Read cisena 2 MBIRI 21 Bible Online

2 MBIRI 21 - cisena bible

2 MBIRI 21

¹Yehosafati adagonera mkono mbaikhwa m'masiye mumzinda wa Davite, tenepo mwanache Yehoramu adapita ufumu m'mbuto mwache.

²Yehoramu mwana Yehosafati mfumu wa Yuda akhali na abale ache atanthatu amimba ibodzi ene: Azaria, Yehiele, Zekaria, Azariahu, Mikaele na Shefatia.

³Babawo adaapasa golidi mzinji pabodzi pene na siliva pontho na pinthu pinango pyakudula. Kada munthu adampasa mzinda wakutchingwa na mpanda mu Yuda kuti auyang'anire. Mbwenye na thangwi yakuti Yehoramu akhali mwana wautombo, Yehosafati adamuikha kukhala nyakupita m'mbuto mwache.

⁴Pidakhazikika Yehoramu mbatonga chadi-chadi ninga mfumu, adapha abale ache onsene pabodzi pene na mathubu ache anango a Chiisraele.

⁵Yehoramu adapita ufumuwo uku ana pyaka makumatatu na piwiri pyakubalwa mbatonga mu Yerusalemu pyaka pisere.

⁶Iye adateweza makhaliro akuipa a Mfumu Ahabu na mafumu anango a Israele, thangwi iye akhadasemba mbodzi mwa ana achikazi a Ahabu. Iye adachita pyakuipa pamaso pa MBUYA,

⁷kwache MBUYA hadafune pyakuvungu ufumu wa Davite tayu, thangwi iye akhadachita chiverano na Davite mbadumbira kuti pidzukulu pyache pinatonga kwenda na kwenda.

⁸Pandzidzi ukhatonga Yehoramu, Edomu adapandukira Yuda mbapiimira pa yekha ene.

⁹Natenepo Yehoramu na mathubu ache adalamuka pabodzi pene na pingolo pyawo mbapita mu Edomu kachita nkhondo. Kweneko anyankhondo a Edomu adaazungulira mbwenye na mosiku iwo adakwanisa kugumana njira mbathawa.

¹⁰Kutomera penepo na lero Edomu ngwakupandukira kuna Yuda. Pandzidzi onthowo mzinda wa Libina udapandukirambo, thangwi Yehoramu akhadakhonda MBUYA Mulungu wa makolo ache.

¹¹Iye pontho adasasanya mbuto zakupembedzerapo milungu m'dziko ya mapiri ya Yuda mbachitisa anthu a ku Yerusalemu na Yuda kudawira MBUYA.

¹²Mprofeti Elia adatumiza kalata kuna Yehoramu. Kalatayo idalembwa tenepa: “MBUYA Mulungu wa kholo yanu Davite akulonga kuti, ‘Imwe nee mudateweza njira za babanu Mfumu Yehosafati penu mbuyanu Mfumu Asa tayu;

¹³m'mbuto mwache imwe mwateweza njira za mafumu a Israele pontho mwabausa anthu a Yuda na Yerusalemu kukhala anthu akhonda khulupirika kuna Mulungu ninga mudachitira banja ya Ahabu kubausa Aisraele kukhala anthu okhonda khulupirika, pontho mudapha abale anu, ale akhali adidi kupiringana imwepo.

¹⁴Na thangwi yeneyi, MBUYA anatchunyusa pyakwanga anthu anu, ananu na akazanu, pontho mfuma yonsene anaivunga,

¹⁵Imwe ene munasanyika na utenda wakupha wa m'mimba, ule unandendeya nsiku na nsiku kufikirana unabuluka mkolomola.’ ”

¹⁶Afilisti na Aarabu anango akhakhala chifupi na Akushi m'khundu-khundu mwa gombe. MBUYA adaaswiswirisa kuti akachite nkhondo na Yehoramu.

¹⁷Iwo adachita nkhondo na Yuda mbapokosera pyonsene pya m'nyumba yachifumu mbakwata akazi na ana achimuna ene kupambula Ahazia chimalisira bele chache.

¹⁸Kubuluka penepo MBUYA adagwisa pana mfumu utenda wakupha wa m'mimba.

¹⁹Pyaka piwiri utenda ule ukhadandendeya pyakwanga mwakuti pakumalisira pache mfumu adafa thangwi ya kuva kupha pyakwanga. Anthu ache hadagase moto kuonesa kumulira tayu ninga mudachitira iwo na makolo ache.

²⁰Yehoramu adapita ufumu uku ana pyaka makumatatu na piwiri pyakubalwa mbatonga mu Yerusalemu pyaka pisere. Nkhabe mbodzi adatsukwala tayu, thangwi ya kufa kwache kule. Iwo adamuikha mumzinda wa Davite, kwache si masiye achifumu tayu.