Read cisena 1 MBIRI 29 Bible Online

1 MBIRI 29 - cisena bible

1 MBIRI 29

¹Mfumu Davite adalonga kuna mgumano onsene mbati, “Mulungu ndiye asankhula mwananga Solomoni, kwache iye akhali wamng'ono, pontho iye nkhabe dziwisisa pinthu tayu. Basa inafunika kuti iphatwe njikulu pyakwanga, thangwi si nyumba yakukhala munthu tayu, mbwenye ndi Nyumba ya MBUYA Mulungu.

²Natenepo ine ndayesa-yesa kusasanyiratu pinthu pyonsene pya pa Nyumba yeneyi; golidi, siliva, nkuwa, simbi, matabwa, miyala ya onikisi na miyala yakudula ya mtundu na mtundu, pontho na miyala ya marabule.

³Padzulu pa pyonsenepi ine ndapereka pinthu pyanga pene, siliva na golidi, thangwi ya chipapu changa pana Nyumba ya Mulungu wanga.

⁴Ine ndapereka golidi wadidiletu wa ku Ofiri wakukwana pingolo madzana mawiri na makumawiri, pontho na siliva chadi-chadi wakukwana pingolo madzana manayi na makumasere wakuphopha naye mafufu a Nyumbayo,

⁵pontho na pinthu pyonsene pinafuna kusasanya amisiri aluso. Apo mbani pontho anafuna kupereka mwakufewa manja pyakupereka kuna MBUYA?”

⁶Kubuluka penepo akadamu a mabanja, mathubu a m'madzinza, akadamu a anyankhondo na mathubu akuyang'anira pinthu pya mfumu adapipereka okha ene kupereka

⁷pinthu pili m'tchindemu kuti piphate basa pakumanga Nyumba yeneyi: golidi wakukwana pingolo dzana na makumanomwe, siliva wakukwana pingolo madzana matatu na makumanayi, nkuwa wakukwana pingolo madzana matanthatu na makumawiri, pontho na simbi yakukwana pingolo pikwi pitatu na madzana manayi.

⁸Ale akhali na miyala yakudula akhaipereka kuthumba ya Nyumbayo, ile ikhayang'anirwa na Yehiele Mlevi wa nkhonda Gereshoni.

⁹Anthu adapereka kuna MBUYA mwakufuna kwawo, tenepo iwo adakomerwa pyakwanga pidaona iwo kuti akhadapereka pinthu pizinji pene. Mfumu Davite ndiye adanyanya kukomerwa.

¹⁰Penepo pene pamaso pa mgumano onsene Mfumu Davite adakuza MBUYA mbalonga mbati, “MBUYA Mulungu wa kholo wathu Yakobo mbamukuzwe kwenda na kwenda!

¹¹Imwe ndimwe ene wamkulu pontho wamphamvu, wademelero, nyakukunda, pontho mfumu. Pyonsene pya kudzulu na pya padziko yapansi mphyanu, pontho imwe ndimwe mfumu, mtongi wa anthu onsene.

¹²Mfuma yonsene imbabulukira kuna imwe; imwe mumbatonga pyonsene na mphamvu zanu; tenepo munakwanisa kumchitisa munthu onsene kukhala wamkulu pontho wamphamvu.

¹³Natenepo Mulungu wathu tinapereka takhuta kuna imwe, pontho tinakuza dzinanu yademelero.

¹⁴“Ine na anthu anga ndife animbo kuti tinakwanisa kukupasani pinthu mwakufewa manja ninga tenepa, podi pyonsene pimbabulukira kuna imwe? Chachita ifechi nkhubwezera kwene chinthu chakuti ntchanu kale.

¹⁵Ife ndife alendo pontho anyakugwanda pyawo na njira pamaso panu ninga mudachitira makolo athu. Nsiku za moyo wathu pansi pano wakhala ninga mthunzi; nkhabe khala maka tayu.

¹⁶Tenepo MBUYA Mulungu wathu ife tadza na mfuma yonsene kuti iphatiswe basa kumanga Nyumbanu kuti dzinanu yakuchena ilemedzwemo, kwache pyonsene pyabulukira kuna imwe, pontho pyonsene mphyanu.

¹⁷Ndikupidziwa kuti imwe mumbayesa mtima wa munthu onsene mbamukomerwa na munthu wakulungama. Ine ndapereka pyonsenepi kuna imwe mwakufuna kwanga pontho mwakuona mtima, pontho ndaona anthu anu agumanyikana panowa kuti akomerwa pyakwanga kudza na pyakupereka kuna imwe.

¹⁸MBUYA Mulungu wa makolo athu, Abrahamu, Isake na Yakobo chitisani kupipereka kwachita anthu anuku kukhala kwamphamvu kwenda na kwenda, pontho muachitise kukhala akukhulupirika kuna imwe.

¹⁹Pasani mwananga Solomoni mtima wakufuna kuvera matongero, upangizi na mwambo onsene, pontho kuchita pyonsene kukumangirani Nyumba, ile pizinji pyache ndapisasanya kale.”

²⁰Kubuluka penepo Davite adalonga kuna mgumano onsene mbati, “Kuzani MBUYA Mulungu wanu.” Tenepo anthu onsene udakuza MBUYA Mulungu wa makolo awo. Iwo adalamba kulemedza MBUYA pontho Mfumu Davite.

²¹Mangwana mwache iwo adapha nyama kukhala nsembe, mbazipereka kuna MBUYA. Kubuluka penepo adazipereka kuna anthu kuti adye. Kuthimiza penepo iwo adapereka nsembe ng'ombe zimuna chikwi chibodzi, mabira achimuna chikwi chibodzi, anabira chikwi, ale adapyerezwa amumphu paguwa yansembe. Iwo adadza pontho na chakupereka cha vinyu.

²²Natenepo pansiku yeneyo iwo adakomerwa pyakwanga pidadya na kumwa iwo pamaso pa MBUYA. Iwo adalonga kachiwiri kuti Solomoni ndi mfumu, tenepo adamdzoza na dzina ya MBUYA kukhala mtongi wawo, pontho Zadoki kukhala nyansembe.

²³Natenepo Solomoni adapita ufumu ukhadakhazikisa MBUYA ule m'mbuto mwa Davite babache, natenepo pinthu pyache pyonsene pidamfambira mwadidi, pontho dzinza yonsene ya Israele idamvera.

²⁴Mathubu onsene, anyankhondo onsene podi na ana anango a Davite adadumbira kuti anamvera Solomoni ninga mfumu.

²⁵MBUYA adakwiza Solomoni pyakwanga pamaso pa Aisraele onsene mbamchitisa kukhala wademelero pyakwanga kupiringana mafumu anango onsene akhadatonga Israele ale.

²⁶Davite mwana Yese adatonga Israele

²⁷pyaka makumanayi. Iye adatonga mu Hebroni pyaka pinomwe, pontho mu Yerusalemu pyaka makumatatu na pitatu.

²⁸Iye adafa na unkhalamba wadidi, wakufuma na wakulemedzwa, tenepo mwanache Solomoni adapita ufumu m'mbuto mwache.

²⁹Mbiri ya Mfumu Davite kubulukira pakutoma na kumalisa kwache yalembwa m'mabukhu a maprofeti atatu: Samuele, Natani na Gadi.

³⁰M'mabukhumo alembamo pya kutonga kwache, mphamvu zache na pyonsene pidachitika kuna iye, kuna Israele na kuna mafumu akuzungulira.