Read cisena 2 MBIRI 27 Bible Online

2 MBIRI 27 - cisena bible

2 MBIRI 27

¹Yotamu adapita ufumu uku ana pyaka makumawiri na pishanu pyakubalwa mbatonga mu Yerusalemu pyaka khumi na pitanthatu. Mache akhali Yerusha mwana Zadoki.

²Iye adachita pyakulungama pamaso pa MBUYA ninga montho mudachitira babache. Kwache iye hadadawe tayu pakufukiza pyakununkhira m'Nyumba ya MBUYA ninga mudachitira babache. Mbwenye anthu adathimiza basi kudawa.

³Yotamu ndiye adamanga msuwo wakumpoto kwa Nyumba ya Mulungu mbaphata basa ikulu pampanda wa mzinda wa Yerusalemu kuphiri ya Ofele.

⁴Iye adamanga mizinda m'mapiri a Yuda mbamanga mipanda na nsanja m'misitu.

⁵Iye pabodzi pene na anyankhondo ache adamenyana na Aamoni mbaakunda. Natenepo pyaka pitatu iye adakhakhamiza Aamoni kukhoma msonkho chaka na chaka pinthu ipi: siliva wakulemera makilogramu pikwi pitatu na madzana manayi; tirigu wakukwana pingolo pikwi piwiri; barele wakukwana pingolo pikwi piwiri.

⁶Yotamu adakhala wamphamvu pyakwanga thangwi iye adavera MBUYA Mulungu wache mwakukhulupirika.

⁷Pinthu pinango pile pidachitika mwenemo Yotamu mbali mfumu, nkhondo zidamenya iye, na njira zikhafambisira iye ufumu wache, pyonsenepi pyalembwa m'mabukhu a mbiri ya mafumu a Israele na Yuda.

⁸Pikhapita Yotamu ufumu akhali na pyaka makumawiri na pishanu mbatonga mu Yerusalemu pyaka khumi na pitanthatu.

⁹Iye adagonera mkono mbaikhwa m'masiye a mumzinda wa Davite, tenepo Ahazi mwanache adapita ufumu m'mbuto mwache.