Read cisena 2 MBIRI 25 Bible Online

2 MBIRI 25 - cisena bible

2 MBIRI 25

¹Amazia adapita ufumu uku ana pyaka makumawiri na pishanu mbatonga mu Yerusalemu pyaka makumawiri na pifemba. Mache akhali Yehoadini wa ku Yerusalemu.

²Iye adachita pinthu pyakulungama pamaso pa MBUYA, kwache hadapichite na mtimache onsene tayu.

³Sindzidzi iye nkhukhala na mphamvu zonsene za ufumu, adapha mathubu ale adaphambo babache.

⁴Kwache iye hadaphe anawo tayu, mbwenye adateweza pidatonga MBUYA m'Mwambo wa Mose kuti: “Makolo mbaleke phiwa thangwi ya kudawa kwa anawo, pontho ana mbaleke phiwa thangwi ya kudawa kwa makolo awo; munthu onsene athema kuphiwa thangwi ya kudawa kwache.”

⁵Mfumu Amazia adagumanyisa amuna onsene a m'madzinza a Yuda na Benjemani mbaaikha m'magulu-magulu a nkhondo malingana na mabanjawo. Iye adaikha akadamu kuyang'anira gulu ya anyankhondo chikwi na gulu ya anyankhondo dzana. Penepa nkhuthimizapo amuna onsene akukwanisa pyaka makumawiri penu kupiringana penepo. Onsene pabodzi pene akhalipo pikwi madzana matatu. Iwo akhali magulu akusankhulika, akusasanyika kumenya nkhondo, pontho aluso pakuphatisa basa madipa na pyakugedera matswimo.

⁶Kuthimiza penepo iwo adalemba anyankhondo a ganyo pikwi dzana a ku Israele pakonta ya siliva wakulemera makilogramu pikwi pitatu na madzana manayi.

⁷Mbwenye mprofeti adenda kuna mfumu mbati, “Lekani kwata anyankhondo a ku Israele kuti muende nawo pabodzi. MBUYA hali kukhundu kwa amuna akubulukira kumpotowa tayu.

⁸Imwe munakwanisa kunyerezera kuti iwo anakuchitisani kukhala amphamvu pankhondo, kwache ndi Mulungu ule ana mphamvu zakukuchitisani kukunda nazo. Iye anatawirisa anyamalwanu kukukundani.”

⁹Amazia adavunza mprofeti ule mbati, “Apo tinachita tani na siliva onsene aapagali ine kale ule?” Mprofeti adatawira mbati, “MBUYA anakwanisa kukubwezerani pizinji kupiringana penepyo!”

¹⁰Natenepo Amazia adagwinya anyankhondo a ganyo ale mbaapanga kuti abwerere kwawo. Na thangwi yeneyi iwo adabwerera kumisa kwawo mwakuzhangali pyakwanga na anthu a ku Yuda.

¹¹Amazia adaphanisira mbatsogolera anyankhondo ache kwenda phedi ya Munyu. Kweneko iwo adamenya nkhondo mbapha anyankhondo a Chiedomu pikwi khumi

¹²mbaphata anthu anango pikwi khumi unyaperezo. Iwo adaakwata mbakwira nawo pansonga ya phiri mumzinda wa Sela. Tenepo adaaponyera kuchiphedi mbanyedzeka-nyedzeka na miyala.

¹³Pandzidzi wenewu anyankhondo a Aisraele akhadakhondeswa na Amazia kwenda kunkhondo pabodzi pene naye, adasosa mizinda ya Yuda ya pakati pa Samaria na Beti-Horoni mbapha amuna pikwi pitatu pontho adapokosera pinthu pizinji.

¹⁴Pidabwerera Amazia kunkhondo kukhadakunda iye Aedomu kule, adadza na mifanikizo yawo ene, adaitchimika mbaipembedza na kupereka nsembe zakupyerera kuna iyo.

¹⁵Penepi pidachitisa MBUYA kuzhangali pyakwanga, natenepo iye adatuma mprofeti kuna Amazia kalonga kuna iye mbati, “Thangwi yache ninji mwapembedza milungu yachilendo, ile hidakwanise tayu kupulumusa anthu awo m'manja mwawo?”

¹⁶Amazia adamgwandizira mbalonga mbati, “Ayi tidakuikha ndife kukhala phungu wa mfumu? Matama gopesera ndinakupha!” Mprofeti adamatama pyache. Mbwenye iye mbadzati matama adalonga kuna mfumu mbati, “Chinchino ndapidziwa kuti Mulungu anyerezera pya kukuvungani thangwi ya pinthu pyonsene pyachita imwe, pontho thangwi ya kukhonda kwanu uphungu wanga.”

¹⁷Amazia mfumu wa Yuda na mapungu ache adasasanya pyakuchita nkhondo na Aisraele. Tenepo iye adatumiza mphangwa kuna Yehoasi mwana Yehoahazi mfumu wa Israele, ule akhali mdzukuluache Yehu kumpanga kuti, “Idza kuno, tilemberane mzera!”

¹⁸Yehoasi adamtawira Amazia na mphangwa zakuti: “Pidachitwa na dawe mu Lebanoni, ule adatumiza mphangwa kuna muti wamkungudza mu Lebanoni kuti, ‘Sembesa mwanako wamkazi kuna mwananga wamamuna!’ Nyama yam'tsanga idagwanda na penepo mbipondedza dawe ule.

¹⁹Chinchino iwe Amazia ukugaya kuti udakunda Aedomu, mbwenye ine ndikukupanga kuti ukhale pyako kumusa kwako. Thangwi yache ninji unafuna kusosa nyatwa, ile inafuna kudzesa kuvungika pana iwe na anthu ako ene?”

²⁰Kwache Amazia hadavere tayu penepi. Kukhali kufuna kwa Mulungu kuti Amazia akundwe thangwi akhadapembedza mifanikizo a Aedomu.

²¹Natenepo Mfumu Yehoasi wa Israele adenda kachita nkhondo na Amazia mfumu wa Yuda. Iwo adagumana pa Beti-Shemeshi mu Yuda.

²²Anyankhondo a ku Yuda adakundwa, tenepo munthu onsene adathawira kumusa kwache.

²³Yehoasi adaphata Amazia mbaenda naye ku Yerusalemu. Kweneko iye adagwisa mpanda wa mzindawo kutomera pamsuwo wa Eferemu mpakana ku Msuwo Wapankhomo, nsinzo wache ukhali nenene mathanyo madzana mawiri.

²⁴Iye adapokosera golidi na siliva onsene, pontho pyombo pyonsene pya m'Nyumba ya Mulungu, pile pikhayang'anirwa na pidzukulu pya Obedi-Edomu. Iye adakwata pontho mfuma yonsene ya m'nyumba yachifumu pabodzi pene na anthu ninga anyaperezo mbaenda napyo ku Samaria.

²⁵Amazia mfumu wa Yuda adathimiza basi kukhala na moyo pyaka pinango khumi na pishanu pidafa Yehoasi mfumu wa Israele.

²⁶Pinango pyonsene pidachitika Amazia mbali mfumu, kutoma na kumalisa kwa ufumu wache, pyalembwa m'bukhu ya mbiri ya mafumu a Yuda na Israele.

²⁷Kutomera ndzidzi udabauka Amazia kubuluka kuna MBUYA, anthu akhadasasanya pyakumpha mu Yerusalemu. Pakumalisira pache iye adathawira kumzinda wa Lakishi, kwache anyamalwache adamtewera mbakamphera konthoko.

²⁸Mtembo wache udathukulwa pakavalo kwenda nawo ku Yerusalemu. Tenepo adaikhwa m'masiye achifumu mumzinda wa Davite.