Read cisena 2 MBIRI 1 Bible Online

2 MBIRI 1 - cisena bible

2 MBIRI 1

¹Solomoni mwana Mfumu Davite akhadakhazikisa na mphamvu ufumu wache mu Israele, tenepo MBUYA Mulungu wache adamtsanzayisa mbamchitisa kukhala wamphamvu pyakwanga.

²Mfumu Solomoni adalonga kuna akadamu a anthu chikwi, anthu dzana, mathubu, akadamu a mabanja na anthu anango onsene

³kuatonga kuti aende pabodzi na iye kumbuto yakupembedzerapo ku Gibeoni. Iwo adenda kweneko, thangwi kweneko nkhule kudaikhwa Chikhumbi cha Mulungu, chile chidasasanya Mose, nyabasa wa MBUYA, m'thando yatchetcha.

⁴Kwache Bokosi ya Chiverano ikhali mu Yerusalemu m'chikhumbi chikhadasasanya Mfumu Davite pidadza iye nacho kubulukira ku Kiriati-Yearimu.

⁵Guwa yansembe yankuwa ile ikhadasasanya Bezalele mwana Uri mdzukuluache Huri ikhali pontho ku Gibeoni kunkhope kwa Chikhumbi cha Mulungu. Mfumu Solomoni pabodzi pene na anthu onsene adapembedza MBUYA kweneko.

⁶Kunkhope kwa chikhumbicho mfumu adapembedza MBUYA pakupereka nsembe paguwa ya yankuwa; iye adapha nyama chikwi chibodzi mbazipyereza zamumphu zonsenezo.

⁷Mosiku wenewo Mulungu adaonekera kuna Solomoni mbalonga mbati, “Pempha chinthu chonsene chinafuna iwe kuti ndikupase.”

⁸Solomoni adatawira mbati, “Ndzidzi onsene imwe mwaonesa kumfuna kwanu kukulu pontho kokhonda mala babanga Davite, pontho lero mwanditawirisa kukhala mfumu m'mbuto mwache.

⁹Tenepo MBUYA Mulungu, pidadumbira imwe kuna baba, pichitiseni kukwana-kwana. Imwe mwandichitisa kukhala mfumu wa anthu akuinjipa pyakwanga okhonda lengeseka,

¹⁰natenepo ndipaseni nzeru na udziwisi towera ndikwanise kutsogolera anthu enewa, thangwi mbani anakwanisa kutonga anthu anu azinji ninga enewa.”

¹¹Mulungu adalonga kuna Solomoni mbati, “Iwe wasankhula chinthu chadidi. M'mbuto mwa kupempha chilemedzo, penu mfuma, kuveka penu imfa ya anyamalwako, penu iwe ukhale na moyo wakulapha, iwe wasankhula nzeru na udziwisi kuti ukwanise kutonga anthu anga, ale adakuchitisa ine kuti ukhale mfumu wawo.

¹²Ndinati ndikupase nzeru na udziwisi. Padzulu pa penepi, ndinati ndikupase chilemedzo chikulu, mfuma, na kuveka kupiringana mafumu akhatonga m'ndulimu, pontho kupiringana anafuna dzatonga m'tsogolo muno.”

¹³Natenepo Mfumu Solomoni adabuluka[1] pambuto yakupembedzerapo pale pa Gibeoni, kule kukhali Chikhumbi cha Mulungu, mbabwerera ku Yerusalemu. Kweneko iye adatonga Israele.

¹⁴Solomoni adagumanyisa pingolo chikwi chibodzi na madzana manayi, pontho na akavalo pikwi khumi na piwiri. Anango a iwo adaakoya mu Yerusalemu, anangombo onsene adaaikha m'mizinda yakusiyana-siyana.

¹⁵Pandzidzi ukhatonga Solomoni, siliva na golidi akhali nadza-nadza mu Yerusalemu ninga miyala, pontho miti yamkungudza ikhali dala-dala ninga miti enembo pyayo yamkuyu yakumera m'tchinde mwa phiri ya Yuda.

¹⁶Akavalo a Solomoni adachita kugulwa na anyamalonda a mfumu kubulukira ku Iguputo na ku Kue.

¹⁷Iwo adagula pingolo kubulukira ku Iguputo pa konta ya kobiri zasiliva madzana matanthatu kada chingolo, na akavalo pa konta ya kobiri zasiliva dzana ibodzi na makumashanu kada kavalo. Iwombo akhagulisa pinango kuna mafumu onsene a Ahiti na Aaramu.