Read cisena 2 MBIRI 28 Bible Online

2 MBIRI 28 - cisena bible

2 MBIRI 28

¹Ahazi adapita ufumu uku ana pyaka makumawiri mbatonga mu Yerusalemu pyaka khumi na pitanthatu. Iye hadateweze tayu njira zadidi za kholo yache Mfumu Davite; m'mbuto mwache iye adachita pinthu pyakukhonda komera MBUYA

²mbateweza njira zakuipa za mafumu a Israele. Iye adasasanyisa mfanikizo wasimbi wa milungu Baala.

³Iye akhafukiza pyakununkhira m'phedi ya Beni-Hinomu mbapereka podi na anache ene ninga nsembe yakupyerera kuna mifanikizo, kutsanzira mitemo ya yakunyansa ya anthu, ale akhadathamangiswa na MBUYA pikhapita Aisraele m'dzikomo.

⁴Pambuto zakupembedzerapo milungu, pamapiri ang'ono-ang'ono pontho na pansi pa muti onsene wakuvata, Ahazi akhaperekapo nsembe na kufukiza pyakununkhira.

⁵Na thangwi yakuti Mfumu Ahazi adadawa, MBUYA Mulungu wache adatawirisa mfumu wa Aramu kumkunda mbakwata anthu ache a ku Yuda azinji ninga anyaperezo kwenda nawo ku Damasiko. MBUYA adatawirisa pontho mfumu wa Israele, Peka mwana Remalia kukunda Ahazi mbapha anyankhondo akuwanga mtima a ku Yuda pikwi dzana na makumawiri pansiku ibodzi ene. Mulungu wa makolo awo adatawirisa penepi kuchitika thangwi anthu a ku Yuda akhadakhonda MBUYA.

⁷Nyankhondo unango wa Chiisraele dzinache Zikiri ndiye adapha Maaseia mwana Mfumu Ahazi, Azirikamu nyakufambisa pinthu pya kunyumba yachifumu na Elikana ule akhali wachiwiri wa mfumu.

⁸Podi kwene kuti anthu a ku Yuda akhali abale awo, anyankhondo a ku Israele adaphata akazi na anawo ene pikwi madzana mawiri kwenda nawo ku Samaria kakhala anyaperezo mbapokosera pontho na pinthu pyawo pizinji.

⁹Munthu unango dzinache Odedi, mprofeti wa MBUYA akhakhala mumzinda wa Samaria. Iye adagumanikana na anyankhondo a Chiisraele, ale akhali pabodzi pene na anyaperezo a ku Yuda. Pikhali iwo chifupi kupita mumzinda mule, iye adalonga mbati, “MBUYA Mulungu wa makolo anu adazhangalira anthu a ku Yuda mbakutawirisani kuakunda, kwache iye aona kuacheka mwavinga kwaachita imweko.

¹⁰Lero munafuna kuti amuna na akazi a mu Yerusalemu na Yuda akhale mabitchu anu. Kadi imwe nkhabe dziwa tayu kuti mwachita pyakudawika pamaso pa MBUYA Mulungu wanu?

¹¹Ngavani kuno! Anyaperezowa mbabale anu pontho anyamainganu. Alekeni aende pyawo gopesera MBUYA anakutchunyusani mwakuzhangali!”

¹²Amuna anayi akuveka a m'dzinza ya Eferemu: Azaria mwana Yehohanani, Berekia mwana Meshilemoti, Yehizikia mwana Shalumu na Amasa mwana Hadilai adasumululambo pidachita anyankhondo pile.

¹³Iwo adalonga mbati, “Lekani kudza nawo kuno anyaperezowo! Ife tadawira kale MBUYA, pontho tamzhangalisa mwakuti anatitchunyusa. Apo lero munafuna kuchita pontho chinthu chinango kuthimizira pakudawa kwachita ife kaleku?”

¹⁴Natenepo anyankhondo ale adapereka anyaperezo ale pabodzi pene na pinthu pidapokosera iwo m'manja mwa anthu na akadamu awo.

¹⁵Tenepo amuna anayi adasankhulwa kuti agawize anyaperezo ale nguwo zidapokosera iwo zile. Iwo adapereka kuna iwo nguwo na nkhwaira, adaapasa pizinji pyakukwanisa kudya na kumwa, pontho adaikha mafuta aolivi papironda pyawo. Ale akhachimwanaletu kufamba akhapakizwa pamabulu, pontho anyaperezo anango onsene adabwerera nawo ku Yeriko, mzinda wa miti yamdikhwa, m'nthemba ya Yuda. Kubuluka penepo Aisraele adabwerera kwawo ku Samaria.

¹⁶Pandzidzi wenewo Aedomu adapita pontho mu Yuda mbaphata anyaperezo azinji ene. Natenepo Mfumu Ahazi adapempha Tigilati-Pilesere, mfumu wa Asiria kuti amphedze.

¹⁸Pandzidzi onthowo Afilisti akhapita m'maluwani akumadokero dzuwa m'tchinde mwa mapiri na m'thando yatchetcha ya Negebu mu Yuda. Iwo adapokosera mizinda ya Beti-Shemeshi, Aialoni na Gederoti, pontho na mizinda ya Soko, Timina na Gimizo, pontho na midzi yawo yakuzungulira mbakhazikika mwenemo.

¹⁹Na thangwi yakuti Mfumu Ahazi wa Yuda adachitisa anthu ache kudawa, pontho kuti iye hadakhulupirike tayu kuna MBUYA, tenepo MBUYA adadzesa nyatwa pana Yuda.

²⁰Tigilati-Pilesere, mfumu wa Asiria, m'mbuto mwa kumphedza Ahazi, iye adamuonesa nyatwa.

²¹Natenepo Ahazi adakwata golidi wa m'Nyumba ya MBUYA, wa m'nyumba yachifumu na m'nyumba za akadamu a anthu mbapipereka kuna mfumu wa Asiria. Podi kwene kuti adachita tenepo, kwache ipyo nee pidamphedze tayu.

²²Pidandendeya nyatwa za Ahazi, iye adanyanyiratu kudawa pamaso pa MBUYA kupiringana pakutoma.

²³Iye adapereka nsembe kuna milungu ya Damasiko, ikhadamkunda ile. Iye adalonga mbati, “Milungu ya Aaramu imbaphedza mafumu a Aramu, natenepo ngakhala ine ndinapereka nsembe kuna iyo, inati indiphedze.” Penepi pidadzesa nyatwa zikulu pana iye na dziko yache ene.

²⁴Kuthimiza penepo iye adakwata pinthu pyonsene pya m'Nyumba ya MBUYA mbamala kupiswa. Iye adafunga Nyumba ya Mulungu mbamanga maguwa ansembe ponsene pene mu Yerusalemu.

²⁵Mumzinda onsene na luwani yonsene mu Yuda, iye adasasanya mbuto zakupembedzerapo, kule kukhafukizirwa pyakununkhira kuna milungu yachilendo. Na njira yeneyi iye adazhangalisa MBUYA, Mulungu wa makolo ache.

²⁶Pinango pyonsene pile pidachitika mwenemo iye mbali mfumu, kutomera pakutoma kufikirana pakumalisira pyalembwa m'bukhu ya mbiri ya mafumu a Yuda na Israele.

²⁷Mfumu Ahazi adagonera mkono mbaikhwa mu Yerusalemu, kwache iye hadaikhwe m'masiye achifumu tayu. Hezekia mwanache adapita ufumu m'mbuto mwache.