Read cisena 1 MBIRI 9 Bible Online

1 MBIRI 9 - cisena bible

1 MBIRI 9

¹Aisraele onsene adalembwa malingana na mabanjawo, tenepo pyonsenepi pyalembwa m'bukhu ya mbiri ya mafumu a Israele. Anthu a Yuda akhadathamangiswa kwenda m'dziko ya Babiloni kuatchunyusa thangwi ya pyakudawa pyawo.

²Ale adatoma kubwerera mbakakhala m'mizinda ya kwawo akhali Aisraele anango, anyansembe, Alevi na anyakuphata basa m'Nyumba ya Mulungu.

³Anthu a madzinza a Yuda, Benjemani, Eferemu na Manase adenda kakhala mu Yerusalemu.

⁴Pakhali mabanja madzana matanthatu na makumafemba a dzinza ya Yuda akhakhala mu Yerusalemu ale. Pidzukulu pya Perezi mwana Yuda adasankhula Utai, mwana Amihudi, mdzukuluache Omri kukhala mkadamu wawo. Makolo ache anango akhali Imri na Bani. Pidzukulu pya Shela mwana Yuda adasankhula Asaia, ule akhali mfumu pabanja pache kukhala mkadamu wawo. Pidzukulu pya Zera mwana Yuda adasankhula Yeuele kukhala mkadamu wawo.

⁷Anthu a m'dzinza ya Benjemani ali m'tchindemu akhakhala mu Yerusalemu: Salu mwana Meshulamu, ule akhali mwana Hadavia, mwana Hasenua; Ibeneia mwana Yerohamu; Ela mwana Uzi, mdzukuluache Mikiri; pontho Meshulamu mwana Shefatia, ule akhali mwana Reuele, mwana Ibinia.

⁹Onsene pabodzi pene akhalipo mabanja madzana mafemba na makumashanu na atanthatu a m'dzinza yeneyi akhakhala kweneko ale. Amuna onsene alongwa padzuluwa akhali akadamu a mabanjawo.

¹⁰Anyansembe akhakhala mu Yerusalemu mbawa: Yedaia; Yehoiaribu; Yakini; Azaria mwana Hilikia (nyakuyang'anira wamkulu wa m'Nyumba ya Mulungu) ule makolo ache akhali Meshulamu, Zadoki mwana Meraioti, na mwana Ahitubu; Adaia mwana Yerohamu, ule makolo ache akhali Pashuri na Malikia; pontho Maasai mwana Adiele, ule makolo ache akhali Yahizera, Meshulamu, Meshilemiti na Imeri.

¹³Anyansembe ale akhali akadamu a mabanjawo akhalipo chikwi na madzana manomwe na makumatanthatu. Iwo akhali aluso pabasa yonsene ya m'Nyumba ya Mulungu.

¹⁴Alevi akhakhala mu Yerusalemu ale mbawa: Shemaia mwana Hashubu, ule makolo ache akhali Azirikamu na Hashabia wa nkhonda Merari, Bakibakari, Hereshi, Galali, Matania mwana Mika ule makolo ache akhali Zikiri na Asafu; Obadia mwana Shemaia ule makolo ache akhali Galali na Yedutuni; Berekia mwana Asa, mdzukuluache Elikana, ule akhakhala m'nthemba ya chifupi na luwani ya Netofa.

¹⁷Anyakulondali Nyumba ya Mulungu akhakhala mu Yerusalemu ale mbawa: Shalumu, Akubu, Talimoni na Ahimani. Shalumu mbakhala mkadamu wawo.

¹⁸Pandzidzi wenewo iwo adakhazikwa kumabulukiro dzuwa a Msuwo wa Mpanda wa Mfumu.[17] Pakutoma iwo akhalondali pamsuwo wa mpanda wa msasa wa Alevi.

¹⁹Shalumu mwana Kore, mdzukuluache Ebiasafu pabodzi pene na anzache a nkhonda Kora, basawo ikhali yakulondali pamsuwo wakwendera ku Chikhumbi cha Mulungu ninga montho mukhadachitira makolo awo kulondali Chikhumbi mumsasa wa MBUYA.

²⁰Finiasi mwana Eleazara akhali mkadamu wawo pandzidzi unango, pontho MBUYA akhali naye.

²¹Zekaria mwana Meshelemia akhali pontho nyakulondali pamsuwo wakwendera ku Chikhumbi cha Mulungu.

²²Onsene ale akhadasankhulwa kukhala anyakulondali m'misuwo akhali amuna madzana mawiri na khumi na awiri. Iwo adalembwa malingana na midzi ikhakhala iwo. Mfumu Davite na mprofeti Samuele ndiye adaikha makolo enewa kukhala anyakuphata basa yeneyi.

²³Iwo pabodzi pene na pidzukulu pyawo adathimiza kulondali pamsuwo wa Nyumba ya Mulungu.

²⁴Pakhali msuwo wa mpanda wakuyang'ana kumakhundu onsene, kumpoto, kumadokero dzuwa, kumwera na kumabulukiro dzuwa, pontho kukhundu yonsene kukhali nyakulondali wamkulu.

²⁵Anyakulondali enewa akhaphedzwa na abale awo, ale akhakhala m'midzi, pontho akhadathema kuchita buswa-buswa pakada munthu nsiku zinomwe.

²⁶Anyakulondali akulu akhali Alevi. Iwo basawo ikhali yakuyang'anira masubi a m'Nyumba ya Mulungu na pyonsene pyakukoyiwa mwenemo.

²⁷Iwo akhakhala chifupi na Nyumba ya Mulungu, thangwi basawo ikhali kuilondali na kufungula misuwo ya mpanda machibese onsene.

²⁸Alevi anango basawo ikhali yakuyang'anira pyombo pyakuphatisira basa pachipembedzo. Iwo akhapilengesa pingafuna kubuluka kaphatisirwa basa mbapilengesa pontho pingamala phatisirwa basa.

²⁹Anango basawo ikhali yakuyang'anira pinthu pyakupambulika pabodzi pene na ufa, vinyu, mafuta aolivi, pyakufukiza pyakununkhira na pyakukomesera muliwo.

³⁰Mbwenye basa yakuvungaza pinthu pyakukomesera muliwo ikhali ya anyansembe.

³¹Mlevi unango dzinache Matitia mwana wautombo wa Shalumu wa nkhonda Kora basache ikhali yakusasanya pyakupereka pyakuchita kuterekwa.[18]

³²Anthu a nkhonda Kohati basawo ikhali yakusasanya mikate yakupambulika[19] ya m'Nyumba ya Mulungu pa Nsiku Yakupuma yonsene.

³³Mabanja anango a Alevi basawo ikhali yakuimba m'Nyumba ya Mulungu. Akadamu a mabanja enewa akhakhala m'nyumba zinango chifupi na Nyumba ya Mulungu, pontho iwo nee akhaphata mabasa anango tayu, thangwi akhafunika mosiku na masikati.

³⁴Amuna alongwa padzuluwa akhali akadamu a mabanja a Alevi malingana na makolo awo. Enewa akhali akadamu akhakhala mu Yerusalemu ale.

³⁵Yeiele adamanga mzinda wa Gibeoni mbakhazikika mwenemo. Mkazache akhali Maaka.

³⁶Mwanache wautombo akhali Abidoni, pontho anache anango mbawa: Zuri, Kishi, Baala, Neri, Nadabu,

³⁷Gedori, Ahio, Zekaria na Mikiloti,

³⁸babache Shimea. Pidzukulu pyawo pidakhala mu Yerusalemu chifupi na mabanja anango a nkhondawo.

³⁹Neri adabala Kishi, pontho Kishi adabala Mfumu Sauli. Sauli adabala ana anayi achimuna: Yonatani, Malikishua, Abinadabu na Eshibaala.

⁴⁰Yonatani adabala Meribaala, pontho Meribaala adabala Mika.

⁴¹Mika adabala ana anayi achimuna: Pitoni, Meleki, Tarea na Ahazi.[20]

⁴²Ahazi adabala Yara. Yara adabala ana atatu achimuna: Alemeti, Azimaveti na Zimri. Zimri adabala Moza,

⁴³Moza adabala Binea, Binea adabala Refaia, Refaia adabala Eleasa, pontho Eleasa adabala Azele.

⁴⁴Azele adabala ana atanthatu achimuna: Azirikamu, Bokeru, Ishimaele, Shearia, Obadia na Hanani.