Read cisena 2 MBIRI 11 Bible Online

2 MBIRI 11 - cisena bible

2 MBIRI 11

¹Pidafika Rehoboamu mu Yerusalemu adachemeresa amuna a madzinza a Yuda na Benjemani, pikwi dzana na makumasere onsene pabodzi pene, kuti akamenye nkhondo na Israele, towera ufumuwo ubwerere kuna Rehoboamu mwana Solomoni.

²Mbwenye MBUYA adapanga Shemaia, munthu wa Mulungu,

³kulonga kuna Rehoboamu mwana Solomoni mfumu wa Yuda na kuna dzinza yonsene ya Yuda na Benjemani pontho na kuna anthu onsene kuti,

⁴“Pyalonga MBUYA mphipi: Lekani kwenda kamenyana na abale anu Aisraele. Monsene ndokoni m'misa mwanu, thangwi penepi pyachitika na kufuna kwanga.” Natenepo iwo hadamenyane na Yeroboamu ninga montho mukhadaapangira MBUYA.

⁵Rehoboamu adakhala mu Yerusalemu mbamanga mipanda kuzungulira mizinda ya mu Yuda na Benjemani:

⁶Betelehemu, Etamu, Tekoa,

⁷Beti-Zuri, Soko, Adulamu,

⁸Gati, Maresha, Zifi,

⁹Adoraimu, Lakishi, Azeka,

¹⁰Zora, Aialoni na Hebroni.

¹¹Mipandayo adaimanga mwamphamvu. Mumzinda onsene adasankhulamo mkadamu kuuyang'anira pontho mumzinda onsene adasasanya mbuto yakukoyerapo kudya, mafuta aolivi, na vinyu,

¹²pontho na pyakugedera matswimo na madipa. Na njira yeneyi iye adachitisa Yuda na Benjemani kukhala pansi pa utongi wache.

¹³Kubulukira kunthemba zonsene za Israele, anyansembe adadza kumwera ku Yuda.

¹⁴Alevi adasiya mbuto zawo zakudyesera pifuyo na mbuto zawo zinango mbaenda ku Yuda na Yerusalemu, thangwi Mfumu Yeroboamu na anyakupita m'mbuto mwache hadaatawirise tayu kuphata basa ninga anyansembe a MBUYA.

¹⁵Yeroboamu adasankhula anyansembe ache ene kuti atumikire pambuto zakupembedzerapo milungu, na kupembedzerapo mizimu yakuipa na mifanikizo ya anamphulu.

¹⁶Kubulukira kumadzinza onsene a Israele, anthu ale akhapifunadi na mtimawo onsene kupembedza MBUYA Mulungu wa Israele, adatewera Alevi kwenda ku Yerusalemu, towera iwo akakwanise kupereka nsembe kuna MBUYA Mulungu wa makolo awo.

¹⁷Penepi pidachitika kuti ufumu wa Yuda ukhale na mphamvu, tenepo pyaka pitatu iwo adakhala kunduli kwa Rehoboamu mwana Solomoni mbakhala ninga montho mukhakhalira iwo pansi pa utongi wa Mfumu Davite na Mfumu Solomoni.

¹⁸Rehoboamu adasemba Mahalati, ule babache akhali Yerimoti mwana Davite, pontho ule mache akhali Abihaili mwana wamkazi wa Eliabu mdzukuluache Yese.

¹⁹Rehoboamu na Mahalati adabala ana atatu achimuna Yeushi, Shemaria na Zahamu.

²⁰Kubuluka penepo Rehoboamu adasemba pontho Maaka mwana wamkazi wa Abisalomu mbabala naye ana anayi achimuna: Abia, Atai, Ziza na Shelomiti.

²¹Kulengesa onsene pabodzi pene, Rehoboamu akhali na akazi khumi na asere, pontho akazache achibitchu makumatanthatu mbabala ana achimuna makumawiri na asere, pontho na ana achikazi makumatanthatu. Pakati pa akazache na akazache achibitchu onsene, Maaka ndiye akhali wapamtima pache.

²²Pakati pa anache onsene Abia ndiye akhakomerwa na iye mbamsankhula kukhala nyakupita ufumu m'mbuto mwache iye angafa.

²³Rehoboamu mwanzeru adapereka basa kuna anache achimuna mbaakhazikisa mu Yuda na Benjemani monsene; mizinda yonsene yakutchingwa na mpanda. Iye akhapereka kuna anache pyonsene pikhasowa iwo mwakufewa manja mbaasembera akazi azinji.