Read cisena 2 MBIRI 29 Bible Online

2 MBIRI 29 - cisena bible

2 MBIRI 29

¹Hezekia adapita ufumu wa Yuda uku ana pyaka makumawiri na pishanu mbatonga mu Yerusalemu pyaka makumawiri na pifemba. Mache akhali Abia mwana Zekaria.

²Iye adachita pyakulungama pamaso pa MBUYA ninga montho mudachitirambo Mfumu Davite kholo wache.

³Mwezi wakutoma wa chaka, Hezekia mbali mfumu kale, adafungula misuwo ya Nyumba ya Mulungu mbaisasanyisa pontho.

⁴Iye adagumanyisa gulu ya anyansembe na Alevi pachintalo cha Nyumba ya Mulungu kumabulukiro dzuwa

⁵mbalonga nawo kweneko. Iye adalonga mbati, “Imwe Alevi mwathema kupipambula mwekha mwene mbamuchenesa Nyumba ya Mulungu wa makolo anu. Bulusani m'Nyumba ya MBUYA chinthu chonsene chakukhonda chena.

⁶Makolo athu akhali okhonda khulupirika kuna MBUYA Mulungu wathu mbachita pinthu pyakukhonda kumkomera. Iwo adamkhonda mbampasa nkhodolo pambuto pakhala iye pale.

⁷Iwo adafunga misuwo ya Nyumba ya MBUYA, pontho adathimisa nyale mbachimwana kufukiza pyakununkhira penu kupereka nsembe zakupyerera m'Nyumba ya MBUYA Mulungu wa Israele.

⁸Na thangwi ya penepi MBUYA azhangalira Yuda na Yerusalemu; iye adaasanduza kukhala chinthu chakugumisa manungo, chakuchitisa mantha na chakusekesa. Imwe mukupidziwa penepi mwadidi mwene.

⁹Makolo athu adaphiwa pankhondo, pontho akazathu na anathu adaphatwa kakhala anyaperezo.

¹⁰“Lero ndanyerezera pyakuchita chiverano na MBUYA Mulungu wa Israele, towera ukali wache wakugoswa ubuluke pana ife.

¹¹Ananga, lekani dembuka. Imwe ngale adasankhulwa na MBUYA kuti mufukize pyakununkhira kuna iye na kutsogolera anthu pachipembedzo chache.”

¹²Alevi ali m'tchindemu akhali penepo: Kubulukira kuna nkhonda Kohati pakhali Mahati mwana Amasai na Yowele mwana Azaria Kubulukira kuna nkhonda Merari pakhali Kishi mwana Abidi na Azaria mwana Yehalelele Kubulukira kuna nkhonda Gereshoni pakhali Yoa mwana Zima na Edeni mwana Yoa Kubulukira kuna nkhonda Elizafani pakhali Shimri na Yeuele Kubulukira kuna nkhonda Asafu pakhali Zekaria na Matania Kubulukira kuna nkhonda Hemani pakhali Yehuele na Shimei. Kubulukira kuna nkhonda Yedutuni pakhali Shemaia na Uziele.

¹⁵Amuna enewa adagumanyisa Alevi anzawo mbapichitisa okha ene kukhala akuchena pamaso pa Mulungu. Tenepo ninga montho mukhadaapangira mfumu kuti achite, iwo adatoma kuchenesa Nyumba ya Mulungu malingana na mwambo wa MBUYA.

¹⁶Anyansembe adapita m'bwalo mule kaichenesa pontho adabulusa pyonsene pya m'Nyumba ya MBUYA na muchintalo chache, pile pikhali pyokhonda chena. Kubuluka penepo Alevi adathukula pyonsene kupibulusa mumzinda mule kwenda napyo kuphedi ya Kidroni.

¹⁷Basa idatoma pansiku yakutoma ya mwezi wakutoma, tenepo pidafika iyo pansiku yachisere basa yonsene ikhadamaliswa, kuthimizapo msuwo wakupitira m'Nyumba ya MBUYA. Kubuluka penepo adaphata pontho nsiku zinango zisere mpakana pansiku yakhumi na chitanthatu ya mwezi wenewo, kusasanya Nyumba ya Mulungu kuti anthu apembedzemo.

¹⁸Alevi adalonga kuna Mfumu Hezekia pinthu pidachita iwo mbati, “Ife tamala kuchita mwambo wakuchenesa Nyumba yonsene ya MBUYA, kuthimizapo guwa yakuperekerapo nsembe zakupyerera na pyombo pyache pene, pontho na thebulu yakuperekerapo mikate yakupambulika na pyombo pyache pene.

¹⁹Ife tabwezera m'mbuto mwache pinthu pyonsene pikhadabulusa Mfumu Ahazi pandzidzi ukhali iye okhonda khulupirika kuna MBUYA ule, pontho tapambulira pyonsene kuna Mulungu. Pyonsene pili patsogolo pa guwa yansembe ya MBUYA.”

²⁰Mangwana mwache na machibese Mfumu Hezekia adagumanyisa amuna akuveka a mumzinda mule, tenepo onsene pabodzi pene adenda ku Nyumba ya MBUYA.

²¹Iwo adapereka ng'ombe zimuna zinomwe, mabira anomwe, anabira anomwe na mbuzi zinomwe kukhala pyakupereka pyakubulusira pyakudawa pya banja yachifumu na pya anthu a ku Yuda pontho na pyakuchenesera Nyumba ya MBUYA. Mfumu adapanga anyansembe ale akhali pidzukulu pya Aroni kuti apereke nyama zile ninga nsembe paguwa ya MBUYA.

²²Anyansembe chakutoma adapha ng'ombe zimuna zile, kubuluka penepo adapha mabira, kachitatu kache adapha anabira, kubuluka penepo adawaza chiropa cha nyama yonsene paguwa yansembe.

²³Pakumalisira pache iwo adakwata mbuzi zile kwenda nazo kuna mfumu na kuna anthu onsene anango ale akhasanjika manjawo pana mbuzizo.

²⁴Kubuluka penepo anyansembe adapha mbuzi zile mbakhuthulira chiropa chache paguwa yansembe kukhala nsembe yakubulusira pyakudawa pya anthu onsene, thangwi mfumu akhadatonga kuti nsembe zakupyerera na nsembe yakubulusira pyakudawa piperekwe thangwi ya Aisraele onsene.

²⁵Mfumu adateweza kuchita pyonsene pidalonga MBUYA kuna Mfumu Davite kudzera muna Gadi mprofeti wa mfumu, pontho kudzera muna mprofeti Natani. Iye adaikha Alevi m'Nyumba ya MBUYA mbaapasa anyakatangale na nkhotcho,

²⁶pyakuimbira ninga pikhaphatisa basa Mfumu Davite. Anyansembe adaimirambo penepo na ngoma.

²⁷Hezekia adatonga kuti nsembe zakupyerera ziperekwe; tenepo pidatoma kuperekwa nsembe ile, anthu adaimba nyimbo zakukuza nazo MBUYA, pontho anyakuimba adatoma kuliza ngoma pontho na kuimba pyakuimbira pinango pyonsene.

²⁸Munthu onsene akhali penepo, adapembedza pontho kuimba nawo pabodzi, tenepo nyimbo zinango zonsene zidathimiza basi kuimbwa kufikirana nsembe zonsene zakupyerera zidamala perekwa.

²⁹Kubuluka penepo Mfumu Hezekia na anthu onsene adagodama mbapembedza Mulungu.

³⁰Mfumu na akadamu a dzinza yonsene adapanga Alevi kuti aimbe nyimbo zakukuza nazo MBUYA, zile zidalembwa na Davite pontho Asafu mprofeti. Natenepo munthu onsene adaimba na kukomerwa kukulu pikhagodama iwo kupembedza Mulungu.

³¹Hezekia adalonga kuna anthu mbati, “Podi chinchino imwe mwachena pamaso pa MBUYA, idzani na nsembe zanu kukhala chakupereka, kupereka takhuta kuna Mulungu.” Iwo adavera, tenepo anango a iwo adadza mwakufuna kwawo na nyama kuti ziperekwe nsembe zakupyerera kuna MBUYA.

³²Iwo adadza pontho na ng'ombe zimuna makumanomwe, mabira dzana na anabira madzana mawiri kukhala pyakupereka pyakupyerera kuna MBUYA.

³³Iwo adadza pontho na ng'ombe zimuna madzana matanthatu na mabira pikwi pitatu kukhala nsembe kuti anthu adye.

³⁴Na thangwi yakuti pakhali nkhabe anyansembe azinji kuti mbadakwanisa kupha nyama zonsenezi, Alevi adaaphedza kufikirana basa yonsene idamala. Pandzidzi wenewo anyansembe azinji adapichenesa okha ene pamaso pa Mulungu. Alevi adachita chipapu pakupichenesa okha ene pamaso pa Mulungu kupiringana anyansembe.

³⁵Kuthimizira pa nsembe zile zikhaotchiwa zamumphu, anyansembe adapaswa basa yakuotcha mafuta, ale adaperekwa kubulukira kunsembe zikhadya anthu, pontho na kupereka nsembe pyakumwa, pile pikhaperekwa kubodzi kwene na nsembe zakupyerera zile. Natenepo chipembedzo cha m'Nyumba ya MBUYA chidatoma pontho.

³⁶Mfumu Hezekia na anthu adakomerwa pyakwanga thangwi Mulungu adaaphedza kuchita pyonsenepi mwakuchimbiza.