Read cisena 2 MBIRI 15 Bible Online

2 MBIRI 15 - cisena bible

2 MBIRI 15

¹Mzimu wa Mulungu adagudumira Azaria mwana Odedi,

²tenepo iye adenda kagumanikana na Mfumu Asa. Iye adachemera mbati, “Ngavani kuno Mfumu Asa na anthu onsene a ku Yuda na Benjemani! MBUYA ali namwe ndzidzi onsene unakhala imwe na iye. Ngakhala munamsaka, munamgumana, kwache mungabauka kubuluka kuna ife, iye anakusiyani mwekha.

³Ndzidzi ukulu ene Israele hakhapembedza Mulungu wakuonadi tayu. Iwo akhali nkhabe anyansembe akuafunzisa, pontho akhali akusowa mwambo.

⁴Mbwenye pidadza nyatwa, iwo adazungunukira kuna MBUYA Mulungu wa Israele. Iwo adamsaka-saka mbamgumana.

⁵Nsiku zenezo nkhabe munthu akhakwanisa kudza mbaenda mumtendere tayu, thangwi m'dziko monsene mukhali nyatwa na kukhonda vana.

⁶Dziko kupondereza dziko inango; mzinda kupondereza mzinda unango, thangwi Mulungu ndiye akhadadzesa nyatwa na kusanyika kuna iwo,

⁷mbwenye imwe mwathema kukhala akuwangisa pontho lekani taya mtima. Basa inaphata imweyi munafupwa nayo.”

⁸Pidava Asa mphangwa za uprofeti zidalonga Azaria mwana[9] Odedi, adawangiswa nazo mtima. Iye adabulusa mifanikizo yonsene m'dzikomo ya Yuda na Benjemani, pontho na mifanikizo yonsene ya m'mizinda idapokosera iwo kudziko ya m'mapiri ya Eferemu. Iye adasasanya pontho guwa yansembe ya MBUYA, ile ikhali muchintalo cha Nyumba ya MBUYA.

⁹Anthu azinji akubulukira kumadzinza a Eferemu, Manase na Simioni adadza kukhala kukhundu ibodzi na Asa mbakhala muufumu wache, thangwi iwo adaona kuti MBUYA Mulungu wache akhali naye. Asa adachemeresa anthu onsenewo pabodzi pene na anthu a ku Yuda na Benjemani.

¹⁰Iwo adagumanyikana mu Yerusalemu mwezi wachitatu chaka chakhumi na chishanu Asa mbali mfumu.

¹¹Pansiku yeneyo iwo adapereka nsembe kuna MBUYA kubulukira pa pinthu pidapokosera iwo kunkhondo; ng'ombe madzana manomwe na mabira pikwi pinomwe.

¹²Iwo adasasanya chiverano mbatawirizana kupembedza MBUYA Mulungu wa makolo awo na mtimawo onsene pontho na moyo wawo onsene.

¹³Munthu onsene, mwana penu mkulu, mkazi penu mamuna, ule hadapembedze MBUYA tayu athema kuphiwa.

¹⁴Iwo adadumbira mwakugaluza fala na dzina ya MBUYA kuti iwo anakoya chiveranocho. Kubuluka penepo iwo adakhuwa mbaliza ngoma.

¹⁵Anthu onsene a ku Yuda adakomerwa pyakwanga thangwi iwo adasasanya chiveranochi na mtimawo onsene. Iwo pidaakomera kupembedza MBUYA, tenepo iye adaatawira mbaachitisa kukhala pamtendere kumakhundu onsene.

¹⁶Mfumu Asa adabulusa pa chidzo chache cha ufumukazi mbuyache wamkazi Maaka, thangwi iye adachita chinthu chakudawika chikulu pakusasanya mfanikizo wa milungu Ashera. Asa adagwisa mfanikizo ule mbamala kuupandula, tenepo adaupisa moto m'phedi ya Kidroni.

¹⁷Podi kwene kuti Asa hadavunge mbuto zonsene zakupembedzerapo milungu tayu, iye adathimiza basi kukhala wakukhulupirika pamaso pa MBUYA moyo wache onsene.

¹⁸Iye adaikha m'Nyumba ya Mulungu pinthu pyonsene pikhadapambulira Abia babache kuna Mulungu, pabodzi pene na pyombo pyagolidi na siliva pidapambulirambo iye mwenechiro kuna Mulungu.

¹⁹Pakhali nkhabe pontho nkhondo mpakana chaka chamakumatatu na chishanu Asa mbali mfumu.