Read cisena 2 MBIRI 19 Bible Online

2 MBIRI 19 - cisena bible

2 MBIRI 19

¹Pidabwererako Mfumu Yehosafati mwadidi mwene mbafika mu Yuda kunyumbache yachifumu mu Yerusalemu.

²Mprofeti Yehu mwana Hanani, adenda kagumanikana naye mbalonga kuna mfumu mbati, “Thangwi yache ninji imwe mukuphedzadi anthu akudawika mbamuafuna anthu ambazonda MBUYA ale? Na thangwi ya penepi kuzhangali kwa MBUYA kunakhala pana imwe.

³Kwache imwe muna chinthu chakukoma nacho, thangwi imwe mudabulusa adzimunthu a milungu Ashera akhapembedza anthu anu ale, natenepo imwe mwapiyesera kuteweza pinthu pinafuna Mulungu.”

⁴Podi kwene kuti Mfumu Yehosafati adakhala mu Yerusalemu, kazinji kene iye akhafamba-famba pakati pa anthu kutomera ku Beeresheba kumwera mpakana m'tchinde mwa mapiri a Eferemu kumpoto kupanga anthu kuti abwerere kuna MBUYA Mulungu wa makolo awo.

⁵Yehosafati adasankhula anyakutonga miseru m'mizinda yonsene yakutchingwa na mpanda mu Yuda

⁶mbaapanga mbati, “Chitani mphole-mphole pinatonga imwe anthu miseru; imwe nee mukutonga na utongi wa anthu tayu, mbwenye na utongi wa MBUYA. Tenepo ndzidzi onsene unatonga imwe mseru MBUYA ali namwe.

⁷Gopani MBUYA pontho chitani mphole-mphole thangwi MBUYA Mulungu wathu nkhabe funa kutonga mwakusowa chilungamo, penu kutonga mwakuyang'ana nkhope, penu kutawira kudyekerwa tayu.”

⁸Mu Yerusalemu Mfumu Yehosafati adasankhula Alevi, anyansembe na anthu anango akuveka kukhala anyakutonga miseru ya kuswa mwambo wa MBUYA, penu makangano pakati pa anthu akukhala mumzinda.

⁹Iye adaapanga pinthu pidathema iwo kuchita mbati, “Imwe mwathema kuphata mabasanu mwakugopa MBUYA, pontho imwe mwathema kumvera na kukhulupirika papyonsene pinachita imwe.

¹⁰Ngakhala Muisraele mnzanu wakubulukira kumzinda unango ene anadza na mseru wakupha munthu, penu wakuswa mwambo, penu matongero, imwe mwathema kumpangiza mwadidi mwathema iye dzachita pandzidzi unatongwa mseru wachewo, towera iye aleke konwa pakudawira MBUYA. Ngakhala imwe munapichita tayu, imwe pabodzi pene na Muisraele mnzanu MBUYA anakuzhangalirani. Mbwenye ngakhala basanu munaiphata, imwe nkhabe dzakonwa tayu.

¹¹Amaria, Nyansembe Wamkulu ndiye anafuna dzakhala na utongi onsene pamiseru yonsene yachipembedzo; Zebadia mwana Ishimaele, mkulu wa boma ya Yuda ndiye anafuna dzakhala na utongi onsene pamiseru yonsene ya pakati pa munthu na munthu mnzache. Alevi basawo nkhuonesesa kuti pyalonga anyakutonga miseru pikutewezwa. Wangani mtima pontho chitani pyakupangani inepi, pontho MBUYA mbakhale na ale ambachita pyakulungama.”