Read cisena 2 MBIRI 18 Bible Online

2 MBIRI 18 - cisena bible

2 MBIRI 18

¹Pidafuma na kuveka Mfumu Yehosafati wa Yuda, adasemberana na banja ya Mfumu Ahabu wa ku Israele.

²Pidagwanda pyaka pizinji Yehosafati adenda kumzinda wa Samaria kafambira Mfumu Ahabu. Kufuna kulemedza Yehosafati pabodzi pene na anthu akhali na iye ale, Ahabu adapha mabira na ng'ombe zizinji kuchita phwando. Iye adayesa-yesa kukhakhamiza Yehosafati kuti akhale naye gulu ibodzi pikhaenda iye kasosa Ramoti-Gileadi.

³Iye adavunza mbati, “Ayi mfumu, munaenda nane kamenya nkhondo na nthemba ya Ramoti-Gileadi?” Yehosafati adatawira mbati, “Ngakhala iwe wasasanyika na ine enembo ndasasanyika; chibodzi-bodzi anyankhondo anga. Tinati tiende nawe pabodzi kunkhondo.”

⁴Iye adathimiza kulonga mbati, “Mbwenye chakutoma tende tivunze nzeru kuna MBUYA.”

⁵Tenepo Ahabu adachemeresa maprofeti nenene madzana manayi mbaavunza mbati, “Ayi, ndiende kamenyana na Ramoti-Gileadi penu tayu?” Iwo adatawira mbati, “Ndokoni, thangwi Mulungu anakuchitisani kukunda.”

⁶Mbwenye Yehosafati adavunza mbati, “Ayi pano nkhabe mprofeti unango tayu kuti tinakwanisa kuvunza nzeru kuna MBUYA kudzera muna iye?”

⁷Ahabu adatawira mbati, “Pasala mbodzi, weneyu ndi Mikaia mwana Imila. Kwache ine ndimbamzonda thangwi chipo iye hadzati kundipangambo chinthu chadidi tayu, mbwenye chakuipa ndzidzi onsene.” Yehosafati adatawira mbati, “Mfumu nee athema kulonga mafala ninga enewa tayu.”

⁸Natenepo Mfumu Ahabu adachemeresa mbodzi wa mathubu ache mbampanga kuti akwate Mikaia mwana Imila kabodzi kene.

⁹Uku avala mikhanjo yawo yachifumu, mafumu awiri ale adakhala pamipando yawo yachifumu pambuwa chifupiletu na msuwo wa mpanda wa Samaria, tenepo maprofeti onsene ale akhalonga mphangwa zauprofeti pamaso pawo.

¹⁰Tenepo Zedekia mwana Kenaana akhadasasanya nyanga zasimbi mbalonga mbati, “MBUYA alonga mbati, ‘Na ipi munati mumenyane na Aaramu mpakana kuakunda.’ ”

¹¹Maprofeti onsene akhalonga chibodzi-bodzi. Iwo akhalonga mbati, “Ndokoni mukasose mzinda wa Ramoti-Gileadi, pontho munaukunda, thangwi MBUYA anakuchitisani kukunda.”

¹²Munthu akhadatumwa kakwata Mikaia ule adalonga kuna Mikaia mbati, “Ngayang'ana maprofeti anango onsene alonga kuti mfumu anati akakunde, tenepo iwe mafalako akaphatizane na pyalonga iwopyo mbukalonge mwakukomera mfumu.”

¹³Mbwenye Mikaia adalonga mbati, “Ine ndinadumbira pamaso pa MBUYA wamoyo kuti ndinakampanga chinthu chinafuna kundipanga MBUYA.”

¹⁴Pidafika Mikaia, mfumu adamvunza mbati, “Mikaia, ayi ife tiende kamenya nkhondo na Ramoti-Gileadi, penu tayu?” Iye adatawira mbati, “Ndokoni pontho munati mukakunde, thangwi MBUYA anaupereka m'manja mwanu.”

¹⁵Mfumu adalonga kuna Mikaia mbati, “Ndikudumbirise kangasi, kuti undipange pyakuonadi pyokhokha pyalonga MBUYA?”

¹⁶Mikaia adatawira mbati, “Ndidaona Aisraele onsene akubalalika paphiri ninga mabira akusowa makabuswa, tenepo MBUYA adalonga mbati, ‘Anthu awa nkhabe mbuyawo. Munthu onsene mulekeni pyache aende kwawo mumtendere.’ ”

¹⁷Mfumu wa Israele adalonga kuna Yehosafati mbati, “Ayi sidakupangeni tayu kuti munthu weneyu chipo adzati kundipanga pinthu pyadidi tayu, mbwenye pyakuipa pyokhokha?”

¹⁸Mikaia adathimiza kulonga mbati, “Ngaveserani pinalonga MBUYA! Ine ndidaona MBUYA akhala pampando wache wachifumu kudzulu, mwenemo angelo ache onsene aimira nkhundu mwache.

¹⁹Tenepo MBUYA adalonga mbati, ‘Mbani anafuna pyakunyengeza Ahabu kuti aende kamenya nkhondo na Ramoti-Gileadi kuti afere konthoko?’ Mngelo unango adalonga pyachembo, unango adalongambo pyachembo.

²⁰Pakumalisira pache mzimu udadza pamaso pa MBUYA mbalonga kuti, ‘Ine ndinati ndikamnyengeze Ahabu.’

²¹MBUYA adavunza mbati, ‘Unakamnyengeza tani?’ Mzimuwo udatawira kuti, ‘Ine ndinati ndiende kweneko mbandikakhala mzimu wakunama m'kanwa mwa maprofeti ache onsene.’ MBUYA adalonga mbati, ‘Ande, iwe unati ukamnyengezedi. Tenepo ndoko ukachite penepyo.’ ”

²²Tenepo Mikaia adamalisa kulonga mbati, “Penepi pyachitikadi. MBUYA adaikha mzimu wakunama m'kanwa mwa maprofeti anu onsenewa, thangwi MBUYA akhazikisa kuvungika pana imwe.”

²³Penepo Zedekia mwana Kenaana adenda pakhali Mikaia pale mbamgasa mbama. Iye adavunza mbati, “Mzimu wa MBUYA wabuluka tani muna ine mbukalonga na iwe.”

²⁴Mikaia adatawira mbati, “Iwe unapidziwa pansiku inafuna iwe dzabisala m'subi ya m'bwaloletu.”

²⁵Mfumu wa Israele adalonga mbati, “Mkwateni Mikaia mumbweze kuna Amoni, mkulu wa boma mumzinda, na kuna Yoasi mwana mfumu

²⁶mbamukalonge kuti, ‘Mfumu alonga kuti aikhwe m'perezo, pontho lekani kumpasa chinthu chinango, mbwenye mkate na madzi ene basi kufikirana ndibwereko mwadidi.’ ”

²⁷Mikaia adalonga mbati, “Ngakhala munabwerako mwadidi, penepo MBUYA hadalonge kudzera muna ine tayu.” Tenepo iye adathimiza kulonga mbati, “Anthu monsene muli pano phatani pyalonga inepi.”

²⁸Tenepo mfumu wa Israele na Yehosafati mfumu wa Yuda adalamuka kwenda kasosa Ramoti-Gileadi.

²⁹Ahabu adalonga kuna Yehosafati mbati, “Ine ndinapizimbaisa mbandimenya nkhondo ninga mbodzi wa anyankhondo, mbwenye iwe wathema kuvala mkhanjo wako wachifumu.” Natenepo mfumu wa Israele adapizimbaisa mbaenda kamenya nkhondo.

³⁰Mfumu wa Aaramu akhadatonga akadamu ache a nkhondo akufambisa pingolo nee kamenyana na munthu ene pyache tayu, mbwenye mfumu wa Israele ene basi.

³¹Akadamu a pingolo pile pidaona iwo Yehosafati adanyerezera kuti akhali mfumu wa Israele. Natenepo adazungunuka kuti amenyane naye. Mbwenye pidakhuwa Yehosafati, MBUYA Mulungu adampulumusa mbabweza m'nduli anyakumsosa ale.

³²Akadamu a pingolo ale adaona kuti iye hakhali mfumu wa Israele tayu, tenepo adaleka kumthamangisa.

³³Mbwenye munthu unango adaponya tswimo yache nyamponye-ponye mbalasa mfumu Ahabu m'phindopindo mwa nguwo zache za nkhondo. Mfumu adapanga nyakufambisa chingolo chache mbati, “Zungunusa chingolo kundibulusa kunkhondoyi thangwi ndalaswa!”

³⁴Pansiku yeneyo nkhondo idakaka pyakwanga, tenepo mfumuyo adakhazikwa m'chingolo mwache kuyang'anisana na Aaramu. Tenepo pidathobila dzuwa mfumuyo adafa.