Read cisena 2 MBIRI 16 Bible Online

2 MBIRI 16 - cisena bible

2 MBIRI 16

¹Chaka chamakumatatu na chitanthatu Asa mbali mfumu wa Yuda, Mfumu Baasha wa Israele adachita nkhondo na Yuda mbamanga mpanda kuzungulira Rama kukhondesa anthu kupita penu kubuluka mu Yuda.

²Natenepo Asa adakwata siliva na golidi m'masubi mukhokoyiwa mfuma m'Nyumba ya Mulungu, pontho na m'nyumba yachifumu ene mbapitumiza ku Damasiko kuna Beni-Hadadi mfumu wa Aramu na mphangwa zakuti:

³“Mbapakhale ushamwali pakati pa iwe na ine ninga mukhali ipyo pakati pa babanga na babako. Yang'ana, ndinatumiza kuna iwe siliva na golidi. Natenepo malisa ushamwaliako na Baasha mfumu wa Israele, towera iye aleke kumenyana nane.”

⁴Mfumu Beni-Hadadi adaphatizana na manyerezero a Mfumu Asa wa Yuda ale. Tenepo iye adatuma akadamu ankhondo na anyankhondo awo kachita nkhondo m'maluwani a Israele. Iwo adakunda Iyoni, Dani, Abele-Beti-Maaka na mizinda yonsene mukhakoyera pinthu pya Nafitali ile.

⁵Pidava Baasha pikhachitika pile, adaleka kumanga mpanda kuzungulira Rama mbaisiyira panjira basacheyo.

⁶Kubuluka penepo Mfumu Asa adadza na amuna onsene a ku Yuda mbakwata miyala na matabwa kubulukira ku Rama, pinthu pikhaphatisa basa Baasha pile. Na pinthu penepyo Asa adamangirambo mizinda ya Geba na Mizipa.

⁷Ndzidzi wenewo mprofeti Hanani adadza kuna Asa mfumu wa Yuda mbalonga kuna iye mbati, “Na thangwi yakuti imwe mwanyindira mfumu wa Aramu m'mbuto mwa kunyindira MBUYA Mulungu wanu, anyankhondo a mfumu wa Aramu akuthawirani.

⁸Ayi Akushi na Alibia hakhali anyankhondo amphamvu pontho hakhali na pingolo pyakuinjipa, pontho na anyakupakira akavalo azinji ene tayu? Kwache na thangwi yakuti mudanyindira MBUYA, iye adaapereka m'manja mwanu.

⁹Thangwi maso a MBUYA ambakhala ponsene pene m'dziko yonsene yapansi kuwangisa mtima anthu, ale apereka mtimawo kwamumphu kuna iye. Imwe mwachita chinthu chakupupwa pyakwanga. Kutomera lero kwenda m'tsogolo munati mukhale pankhondo.”

¹⁰Asa adamzhangalira pyakwanga mprofeti ule thangwi ya penepi; iye adamponya m'perezo. Na ndzidzi onthowo Asa adatoma kuboneresa anthu anango mwavinga.

¹¹Pyonsene pidachitika Asa mbali mfumu kutomera pakutoma mpakana kumamalisiro pyalembwa m'bukhu ya mbiri ya mafumu a Yuda na Israele.

¹²Chaka chamakumatatu na chifemba Asa mbali mfumu, iye adalamazwa na utenda wa padzinyalo; podi kwene kuti pikhali tenepo, iye hadazungunukire kuna MBUYA kuti amphedze tayu, mbwenye adenda pyache mwa ng'anga.

¹³Pidagwanda pyaka piwiri iye adagonera mkono

¹⁴mbaikhwa m'masiye amwala adapisemera iye yekha ene mumzinda wa Davite. Iwo adaphatisa basa mafuta na pyakununkhira kusasanya napyo mtembo wache pikhauikha iwo m'masiye. Iwo adaphatisa moto wa nkhuni zizinji kulira thangwi ya kufa kwache.