Read cisena 2 MBIRI 22 Bible Online

2 MBIRI 22 - cisena bible

2 MBIRI 22

¹Mapanga ale akhadadza pabodzi na Aarabu akhadapita mumsasa mbapha ana achimuna onsene a Mfumu Yehoramu kupambula Ahazia mwanache wakumalisira. Natenepo anthu a mu Yerusalemu adapitisa Ahazia kukhala mfumu m'mbuto mwa babache.

²Ahazia adapita ufumuwo uku ana pyaka makumawiri na piwiri,[13] tenepo adatonga mu Yerusalemu chaka chibodzi. Ahazia adateweza makhaliro a banja ya Mfumu Ahabu, podi mache Atalia, ule akhali mwana Mfumu Ahabu, chidzukulu cha Omri mfumu wa Israele ndiye adampasa upangizi, ule udamchitisa kuchita pinthu pyakuipa.

⁴Iye adachita pyakuipa pamaso pa MBUYA, thangwi pidafa babache anthu anango a m'banja ya Mfumu Ahabu adasanduka mapungu ache mbamchitisa kugwa.

⁵Na kuteweza uphungu wawo, iye adakhala gulu ibodzi ene yankhondo na Mfumu Yoramu wa ku Israele pamenya nkhondo na Mfumu Hazaele wa ku Aramu. Iwo adamenyana mu Ramoti-Gileadi, tenepo Yoramu adakuwazwa pankhondo yeneyi.

⁶Iye adabwerera kumzinda wa Yezereele kuti atome wanga pironda pyache pile, tenepo Ahazia adenda kamuona Yoramu.

⁷Mulungu adaphatisa basa kucheza kweneko kuti Ahazia avungwe. Pikhali Ahazia kweneko, iye pabodzi pene na Yoramu adenda mbakagumana na Yehu mwana Nimishi, ule adasankhulwa na MBUYA kuti avunge banja yonsene ya Ahabu.

⁸Pikhapha Yehu banja ya Ahabu, adagumaniza mathubu a Yuda na ana achimuna a abale ache Ahazia ale akhali na iye pabodzi, mbaapha.

⁹Kubuluka penepo iye adasaka-saka Ahazia, mbwenye amunache adamphata ku Samaria kule kukhabisala iye. Iwo adadza naye kuna Yehu mbampha. Kwache adamuikha m'masiye thangwi ya kufuna kulemedza mbuyache Yehosafati, ule adachita pyonsene ninga mukhadapikwanisira iye kutumikira MBUYA. Natenepo nee padasalave munthu na mbodzi ene wa m'banja ya Ahazia ule mbadakwanisa kukoya ufumu tayu.

¹⁰Sindzidzi Atalia mache Mfumu Ahazia nkhudziwa pya kuphiwa kwa mwanache, iye adatonga kuti anthu onsene a m'banja yachifumu ya Yuda aphiwe.

¹¹Ahazia akhali na nyamaingache wa bele inango dzinache Yehosheba, ule adasembwa na nyansembe dzinache Yehoiada. Iye adapulumusa Yoasi mbodzi wa ana a Ahazia chibiso-biso mbamthawisa pana ana achifumu, ale akhadikhira kuti aphiwe mbambisa pabodzi na makayayache m'subi yakugona m'Nyumba ya Mulungu. Iye adapulumusa Yoasi m'manja mwa Atalia, akhafuna kumpha ule.

¹²Pyaka pitanthatu Yoasi adakhala mwenemo basi kubisala, uku Atalia akutonga ninga mfumu.