Read cisena 2 MBIRI 2 Bible Online

2 MBIRI 2 - cisena bible

2 MBIRI 2

¹Mfumu Solomoni adanyerezera kumanga nyumba yakupembedzeramo MBUYA, pontho na kumanga nyumbache ene ya chifumu.

²Iye adaikha amuna pikwi makumanomwe kukhala anyakuthukula pinthu, amuna pikwi makumasere akhali anyakucheketeza miyala. Pakhali amuna pikwi pitatu na madzana matanthatu ale basawo ikhali yakuyang'anira basa yeneyi.

³Solomoni adatumiza mphangwa kuna Mfumu Hiramu wa ku Turo mbati, “Tendeni tigulisane pinthu ninga mudachitira imwe na babanga Mfumu Davite pidamgulisa imwe miti yamkungudza kumangira nyumbache yachifumu.

⁴Ine ndikumanga nyumba yakupembedzeramo MBUYA, Mulungu wanga. Yeneyi inakhala mbuto yakupambulika pyakwanga kule kunafuna anthu anga na ine ene dzapembedza MBUYA pakufukiza pyakununkhira, kule kunafuna ife dzapereka mikate yakupambulika kuna iye kawiri-kawiri, pontho kule kunafuna ife dzapereka nsembe zakupyerera kumachibese na kumawulo nsiku na nsiku kuthimizapo Nsiku Yakupuma, Phwando yakusekera Kubalwa kwa mwezi, na maphwando anango akusankhulika a MBUYA Mulungu wathu. Iye adatonga Israele kuchita penepi ndzidzi onsene.

⁵Ine ndikufuna kumanga nyumba ikulu, thangwi Mulungu wathu ngwamkulu pyakwanga kupiringana milungu inango yonsene.

⁶Kwache nkhabe munthu na mbodzi ene anakwanisa kummangira nyumba, podi na kudzulu kwene, penu kudzululetu iye nkhabe kwanisa kukwanamo. Apo ine ndine ani kuti ndinakwanisa kummangira nyumba, mbwenye kuti ikhale mbuto ene basi yakuperekerapo nsembe zakupyerera kuna iye.

⁷Natenepo nditumizire misiri waluso pakuphatisa basa golidi, siliva, nkuwa na simbi, pakusasanya nguwo zachoza, msuzi wanyemba na kufira, pontho nyaluso pakugoba. Iye anaphata basa pabodzi na amisiri a mu Yuda na Yerusalemu adasankhula babanga Davite ale.

⁸Ine ndikupidziwa kuti amunako ana luso pyakwanga pakugwanda miti, natenepo nditumizirembo miti yamkungudza, mbira, na mbawa wa ku Lebanoni. Ine ndasasanyika kukutumizira amunanga kuti aphedzane na amunako

⁹kusasanya matabwa azinji, thangwi nyumba inafuna ine kumanga inakhala ikulu pontho yakubalika.

¹⁰Ine ndinapereka kuna anyabasako, ale akugwanda miti, tirigu wakukwana pingolo[2] pikwi pinayi, barele wakukwana pingolo pikwi pinayi, vinyu wakukwana mabuyawu[3] pikwi makumasere, pontho na mafuta akukwana mabuyawu pikwi makumasere.”

¹¹Mfumu Hiramu adatumiza kalata kuna Solomoni kumtawira. Iye adalemba kuti, “Na thangwi yakuti MBUYA ambafuna anthu ache, iye akuchitisa kukhala mfumu wawo.

¹²Mbakuzwe MBUYA Mulungu wa Israele, Nyakulenga kudzulu na dziko yonsene yapansi! Iye apereka kuna Mfumu Davite mwana wanzeru, wakuvesa pinthu, pontho waluso, ule chinchino anyerezera pyakumangira MBUYA nyumba pontho na nyumbache yachifumu.

¹³Ine ndikukutumizira misiri waluso pyakwanga, ule dzinache ndi Huramu-Abi.

¹⁴Mache akhali wa dzinza ya Dani, mbwenye babache akhali mzika ya Turo. Iye ana luso pakuphatisa basa golidi, siliva, nkuwa, simbi, miyala na miti. Iye anakwanisa kuphatisa basa nguwo yachoza, msuzi wanyemba, na wakufira, pontho na nguwo yakufewa. Iye anakwanisa kuphata mabasa a mtundu onsene akugoba, pontho kuchita chonsene chinampanga imwe malingana na matandiko ache. Iye mbaphate basa pabodzi na amisiri ako, pontho na ale adasankhula babako Mfumu Davite.

¹⁵Natenepo titumizire tirigu, barele, vinyu, na mafuta aolivi pidadumbira imwe kutipasa pile.

¹⁶Ife tinagwanda miti yonsene yamkungudza inafuna imwe m'mapiri a Lebanoni; tenepo tinaimanga ninga khangala mbatiibelusa pa bara mpakana ku Yopa. Kubuluka penepo munakwanisa ikwata kwenda nayo ku Yerusalemu.”

¹⁷Mfumu Solomoni adachita kalembera wa alendo onsene akhakhala m'dziko ya Israele sasawa ninga ontho adachita babache Davite. Alendo akukhazikika m'dzikomo akhalipo pikwi dzana na makumashanu na pitatu pontho na madzana matanthatu.

¹⁸Iye adaikha pikwi makumanomwe a iwo kukhala anyakuthukula pinthu, amuna pikwi makumasere kukhala anyakucheketeza miyala m'mapiri, mbasankhula amuna pikwi pitatu na madzana matanthatu kukhala anyakuyang'anira kuonesesa kuti basa yaphatwa.