Read cisena 2 MBIRI 20 Bible Online

2 MBIRI 20 - cisena bible

2 MBIRI 20

¹Pidagwanda ndzidzi ukulu ene anyankhondo a ku Moabu na Amoni pabodzi pene na Ameuni[10] anango adasasanya gulu ibodzi kachita nkhondo na Yuda.

²Anyamphangwa anango adadza mbalonga kuna Mfumu Yehosafati mbati, “Gulu ikulu ya anyankhondo yakubulukira ku Edomu yapita muno na khundu inango ya Nyanza Yakufa dzachita namwe nkhondo. Iwo akunda kale Hazazoni Tamara.” Yeneyi ndi dzina inango ya Engedi.

³Yehosafati adagoswera pyakwanga mbapemphera kuna MBUYA kuti amphedze. Natenepo iye adatonga kuti munthu onsene m'dzikomo apimane kudya.

⁴Kubulukira kumizinda yonsene ya Yuda anthu adathamangira ku Yerusalemu kavunza nzeru MBUYA.

⁵Tenepo iwo pabodzi pene na anthu onsene a mu Yerusalemu adagumanyikana muchintalo cha Nyumba ya Mulungu. Mfumu Yehosafati adenda mbakaimira pamaso pa anthu,

⁶mbapemphera mwakugaluza fala mbati, “MBUYA Mulungu wa makolo athu, imwe kudzuluko mumbatonga madzinza onsene a padziko yapansi. Imwe ndimwe nyamphamvu pontho nyamboko; nkhabe unango anakwanisa kuimisana namwe tayu.

⁷Imwe ndimwe Mulungu wathu. Pidapita anthu anu Israele m'dziko muno, imwe mudathamangisa anthu akhakhala mwenemu ale mbamupereka dzikoyo kuna pidzukulu pya Abrahamu, shamwalianu ule, kuti ikhale yawo ene kwenda na kwenda.

⁸Iwo ambakhala muno pontho akumangirani Nyumba kukulemedzani pakudzindikira

⁹kuti ngakhala nyatwa inaafikira kuatchunyusa, penu nkhondo, muliri na njala, penepo adze kuno dzaimira pamaso pa Nyumbanu kumbapembedzwa imwe kule mbapemphera kuna imwe thangwi ya nyatwa zawo, towera muave mbamuapulumusa panyatwa zawozo.

¹⁰“Lero Amoabu, Aamoni na Aedomu anafuna kuchita nafe nkhondo. Pidabuluka makolo athu m'dziko ya Iguputo, imwe nee mudaatawirisa kugwanda na m'madziko enewa tayu, natenepo makolo athu adaachalira, kwache makolo athu hadaavunge tayu.

¹¹Ngayang'anani mwenemu ndiye munafuna kutibwezera iwo. Iwo adza dzatithamangisa m'dziko idatipasa imweyi.

¹²Imwe ndimwe Mulungu wathu! Atchunyuseni thangwi ife nkhabe mphamvu tayu pamaso pamwinji ukulu wa anyankhondo ule unafuna kuchita nafe nkhondowu. Ife tasowa chakuphata, kwache tikuyang'ana kuna imwe kuti mutiphedze.”

¹³Amuna onsene a Yuda pabodzi pene na akazawo pontho anawo akhaimira penepo pa Nyumba ya MBUYA.

¹⁴Mzimu wa MBUYA adagudumira Mlevi unango, ule akhali nawo m'mwinji mule. Iye akhali Yahaziele mwana Zekaria. Iye akhali wa nkhonda Asafu, pontho akhali chidzukulu cha Asafu kudzera muna Matania, Yeiele na Benaia.

¹⁵Yahaziele adalonga mbati, “Mfumu pabodzi pene na anthu a ku Yuda pontho Yerusalemu, MBUYA alonga kuti, ‘Lekani taya mtima penu kuchita mantha na anyankhondo azinjiwa. Nkhondoyi nja Mulungu, si yanu tayu!

¹⁶Mangwana amenyeni pinadza iwo kugwanda na pamakata a Zizi. Imwe munagumanikana nawo pankhomo ya phedi yakwendera kumudzi wa msitu chifupi na thando yatchetcha ya Yeruele.

¹⁷Pankhondo yeneyi si kuti ndimwe munafuna dzamenya nkhondo tayu. Khazikikani kwene basi mbamudikhire. Imwe munati muone MBUYA akukuchitisani kukunda. Anthu a ku Yuda na Yerusalemu lekani chita mantha penu kutaya mtima. Ndokoni kunkhondo, MBUYA anakhala namwe!’ ”

¹⁸Tenepo Mfumu Yehosafati adalamba nkhope yache mbifikiratu pansi, anthumbo onsene adalambambo mbapembedza MBUYA.

¹⁹Kubuluka penepo anthu a dzinza ya Levi a nkhonda Kohati na Kora adaimira mbakhuwa kukuza MBUYA Mulungu wa Israele.

²⁰Mangwana mwache na machibese anthu adenda kuthando yatchetcha ya Tekoa. Pikhautoma iwo ulendo, Yehosafati adaapanga mbati, “Amuna a Yuda na Yerusalemu! Nyindirani MBUYA Mulungu wanu, penepo munaimira dzololo. Khulupirani pinakupangani maprofeti ache, tenepo imwe munati mukunde.”

²¹Pidamala mfumu kulonga na anthu, adapanga anyakuimba kuvala mikhanjo yawo ikhavala iwo pandzidzi wa maphwando akupambulika kuti akhale patsogolo pa anyankhondo, uku akuimba mbati, “MBUYA mbakuzwe! Kutifuna kwache nkhokhonda mala!”

²²Pidatoma iwo kuimba, MBUYA adachitisa anyankhondo a ku Moabu, Amoni na Edomu ale kukhala pampani-pani.

²³Amoabu na Aamoni adasosa anyankhondo a ku Edomu mbaavungiratu monsene mwene. Kubuluka penepo adazungunukirana mbamenyana pyawo okhokha.

²⁴Pidafika anyankhondo a ku Yuda pansanja ya anyakulondali ile ikhali m'thando yatchetcha, adayang'ana kukhali anyamalwawo kule mbaona kuti onsene akhali thasa-thasa amala kufa. Nkhabe na mbodzi ene wa iwo akhadathawa tayu.

²⁵Yehosafati na magulu ache ankhondo adenda kakwata pinthu pyawo. Iwo adagumana ng'ombe[11] zizinji, phoso, nguwo na pinthu pinango pyakufunika. Iwo adamala nsiku zitatu akugumanya pidapokosera iwo pile, kwache pikhali pizinji pyakwanga mwakuti hadakwanise tayu kukwata pyonsenene.

²⁶Pansiku yachinayi iwo adagumanyikana m'phedi ya Beraka mbakuza MBUYA thangwi ya pyonsene pidachita iye. Ndi thangwi yache phedi yeneyi imbachemerwa Beraka.[12]

²⁷Yehosafati adabwerera ku Yerusalemu mwakukomerwa pabodzi pene na anyankhondo ache thangwi MBUYA adakunda anyamalwawo.

²⁸Pidafika iwo mumzinda mule, iwo adenda ku Nyumba ya Mulungu uku akuimba nyimbo na anyakatangale pontho kuliza ngoma.

²⁹Dziko yonsene, ile idava pya mule mudakundira MBUYA anyamalwa a Israele, idachita mantha.

³⁰Natenepo Yehosafati adatonga mumtendere, pontho Mulungu adamtchinjiriza khundu zonsene.

³¹Yehosafati adapita ufumu wa Yuda uku ana pyaka makumatatu na pishanu mbatonga mu Yerusalemu pyaka makumawiri na pishanu. Mache akhali Azuba, mwana Shilihi.

³²Ninga mudachitira Asa babache, iye adachitambo pinthu pyakulungama pamaso pa MBUYA;

³³kwache mbuto zakupembedzerapo milungu nee zidavungwe tayu. Anthu hadazungunuke tayu na mtimawo onsene kupembedza Mulungu wa makolo awo.

³⁴Pinango pyonsene pidachita Yehosafati, kutomera pakutoma pa ufumu wache kufikirana kumala kwa ufumu wache, pyalembwa m'bukhu ya mbiri ya Yehu mwana Hanani, ile ndi khundu ibodzi ya mbiri ya mafumu a Israele.

³⁵Pandzidzi unango Mfumu Yehosafati wa Yuda adaphatana ushamwali na Mfumu Ahazia wa Israele, ule adachita pinthu pyakudawika pizinji.

³⁶Pagombe ya Ezioni-Geberi, iwo adasasanya miyadiya mikulu-mikulu yakwenda kubara ya Tarisisi.

³⁷Mbwenye Eliezere mwana Dodavahu wa kuluwani ya Maresha adacheuza Yehosafati mbati, “Na thangwi yakuti mwaphatana ushamwali na Ahazia, MBUYA anavunga pinthu pyasasanya imwepi.” Natenepo miyadiya ile idamala panduka mbichimwana kufamba.