Read cisena 2 MBIRI 23 Bible Online

2 MBIRI 23 - cisena bible

2 MBIRI 23

¹Pidamala pyaka pitanthatu Yehoiada nyansembe adanyerezera kuti ndzidzi wakwana wakuchitapo pinthu. Iye adachita chiverano na akadamu a nkhondo ashanu: Azaria mwana Yerohamu, Ishimaele mwana Yehohanani, Azaria mwana Obedi, Maaseia mwana Adaia na Elishafati mwana Zikiri.

²Iwo adenda kumizinda yonsene ya Yuda mbabwerera ku Yerusalemu pabodzi pene na Alevi pontho na akulu-akulu a m'mabanja.

³Onsene pabodzi pene adagumanyikana m'Nyumba ya MBUYA mbachita chiverano na Yoasi mwana mfumu. Yehoiada adalonga kuna anthu ale mbati, “Mfumu adafa ule mwanache ngushu! Chinchino iye athema kupita ufumu ninga montho mudadumbira MBUYA kuna Mfumu Davite kuti pidzukulu pyako ndiye pinafuna dzatonga kwenda na kwenda.

⁴Pinafuna ife kuchita mphipi: Anyansembe na Alevi angadza dzaphata basawo pa Nsiku Yakupuma, gulu yakutoma ya iwo analondali pamisuwo ya m'Nyumba ya MBUYA,

⁵gulu inango yachiwiri inalondali nyumba yachifumu. Gulu yakumalisirayo inakhazikwa pamsuwo wa Maziko. Anthu anango onsene anagumanyikana pachintalo cha Nyumba ya MBUYA.

⁶Munthu onsene mbaleke tawiriswa kupita m'Nyumba ya MBUYA kupambula anyansembe na Alevi ale anakhala pa buswa ndzidzi wenewo. Iwo anakwanisa kupita mwenemo thangwi iwo ngakupambulika, mbwenye anthu anango onsene athema kuvera matongero a MBUYA, tenepo iwo akhale panja.

⁷Alevi athema kulondali mfumu mwakumzungulira uku matalasadawo asasanyika kale, pontho iwo athema kukhala chifupi na mfumu konsene kwene kunaenda iye. Munthu onsene wakuyesa-yesa kupita m'Nyumba ya MBUYA aphiwe.”

⁸Alevi na anthu a ku Yuda adachitadi pidaapanga Yehoiada. Munthu onsene adakwata amunache, ale akhaenda katoma buswawo pa Nsiku Yakupuma pontho na ale ene akhakotoka pabuswawo, thangwi Yehoiada nyansembe nsiku yeneyo hadakotose gulu na ibodzi ene tayu.

⁹Kubuluka penepo iye adapereka kuna akadamu ale madipa, pontho pyakugedera matswimo ping'ono-ping'ono na pikulu-pikulu pene, pile pikhali pya Mfumu Davite mbapikoyiwa m'Nyumba ya MBUYA.

¹⁰Iye adaikha amuna akuphatira matalasada m'manja mwawo kuzungulira kutsogolo kwa Nyumba ya Mulungu, kutchinjiriza mfumu.

¹¹Tenepo Yehoiada adabulusa panja Yoasi mbamvazika chipewu chachifumu. Iye adapaswa bukhu ya matongero, tenepo adampitisa ufumu. Yehoiada nyansembe pabodzi pene na anache achimuna adamdzoza ufumu, penepo anthu onsene adakhuwa mbati, “Dondowe mfumu!”

¹²Pidava Atalia mkhuwo wa anthu pontho kuthamanga na kusekera mfumu, adenda kukhali iwo ku Nyumba ya Mulungu kule.

¹³Penepo iye adaona mfumu wachinchino ule, aimira pamsuwo wa Nyumba ya Mulungu, chifupi na mzati wachifumu, uku azungulirwa na akadamu ankhondo, pontho na anyakuliza ngoma. Anthu onsene akhakhuwa mbaliza ngoma thangwi yakukomerwa, mwenemo anyakuimba na pyakuimbira ndiye akhatsogolera. Natenepo Atalia adang'amba nguwo zache mwakuzhangali mbakhuwa mbati, “Ngupandu, ngupandu!”

¹⁴Yehoiada hadafune tayu kuti Atalia apherwe chifupi na Nyumba ya Mulungu, natenepo iye adachemeresa akadamu ankhondo mbalonga mbati, “Mkwatireni kunja mkaziyu pakati pa mizere ya anyakulondal, pontho phani munthu onsene wakufuna pyakumvundulirayo.”

¹⁵Iwo adamphata mbamkwekwetera kunyumba yachifumu, tenepo pidafika iwo pamsuwo wa mpanda wa Kavalo, adampha.

¹⁶Yehoiada nyansembe adakwata Mfumu Yoasi na anthu kuti akhale naye pabodzi pakuchita chiverano kuti iwo anakhala anthu a MBUYA.

¹⁷Tenepo onsene adenda kunyumba yakupembedzeramo milungu Baala mbaigomola. Iwo adaswa maguwa ansembe na mifanikizo ikhali mwenemo ile mbapha Matani nyansembe wa Baala patsogolo pamaguwa ansembe.

¹⁸Yehoiada adaikha anyansembe na Alevi kuti akhale anyakuyang'anira basa ya m'Nyumba ya Mulungu. Iwo adathema kuthimiza kuphata mabasawo adapaswa iwo na Mfumu Davite pontho kuperekwa nsembe zakupyerera kuna MBUYA mwakuteweza mwambo wa Mose uku akuimba nyimbo na kusekera ninga mudaafunzisira Davite.

¹⁹Yehoiada adaikha pontho pabuswa anyakulondali pamisuwo ya Nyumba ya Mulungu kuti munthu onsene okhonda chena pamaso pa MBUYA aleke pita m'Nyumbamo.

²⁰Akadamu a nkhondo, mzika zakuveka, mathubu na anthu anango akhali pabodzi na Yehoiada pamulikiti kudza na mfumu kunyumba yachifumu kubulukira ku Nyumba ya MBUYA. Iwo adapita na Msuwo wa Kumpoto wa mpanda, tenepo adakhala pampando wache wachifumu.

²¹Anthu onsene adakomerwa pyakwanga. Tenepo mumzindamo mukhali mtendere, thangwi Atalia akhadaphiwa.