Read cisena 2 MBIRI 26 Bible Online

2 MBIRI 26 - cisena bible

2 MBIRI 26

¹Anthu onsene a mu Yuda adasankhula mbodzi wa ana achimuna a Amazia wa pyaka khumi na pitanthatu, ule dzinache ikhali Uzia, kupita ufumu m'mbuto mwa babache.

²Ukhali ndzidzi udagonera mkono Amazia pidapokoserwa mzinda wa Elati na Uzia mbaumanga pontho.

³Uzia adakhala mfumu uku ana pyaka khumi na pitanthatu pyakubalwa mbatonga mu Yerusalemu pyaka makumashanu na piwiri. Mache akhali Yekolia wa ku Yerusalemu.

⁴Iye adachita pyakulungama pamaso pa MBUYA ninga montho mudachitira Amazia babache.

⁵Ndzidzi onsene ukhali Zekaria na moyo, ule akhali phungu wa mfumu pachipembedzo, mfumu adatumikira MBUYA mwakukhulupirika, tenepo Mulungu adamtsanzayisa.

⁶Uzia adenda kachita nkhondo na Afilisti. Iye adagwisa mpanda wa Gati, Yaminia na Ashidodi mbamanga mizinda yakutchingwa na mpanda chifupi na Ashidodi, pontho na m'dziko yonsene ya Afilisti.

⁷Mulungu adamphedza kukunda Afilisti, Aarabu akhakhala ku Guribaala na Ameuni ale.

⁸Aamoni akhakhoma msonkho kuna Uzia, natenepo iye adakhala na mphamvu pyakwanga mwakuti adaveka mpakana ku Iguputo.

⁹Uzia adachitisa mpanda wakuzungulira Yerusalemu kukhala wamphamvu pakumanga nsanja pa Msuwo Wapankhomo wa mpanda, Msuwo wa Kuphedi wa mpanda, na padagonya fufu ya mpanda.

¹⁰Iye adamanga pontho nsanja kuthando yatchetcha mbakumbako michera thangwi iye akhali na mikumbi mizinji ya pifuyo m'tchindetchinde mwa mapiri na m'maphedi kumadokero dzuwa. Podi kulima ndiye ikhali basache, adapanga anthu kuti abzale mfesa m'minda ya m'mapiri pontho kulima pamataka adidi akubalisa pinthu.

¹¹Iye akhali na gulu ikulu ya anyankhondo akusasanyika kale kamenya nkhondo m'magulu-magulu. Iwo adagumanyiswa mbalengeswa na anyakulemba a mfumu, Yeiele na Maaseia, mwakuyang'anirwa na Hanania mbodzi wa anyakuphatira mfumu basa.

¹²Gulu ya nkhondo ile ikhatongwa na akadamu pikwi piwiri na madzana matanthatu.

¹³Pansi pa akadamu enewa pakhali anyankhondo pikwi madzana matatu na pinomwe na madzana mashanu, ale akhali akukwanisa mwadidi kumenya nkhondo na anyamalwa a mfumu.

¹⁴Uzia adapereka kuna anyankhondo ache pyakugedera matswimo, madipa, pipewa pyasimbi, pyakuvala pankhondo, mauta na matswimo, pontho na miyala ya mbemba.

¹⁵Mu Yerusalemu anyaluso adamsasanyira makina akuponyera matswimo na miyala mikulu-mikulu kubulukira pa nsanja na pankhomo za mpanda. Iye adaveka konsene kwene, pontho adasanduka wamphamvu pyakwanga, thangwi ya kuphedzwa kukhadachitwa iye na Mulungu.

¹⁶Kwache pidasanduka Mfumu Uzia kukhala wamphamvu pyakwanga, adatoma kutumbama, kule kudamchitisa kuti agwe. Iye akhali okhonda khulupirika kuna MBUYA Mulungu wache pakupita m'Nyumba ya Mulungu kafukiza pyakununkhira paguwa.

¹⁷Azaria nyansembe pabodzi pene na anyansembe makumasere akuwanga mtima pontho amphamvu adatewera mfumu

¹⁸kuti amkhondese. Iwo adalonga mbati, “Uzia, iwe nkhabe utongi wakufukiza pyakununkhira kuna MBUYA tayu. Anyansembe ene basi, ale mphidzukulu pya Aroni ndiye adapambulwa kuti aphate basa yeneyi. Buluka pambuto yakuchenayi. Iwe wadawira MBUYA Mulungu, natenepo iye nkhabeve kukutsanzayisa tayu.”

¹⁹Uzia akhadaimira penepo m'Nyumba ya MBUYA chifupi na guwa yakufukizirapo pyakununkhira uku m'manja mwache aphatira chiwaya cha pyakununkhira. Iye adazhangalira anyansembe ale. Kabodzi kene utenda wa pamanungo udaoneka pachipumu pa mfumu.

²⁰Azaria na anyansembe anango ale adayang'ana pachipumu pa mfumu mbamkhakhamiza kubuluka m'nyumbamo. Iye adachimbiza kubulukamo, thangwi MBUYA akhadamtchunyusa.

²¹Kutomera penepo mpakana moyo wache onsene Mfumu Uzia akhali munthu okhonda chena pamaso pa Mulungu, thangwi ya utenda ukhali na iye ule. Na thangwi yakuti iye hadakwanise pontho tayu kupita m'Nyumba ya MBUYA, adakhala m'nyumba yache ene mbapuma pabasa yonsene ikhaphata iye, natenepo Yotamu mwanache adatonga dziko ile.

²²Mprofeti Yesaya mwana Amozi adalemba pinango pyonsene pidachita Uzia mwenemo mbali mfumu.

²³Uzia adagonera mkono mbaikhwa chifupi na masiye achifumu. Iye hadaikhwe m'masiye achifumu tayu thangwi ya utenda ukhali na iye ule. Yotamu Mwanache adapita ufumu m'mbuto mwache.