible Online

1 MBIRI 28 - cisena bible

1 MBIRI 28

¹Mfumu Davite adatonga kuti mathubu onsene a Israele agumanyikane mu Yerusalemu. Natenepo mathubu onsene a m'madzinza, mathubu onsene akufambisa pya ufumu, akadamu a mabanja, anyakuyang'anira pinthu na pifuyo pya mfumu na anache, pabodzi pene na mathubu onsene a kunyumba yachifumu, anyankhondo akuveka, na amuna akufunika adagumanyikana mu Yerusalemu.

²Davite adaimira pamaso pawo mbalonga kuna iwo mbati, “Abale anga ngavani pinalonga inepi. Ine ndikhapifuna pyakwanga kumanga nyumba yakukhazikamo Bokosi ya Chiverano ya MBUYA kuti ikhale chakusanjikapo manyalo a MBUYA Mulungu wathu. Ine ndikhadasasanyika kummangira nyumba,

³mbwenye Mulungu adandikhondesa kuchita tenepo, thangwi ine ndine nyankhondo pontho ndapha anthu azinji.

⁴MBUYA Mulungu wa Israele asankhula ine pabodzi pene na pidzukulu pyanga kuti titonge Israele kwenda na kwenda. Iye adasankhula dzinza ya Yuda kuti mwenemo mubuluke mkadamu. Tenepo pakati pa Ayuda onsene adasankhula banja yeneyi, pidamkomera MBUYA kusankhulapo ine mbandiikha kukhala mfumu wa dziko yonsene ya Israele.

⁵Iye adandipasa ana azinji, mbwenye adasankhulapo Solomoni kukhala pampando wachifumu wa MBUYA kutonga Israele.

⁶“MBUYA adalonga kuna ine mbati, ‘Mwanako Solomoni ndiye anafuna dzandimangira nyumba. Ine ndamsankhula kuti akhale mwananga, inembo kuti ndikhale babache.

⁷Ine ndinachitisa ufumu wache kukhala okhonda mala, ngakhala anakakamira kuvera mwambo na matongero anga onsene ninga munachitira iye chinchinomu.’

⁸“Natenepo lero anthu anga pamaso pa Mulungu wathu na mgumano onsene wa Aisraele, anthu a MBUYA, ndinakupemphani kuti muvere mwadidi mwene pyonsene pidatitonga MBUYA Mulungu wathu, towera dziko yamphonjeyi ithimize kukhala yanu ene, pontho kuti muisiyirembo mifendu inango inadzayo kuti ikhale yawo kwenda na kwenda.”

⁹Kuna Solomoni, iye adalonga mbati, “Mwananga, ndikukupempha kuti umdziwe Mulungu wa babako mbumtumikira na mtimako onsene pontho na nzeru zako zonsene. Iye ambadziwa manyerezero na pikhumbo pyathu pyonsene. Ngakhala unaenda kuna iye, iye anakutambira; mbwenye ngakhala unabauka kubuluka kuna iye, iyembo anakusiya wekha ene kwenda na kwenda.

¹⁰Iwe wathema kudzindikira kuti MBUYA asankhula iwepo kuti ummangire Nyumba yakupambulika. Wangisa pontho phata basayo na chipapu.”

¹¹Davite adapereka kuna Solomoni matandiko a Nyumba ya Mulungu, masubi akukoyeramo pinthu, na masubi anango, pontho na Mbuto Yakuchenesesa kumbalekererwa pyakudawa kule.

¹²Iye adampasa pontho matandiko a pyonsene pikhali na iye m'manyerezero mwache pya pintalo na masubi akuzungulira pintalopyo, pontho na masubi akukoyeramo pinthu pya m'Nyumba ya MBUYA, pontho na mitukwa yakuperekwa kuna MBUYA.

¹³Davite adampanga pya mule mwathema iye kugawa anyansembe na Alevi m'magulu, pya basa yonsene yakutumikira m'Nyumba ya MBUYA, pontho pya kuyang'anira mwadidi pinthu pyonsene pya m'Nyumba ya MBUYA.

¹⁴Iye adampanga pya mdida wa siliva na golidi pidathema iye kuphatisa basa kusasanyira pinthu pya m'Nyumba ya MBUYA:

¹⁵nyale yonsene na chakuikhira chache;

¹⁶mathebulu onsene asiliva, pontho thebulu yonsene yagolidi, pale pambaperekwa mikate kuna Mulungu.

¹⁷Iye adampanga pontho pya mdida wa golidi chadi-chadi adathema iye kuphatisa basa kusasanya pyakujobolera nyama, ndilo na makhomitcho, pontho pya mdida wa siliva adathema iye kuphatisa basa kusasanya mapalato,

¹⁸pya mdida wa golidi chadi-chadi adathema iye kuphatisa basa kusasanya guwa yansembe yakufukizirapo pyakununkhira, pontho kusasanya chingolo cha pyakulengwa pyakukhala na maphaphido pile pimbafuthula maphaphido awo kuphimbira Bokosi ya Chiverano.

¹⁹Mfumu Davite adalonga mbati, “Pyonsenepi pyalembwa malingana na mudandipangira MBUYA mwenechiroache kuti ndipichite.”

²⁰Mfumu Davite adalonga kuna mwanache Solomoni mbati, “Wangisa pontho wanga mtima. Itome basa pontho leka tawirisa chinthu na chibodzi chene kukulekesa. MBUYA, Mulungu wanga, ambatumikira ine ule anakhala nawe. Iye hanakusiya wekha tayu, mbwenye anakhala nawe mpakana umalise basa ya kumanga Nyumba ya MBUYA.

²¹Anyansembe na Alevi apaswa basa kuti aphate m'Nyumba ya Mulungu. Amuna aluso yakusiyana-siyana asasanyika kukuphedza, pontho anthu na akadamu awo onsene ali pansi pa utongi wako.”