Read cisena 2 MBIRI 17 Bible Online

2 MBIRI 17 - cisena bible

2 MBIRI 17

¹Yehosafati adapita ufumu m'mbuto mwa babache Asa mbawangisa ufumu wache kupokanyisana na Israele.

²Iye adaikha magulu anyankhondo m'mizinda yakutchingwa na mpanda ya Yuda, m'midzi ya Yuda, pontho na m'mizinda ikhadapokosera Asa babache m'nthemba ya Eferemu.

³MBUYA adatsanzayisa Yehosafati thangwi papyaka pyache pyakutoma iye adateweza makhaliro a babache; iye hadapembedze milungu Baala tayu.

⁴Iye adatumikira Mulungu wa babache mbavera matongero a Mulungu, pontho iye hadachite ninga mudachitira mafumu anango a Israele tayu.

⁵MBUYA adapasa Yehosafati utongi wamphamvu pana ufumu wa Yuda, tenepo anthu onsene adadza kuna iye na mtukwa mwakuti adafuma pyakwanga pontho adalemedzwa pikulu.

⁶Iye akhateweza njira za MBUYA mwakupipereka. Kuthimiza penepo iye adavunga mbuto zakupembedzerapo milungu na adzimunthu a milungu Ashera mu Yuda.

⁷Chaka chachitatu iye mbali mfumu adatuma mathubu ache ali m'tchindemu kwenda kafunzisa anthu m'maluwani a Yuda: Beni-Haili, Obadia, Zekaria, Netanele na Mikaia.

⁸Iwo adenda pabodzi pene na Alevi afemba na anyansembe awiri. Alevi ale akhali: Shemaia, Netania, Zebadia, Asahele, Shemiramoti, Yehonatani, Adonia, Tobia na Tobadonia, pontho na anyansembe ale akhali: Elishama na Yehoramu.

⁹Iwo adakwata bukhu ya mwambo wa MBUYA mbaenda nayo m'maluwani onsene a Yuda kuufunzisa anthu.

¹⁰MBUYA adachitisa mafumu onsene akuzungulira kukhala na mantha kuchita nkhondo na Mfumu Yehosafati.

¹¹Afilisti anango adadza kuna Yehosafati na siliva mzinji ene, pontho na mitukwa inango; Aarabu anango adadza kuna iye na mabira pikwi pinomwe na madzana manomwe, pontho na mbuzi pikwi pinomwe na madzana manomwe.

¹²Natenepo Yehosafati adathimiza kukhala wamphamvu pyakwanga. Mu Yuda monsene iye adamanga mipanda na mizinda yakukoyeramo pinthu,

¹³kule kukhakoyiwa pinthu pizinji. Mu Yerusalemu adaikhamo anyankhondo aluso

¹⁴malingana na mabanjawo. Adina akhali mkadamu wa magulu a nkhondo a m'mabanja a Yuda, pontho iye akhali na anyankhondo pikwi madzana matatu pansi pache.

¹⁵Wachiwiriache akhali Yehohanani ule akhali na anyankhondo ache pikwi madzana mawiri na makumasere;

¹⁶wachitatuache akhali Amasia mwana Zikiri ule akhali na anyankhondo ache pikwi madzana mawiri. Amasia adapipereka yekha ene kutumikira MBUYA.

¹⁷Mkadamu wa magulu a nkhondo a m'mabanja a Benjemani akhali Eliada nyankhondo wamphamvu ule akhali mkadamu wa anyankhondo pikwi madzana mawiri akukhala na pyakugedera matswimo pontho na mauta.

¹⁸Wachiwiriache akhali Yehozabadi, ule akhali na anyankhondo pikwi dzana na makumasere akufunziswa mwadidi basawo.

¹⁹Amuna enewa akhatumikira mfumu mu Yerusalemu kuthimiza penepo iye adaikha anyankhondo anango m'mizinda inango ya Yuda yakutchingwa na mpanda.