Read cisena 2 MBIRI 13 Bible Online

2 MBIRI 13 - cisena bible

2 MBIRI 13

¹Chaka chakhumi na chisere Yeroboamu mwana Nebati mbali mfumu wa Israele, Abia adapita ufumu wa Yuda,

²mbatonga mu Yerusalemu pyaka pitatu. Mache akhali Mikaia mwana wamkazi wa Uriele wa kumzinda wa Gibea. Nkhondo idaotoka pakati pa Abia na Yeroboamu.

³Abia adapigumanyira anyankhondo aluso pikwi madzana manayi kamenyana na Yeroboamu, ule adapigumanyirambo anyankhondo aluso pikwi madzana masere kamenyana naye.

⁴Anyankhondowa adagumanyikana m'dziko ya mapiri ya Eferemu. Mfumu Abia adakwira phiri ya Zemaraimu mbalonga mwakugaluza fala kuna Yeroboamu na Aisraele mbati, “Ngavani kuno!

⁵Ayi imwe nkhabe kupidziwa tayu kuti MBUYA Mulungu wa Israele adachita chiverano chokhonda mala na Davite, kupereka kuna iye na pidzukulu pyache ufumu wa Israele kwenda na kwenda?

⁶Yeroboamu mwana Nebati adasandukira Solomoni mfumu wache.

⁷Kubuluka penepo iye adagumanyisa malova akusowa basa mbakhakhamiza Rehoboamu mwana Solomoni kuchita pikhafuna iwo, ule akhali mphale, pontho okhonda kupidziwa mwadidi kuakhondera kwache.

⁸Lero mwanyerezera kumenyana na ufumu udapereka MBUYA kuna pidzukulu pya Davite ule. Imwe muna gulu ikulu ya anyankhondo, pontho muna mifanikizo ya ng'ombe yagolidi, zidasasanya Yeroboamu kuti zikhale milungu yanu zile.

⁹Imwe mudathamangisa anyansembe a MBUYA, pidzukulu pya Aroni, pontho mudathamangisa Alevi. M'mbuto mwawo imwe mudasankhulapo anyansembe anu ninga montho mumbachitira madzinza anango. Munthu onsene wakudza na ng'ombe penu mabira manomwe anakwanisa kudzozwa ninga nyansembe wa milungu yanu yakufa ile.

¹⁰“Mbwenye na lero ife tikutumikira basi MBUYA Mulungu wathu, pontho hatidamkhonde tayu. Anyansembe ale mphidzukulu pya Aroni akuphata mabasawo, Alevi mbaaphedza.

¹¹Mosiku na machibese onsene ambapereka kuna MBUYA nsembe zakupyerera na pyakununkhira pyakufukiza. Iwo ambapereka mikate yakuchena pathebulu, pontho mosiku onsene ambagasa nyale papyakuikhirapo nyale pyagolidi. Ife timbachita pyatitonga MBUYA, mbwenye imwe mumbamkhonda.

¹²Mulungu mwenechiroache ndiye mkadamu wathu, pontho anyansembe ache ali pano na ngoma zawo kusasanyika kuziliza, pontho kutipanga kuti titome kumenya nkhondo namwe. Anthu a ku Aisraele, lekani kumenyana na MBUYA Mulungu wa makolo anu! Imwe nkhabe kwanisa kumkunda tayu.”

¹³Pandzidzi wenewo Yeroboamu akhadatuma anyankhondo ache anango kuti akabisalire kunduli kwa anyankhondo a Yuda, towera aazungulire kuaikha pakati, uku anango ayang'anisane nawo.

¹⁴Anthu a ku Yuda adayang'ana-yang'ana mbaona kuti iwo adazungulirwa na anyamalwawo. Iwo adakhuwa kuna MBUYA kuti aaphedze, tenepo anyansembe adaliza ngoma.

¹⁵Anthu a ku Yuda adakhuwa pyakwanga, tenepo mwakutsogolerwa na Abia, iwo adatoma kumenyana nawo; Mulungu adakunda Yeroboamu na anyankhondo a Chiisraele.

¹⁶Aisraele adathawa pamaso pa anthu a ku Yuda, tenepo Mulungu adachitisa anthu a ku Yuda kukunda Aisraele.

¹⁷Abia na anyankhondo ache adakunda Aisraele mwakuchita ninga kuapeya; pikwi madzana mashanu anyankhondo akunyindirika a Israele adaphiwa nsiku yeneyo.

¹⁸Natenepo anthu a ku Yuda adakunda Aisraele thangwi iwo adanyindira MBUYA Mulungu wa makolo awo.

¹⁹Abia adathamangisa anyankhondo a Yeroboamu mbakwata mizinda yawo: Betele, Yeshana, Eferoni na midzi yakuzungulira mizinda yeneyi.

²⁰Yeroboamu hadakhale pontho na mphamvu tayu pandzidzi ukhatonga Abia. Pakumalisira pache MBUYA adamkhamwadza mbafa.

²¹Kwache Abia adathimiza kukhala na mphamvu pyakwanga. Iye akhali na akazi khumi na anayi mbabala ana achimuna makumawiri na awiri, pontho na ana khumi na atanthatu achikazi.

²²Mbiri inango yonsene ya Abia na pinthu pidalonga na pidachita iye pyalembwa m'bukhu ya mbiri ya mprofeti Ido.