Read cisena 1 MBIRI 5 Bible Online

1 MBIRI 5 - cisena bible

1 MBIRI 5

¹Ipi mphidzukulu pya Rubeni, mwana wautombo wa Yakobo. (Na thangwi yakuti iye adagona na mkazi unango wachibitchu wa babache, iye adataya chidzo chautombo, chile chidenda kuna Yosefe.

²Kwache ikhali dzinza ya Yuda ile idasanduka yamphamvu pyakwanga mbikhala yakutonga madzinza anango.)

³Rubeni, mwana wautombo wa Yakobo, adabala ana anayi achimuna: Hanoki, Palu, Hezironi na Karimi.

⁴Yowele adabala Shemaia, Gogi, Shimei, Mika, Reaia, Baala, Beera. Mfumu wa Asiria, Tigilati-Pilesere, adakunda Beera, ule akhali mkadamu wa dzinza yeneyi, mbamkwata unyaperezo.

⁷Mbiri ya banja idalembwa pya nyandandanda wa akadamu a mbumba zili m'tchindemo a m'dzinza ya Rubeni: Yeiele, Zekaria,

⁸na Bela, mwana Azazi, mdzukuluache Shema, wa nkhonda Yowele. Mbumba yeneyi ikhakhala mu Aroeri na m'nthemba yakubulukira kweneko, kumpoto mpakana ku Nebo na Baala-Meoni.

⁹Iwo akhali na pifuyo pizinji, m'nthemba ya Gileadi, natenepo adafalikira mpakana kuthando yatchetcha kumabulukiro dzuwa ile yafumukira kumkulo wa Yufurate.

¹⁰Pandzidzi wa Mfumu Sauli dzinza ya Rubeni idenda mbikasosa Ahagiri mbaapha pankhondo, tenepo adakwata dziko yawoyo kukhundu yonsene yakumabulukiro dzuwa a Gileadi.

¹¹Dzinza ya Gadi ikhakhala kumpoto kwa dzinza ya Rubeni m'nthemba ya Bashani mbafikiratu mpakana chakumabulukiro dzuwa ku Saleka.

¹²Yowele ndiye akhali mkadamu wamkulu mu Bashani; Shafamu ndiye akhali wachiwiriache, kubuluka penepo Yanai na Shafati.

¹³Abale awo, ale akhali akadamu a mbumba zawo, mbawa: Mikaele, Meshulamu, Sheba, Yorai, Yakani, Zia na Eberi, onsene pabodzi akhalipo anomwe.

¹⁴Iwo akhali pidzukulu pya Abihaili mwana Huri, mwana Yaroa, mwana Gileadi, mwana Mikaele, mwana Yeshishai, mwana Yahido, mwana Buzi.

¹⁵Ahi, mwana Abidiele, mdzukuluache Guni, ndiye akhali mkadamu wa mbumba zenezi.

¹⁶Iwo adakhala m'nthemba ya Bashani na Gileadi m'maluwani a kweneko na mbuto zonsene zakudyesera pifuyo za Sharoni.

¹⁷Mbiri yeneyi idalembwa nsiku za Yotamu mfumu wa Yuda na Yeroboamu wachiwiri mfumu wa Israele.

¹⁸M'madzinza a Rubeni, Gadi na Manase wakumabulukiro dzuwa pakhali anyankhondo pikwi makumanayi na anayi pontho na madzana manomwe na makumatanthatu. Iwo akhadafunziswa mwadidi maphatisiro basa a pyakugedera matswimo, matalasada na mauta.

¹⁹Iwo adenda kamenya nkhondo na madzinza a Hagiri, Yeturi, Nafishi na Nodabu.

²⁰Iwo adanyindira Mulungu mbapempha chiphedzo kuna iye, natenepo Mulungu adava kupemphera kwawo mbaapasa mphamvu zakukunda nazo Ahagiri pabodzi na magulu onsene akhali na iwo gulu ibodzi.

²¹Iwo adapokosera anyamalwa ngamila pikwi makumashanu, mabira pikwi madzana mawiri na makumashanu, mabulu pikwi mbakwata pontho anthu unyaperezo pikwi dzana.

²²Iwo adapha anyamalwa azinji, thangwi nkhondoyo kukhali kufuna kwa Mulungu. Tenepo iwo adathimiza kukhala m'nthemba yeneyo kufikirana nsiku idakwatwa iwo kwenda kudziko ya unyaperezo.[9]

²³Dzinza ya Manase yakumabulukiro dzuwa idakhazikika m'nthemba yakumpoto kwa Bashani mbifikiratu ku Baala-Herimoni, Seniri na Phiri ya Herimoni, tenepo iwo adabalana pyakwanga.

²⁴Ali m'tchindemu akhali akadamu a mbumba zawo: Eferi, Ishi, Eliele, Aziriele, Yeremia, Hodavia na Yahidiele. Onsenewa akhali anyankhondo amphamvu, akuveka pontho akadamu a mabanjawo.

²⁵Mbwenye anthu akhali okhonda khulupirika kuna Mulungu wa makolo awo mbamsiya kwenda kapembedza milungu ya madzinza akhadathamangisa Mulungu m'dziko mukhakhala iwo mule.

²⁶Natenepo Mulungu adachitisa Puli mfumu wa Asiria wakudziwika pontho na dzina yakuti Tigilati-Pilesere kukwata dzikoyo. Iye adathamangisa madzinza a Rubeni, Gadi na Manase wakumabulukiro dzuwa mbaaendesa kudziko ya unyaperezo ya Hala, Habori na Hara pontho na chifupi na mkulo wa Gozani.